Wisam

“النهار قرب و لكن
عايز اللى ينادى ليه
ده السكوت ع الظلم عورة
و اللى يعمل نص ثورة
"يحفر القبر بإيديه”
― محمد السيد, أبيض غامق

“برغم إن الكلام ع الحب من نظرة كلام معتاد
وإن الصدفة أحيانا بتبقى بألف ألف ميعاد
ورغم إن الكلام أصلا بينقص حاجة كل ما زاد
ورغم إني جدع وتقيل وعمرى ما أقولها بالساهل
أنا نفسى أقولها لك فـ أول مرة نتقابل
فلو كان المكان يسمح وست الكل لو تأذن
أنا عايز أقول إني بحبك من زمان جدًا”
― مصطفى إبراهيم

“و أسمع حكايات صاحبي الأنتيم ..
و نكلم بعض ..
و اسرح و ادوس علي حرف الميم ..
دوستين ورا بعض ..
و بسيبه ساعات ..
لما ازهق من كتر الحكايات ..
و اكتبله حاجات ملهاش معنى ..
زي الشفرة ..
و ابعت للناس ف وشوش صفرا ..
و ازعل منها ف أكتب طيب ..
و أزعل اكتر ف أكتب ماشي ..
و براحتك اصلا ..
انا ماشي ..
و أما اضحك ادوس علي حرف ال هه ..
و علي قد الضحكة افضل دايس ..
أزعل ملاقيش للحزن زرار ..
و برغم بإني معبّي وشوش ..
فعلا ملهوش .. ازاي حختار ؟ ..
فيه وش واحشني و عمره ما جه ..
مصطفى بيبقولك ..
ب ..
ر..
ب..
فيرد يقولي ..
ت ..
ي ..
ت ..
ف أطلع و اقفل نور الأوضة ..
و اسند بدراعي علي الشباك ..
و ابص لفوق ..
و اتمنى ساعتها اكون وياك ..
و اسرح .. و افوق ..
و أما أزهق م الوقفة لوحدي ..
إكمن مفيش حد معدي ..
ف بطلع شباك الدنيا ..
و اكتبله "أنا باك" ....”
― مصطفى إبراهيم

“قال الشهيد للشهيد ف السما الأولى

الطلقة مش طايشة... و الدولة مسئولة

قال الشهيد للشهيد ف السما التانية

الأرض طبّت جنبي مقتولة

قال الشهيد للشهيد ف السما التالتة

الحظ جابنا ...و احنا مش فَلتة

قال الشهيد للشهيد ف السما الرابعة

الدم حيروح فين ... الدايرة مقفولة

قال الشهيد للشهيد ف السما الخامسة

الأرض دي ..متبوعة مش تابعة

لو كان دَعَاكوا نزول ونا لسة وسطيكوا

يبقي ف غيابي تنزلوا أدعى

قال الشهيد للشهيد ف السما السادسة

؟مين كان من الانبيا مش قلة مندسة

و حكي الشهيد للشهيد م السما السابعة

عن ثورة تانية حتيجي .. أقوى م الأولى”
― مصطفى إبراهيم, المانيفستو