Saans

Wapen/Flagg	Koort
Basisdaten
Bundsland: Neddersassen Landkreis: Cuxhoben Gemeen: Hagen
Flach:	13,45 km²
Inwahners:	810 (2017-11-2727. November 2017)
Inwahnerdicht:	60,2 Inwahners pro km²
Hööchd:	2 m över NHN
Postleettall:	27628
Vörwahl:	04702
Geograafsche Laag:	Koordinaten:53° 22′ N, 8° 31′ O53° 22′ N, 8° 31′ O

Saans (hoochdüütsch Sandstedt) is en Dörp in de Gemeen Hagen in’n Landkreis Cuxhoben, Neddersassen. Binnen de Gemeen billt de Oort en egen polietsche Oortschop.

Bi Saans höört von öllers ok de lüttje Oort Saanstermoor mit bi.

De Oort liggt in de Masch von de Ünnerwerser in Oosterstood. Bi Saans münnt de Rechte Blangenarm von de Werser wedder in’n Hauptstroom.

De Naveröörd sünd Rechtenfleth in’n Noorden, Rechtenflethermoor un Wittenbarg in’n Noordoosten, Saanstermoor in’n Oosten, Offenwardermoor in’n Süüdoosten, Offenwarden un Weersbe in’n Süden, Harriersand, Boitwarden un Golzwarden in’n Süüdwesten un Schmalenfleth, Sürwürden, Alse un de Strohüser Plaat in’n Noordwesten.

Saans kummt 1105 toeerst in en Oorkunn von’n Bremer Arzbischop Friedrich I. vör.^[1]

In’n Eersten Weltkrieg sünd 16 Soldaten ut Saans fullen oder vermisst un in’n Tweten Weltkrieg 40.^[2]

In de Franzosentied hett de Oort toeerst 1810 bet 1811 binnen dat Königriek Westfalen to de Mairie Saans in’n Kanton Hagen höört un denn von 1811 bet 1814 to dat Franzöösche Kaiserriek ünner Napoleon un dor to de Mairie Weersbe in’n Kanton Hagen.

De Oort hett vör 1885 to’n Bezirk Noord-Oosterstood von dat Amt Hagen tohöört. Na 1885 weer dat in’n Kreis Geestmünn. 1932 is dat Deel von’n Kreis Wersermünn worrn un 1977 von’n Landkreis Cuxhoben.

De Oort weer fröher en egen Gemeen. 1968 hebbt sik denn aver de Gemenen Saans, Offenwarden, Rechtenfleth un Weersbe to de Gemeen Saans tohoopdaan. An’n 1. März 1974 is dor ok noch Wortfleet tokamen. An’n 1. Januar 2014 is de Gemeen Saans denn Deel von de ne’e Gemeen Hagen worrn. Dorbi is de vörherige Gemeen wedder opdeelt worrn in Oortschoppen na de Grenzen von de olen Gemenen vör 1968. Dat Dörp Saans (mit Saanstermoor) billt nu en Oortschop mit egen Oortsvörsteiher binnen de Gemeen.

* tohoop mit Saanstermoor

Saans is evangeelsch-luthersch präägt un billt mit de Johannes-de-Döper-Kark en egen Kaspel.

För de Kathoolschen is de Hillig-Hart-Jesu-Kark in Geestmünn tostännig.

De Karkhoff Saans liggt rund üm de Kark un höört de Karkengemeen to.

Dat Wapen wiest vörn op blauen Grund en sülvern Aadler mit rode Tung, gollen Klauen un en gollen Hilligenschien un achtern op sülvern Grund en grönen Linnentelg över en blauen Wellenbalken.

De Aadler is Sinnbild för’n Evangelist Johannes, de för de Saanster Johannes-Kark steiht. De Linnentelg kummt ut dat Wapen von de Familie Witmar, de fröher in Saans seten hett. De blauen Wellenbalken is Symbool för de Werser.

Utklamüsert hett dat Wapen de Heraldiker Albert de Badrihaye.

• 1. Januar 2014–: Falko Wahls-Seedorff (CDU)

Gedenktafeln för de Fullenen ut de twee Weltkrieg’ hängt in Saans an de Kark.

De Sportvereen TSV Saans is 1921 grünnt worrn.

Saans hett en egene freewillige Füürwehr, de 1902 grünnt worrn is.

An de Werser gifft dat en Campingplatz.

Bet 2015 harr de Oort en Filiaal von de Volksbank Bremerhoben-Cuxland. De Filiaal von de Werser-Elv-Spoorkass hett to’n 1. Dezember 2015 ok dichtmaakt.

Dör Saans löppt de Kreisstraat 50, de in’n Noorden över Rechtenfleth un Neenlann na de Bundsstraat 437/Landsstraat 121 geiht un in’n Süden över Offenwarden un Weersbe na Rechtebe an de K 49. In’n Oosten geiht de K 51 över Wittenbarg na Hagen an de L 134. De Weg von de K 50 na’n Fähranlegger von de Fähr Saans–Braak an de Werser is as K 53 utwiest.

De nächste Autobahn is de Autobahn 27 (Afsnidd Bremen–Bremerhoben). De Opfohrt 12 Hagen liggt so veer Kilometer in’n Oosten von Saans an de K 51.

De nächste Bahnhoff is so bi acht Kilometer wied weg in’n Süüdwesten de Bahnhoff Braak an de Bahnlien Hude–Blexen. Dor is aver blots över de Fähr hentokamen. Op’n Landweg is de nächste Bahnhoff de Bahnhoff Luunst an de Bahnlien Bremen–Bremerhoben, de 20 Kilometer in’n Noordoosten liggt. Op de Nedderwerserbahn hett dat von 1911 bet 1931 Personenverkehr geven. In düsse Tied harr de Oort en egen Bahnhoff.

Fröher harr Saans en egen Volksschool. Nadem de Volksschool dichtmaakt hett, güngen de Kinner toeerst na de Grundschool Weersbe, de aver 2008 ok dichtmaakt hett. Sietdem gaht de Kinner op de Grundschool Uthleer.

De Politiker Eymer Friedrich Illies is 1896 in Saans boren.

1. ↑ Carsten Boos: Kurhannoversche Landesaufnahme des 18. Jahrhunderts: Kassebruch. Erläuterungen zum Blatt 20 Kassebruch. Neddersassisch Landsverwaltungdamt, 1992, Sied 3
2. ↑ Onlineprojekt Gefallenendenkmäler
3. ↑ Christoph Barthold Scharf: Statistisch-Topographische Samlungen zur genaueren Kentnis aller das Churfürstenthum Braunschweig-Lüneburg ausmachenden Provinzen. Meier, Bremen 1791, Sied 199
4. ↑ Albrecht Friedrich Ludolph Lasius: Der französische Kayser-Staat unter der Regierung des Kaysers Napoleon des Großen, im Jahre 1812, Band 1. Kißling, Ossenbrügge 1813, Sied 104
5. ↑ Curt Heinrich Conrad Friedrich Jansen: Statistisches Handbuch des Königreichs Hannover. Hannover 1824, Sied 530
6. ↑ Friedrich Wilhelm Harseim, Carl Schlüter: Statistisches Handbuch für das Königreich Hannover. Schlütersche Hoffbookdruckeree, Hannover 1848, Sied 133
7. ↑ Die Gemeinden und Gutsbezirke des Preussischen Staates und ihre Bevölkerung. Berlin 1873, Sied 155
8. ↑ Gemeindelexikon für das Königreich Preußen. Auf Grund der Materialien der Volkszählung vom 1. Dezember 1885. Verlag des Königlichen statistischen Bureaus, Berlin 1888, Sied 164
9. ↑ Gemeindelexikon für das Königreich Preußen. Auf Grund der Materialien der Volkszählung vom 1. Dezember 1905. Verlag des Königlichen statistischen Landesamtes, Berlin 1908, Sied 52
10. ↑ Inwahnertallen op gemeindeverzeichnis.de
11. ↑ ^{a b c} Inwahnertallen op verwaltungsgeschichte.de

Saans. Mehr Biller, Videos oder Audiodateien to’t Thema gifft dat bi Wikimedia Commons.

Oortschoppen un Öörd in de Gemeen Hagen

Albst (mit Büggeln) | Braamst (mit Braamst, Braamstermoor, Bremerhorn, Finn, Finterbarg, Gackau, Harndorp, Loh un Wittst) | Dörphagen | Driftseth (mit Dannendörp, Rechtenflethermoor un Wittenbarg) | Hagen (mit Börsten un Harmonie) | Hein (mit Vosloog) | Hoop (mit Seelhorn) | Kassbrook (mit Grienenbargshusen un Kassbroker Heid) | Leernst (mit Born, Düngel, Neenhusen un Seedörp) | Offenwarden (mit Offenwardermoor) | Rechtenfleth (mit Blömkenmoor, Dreptersiel un Feldhoff) | Saans (mit Saanstermoor) | Uthleer (mit Cleve un Uthleererbarg) | Weersbe (mit Weersbermoor) | Wolsbuddel (mit Heesen un Woldar) | Wortfleet (mit Rechtebe un Rechtebermoor)