Bundsautobahn 99

De Bundsautobahn 99 (Afk.: BAB 99 oder ok A 99) is en Autobahn in Bayern mit en Samtläng vun 53,5 km. Se verlöpt as Autobahnring üm de Stadt München un verbinnt en poor Kilometer buten vun’t Stadtrebeet mehrere Autobahnen, de na München rinföhren doot. So gifft de Ring de Mööglichkeit för den Feernverkehr, üm de Stadt rüm to fohren.

De A 99 weer al in de 1930er Johren as vullstännigen Autobahnring plaant, is bit hüüt aver nich slaten worrn. Se verlöpt vun de A 96 in’n Süüdwesten över de A 8 in’n Noordwesten un de A 92 in’n Noord-Noordwesten na de A 9 in’n Noorden un wieter na de A 94 in’n Oosten bit na de A 8/A 995 in’n Süüden.

De Bo vun den Münchener Autobahnring is wegen den Tweeten Weltkrieg blots stedenwies anfungen worrn. Na’n Krieg is toeerst de Afsnitt twüschen dat Autobahnkrüüz München-Noord un dat Krüüz Brunnthal (hüüt: Krüüz München-Süüd) Mitt vun de 1970er Johren boet worrn. De A 8 vun München na Stuttgart is vörlöpig över de Bundsstraat 471 an de A 9 anslaten worrn. Bit denn müss de Feernverkehr dör dat Stadtrebeet vun München fohren.

De Anlusssteed München-Fröttmaning-Noord is nadräglich boet worrn, üm den tosätzlichen Verkehr vun de Allianz Arena vun un in Richt na Stuttgart optonehmen. Se is blots as Halfanslusssteed utföhrt. Nadräglich boet weer ok de Utfohrt Aschheim/Ismaning. Se schüll den Dörgangsverkher ut de Gemeen Aschheim minnern, wat aver blots deelwies Spood harr.

In’n Februar 2006 is en Wieterföhren vun München-Lochhausen bit na de Anslusssteed Germering-Noord in Bedrief nahmen worrn, nadem en annern Afsnitt bit na de A 96 al in’n November 2005 apen maakt worrn is. Dor ennt de A 99 vundaag.

De Utbo vun den Ring in’n Süüden vun de A 96 na de A 95 in’n Süüdwesten un wieter bit na dat Krüüz München-Süüd an de A A995 is 2003 vun de Bundsregeren nich in den Bundsverkehrsweegplaan opnahmen worrn. Liekers is in’n Mai 2006 en düre Studie in Opdrag geven worrn, üm to kieken, wat dor to maken weer. De Twüschenresultaten sünd 2008 vörstellt worrn^[1]. En tweeten Twüschenbericht is in’n April 2009 afgeven worrn^[2].

To Anfang weern 95 verschedene möögliche Trassen utklämüstert worrn, vun de nu blots noch ölven ünnersöcht warrt. De Strecken leegt dorbi twüschen 13 un 35 km. De süüdlichste dorvun verlöpt in’n Süden vun Gauting, Baierbrunn un Oberhaching. Grote Deeln müssen dorvun ünner de Eer boet warrn, wat to hoge Kosten vun bit to 45 Mio. Euro för een Kilometer föhren de. In’n letzen Schritt vun de Projektstudie weer ok noch ünnersöcht warrn, woans sik de mööglichen Trassen op de Ruumstruktur, de Ümwelt, den Verkehr un de Kosten utwirken doot. De Afslussbericht is in’n Mai 2010 vörleggt worrn^[3].

Ünnern Streek is dat Resultat vun de Studie, dat de Plaan, den Ring vullstännig to sluten, an un för sik Sinn maken de un ok ümtosetten weer. För twee vun de oorsprünglichen Trassen gifft de Bericht den Raat to’n Utplanen. Beide Trassen verbinnt dat Autobahndreeeck München-Süüdwest mit ünnerscheeedliche Afsneden vun de A 995 un seht en Tunnel ünner den Oort Krailling mit dat Würmdaal vör. För beide Strecken warrt Bokosten in Hööch vun ruchweg 1,2 Milliarden Euro afschätzt. Politisch is de Utbo ümstreden. De bayerische Ministerpräsident Horst Seehofer hett in’n Juni 2010 dat Projekt stoppt^[4].

De A 99 gellt as een vun de Autobahnen mit den meisten Verkehr in Europa. Faken gifft dat Stau an de Krüzen Münschen-Noord un München-Süüd. Boet weer de Autobahn oorsprünglich mit söss Fohrstriepens. Intwüschen hett se twüschen de Affohrt München-Neuherberg un dat Krüüz München-Süüd veer Fohrstriepens in jede Richt, wobi hier de Standstriepen freegeven warrt, wenn veel Verkehr is. De Affohrten sünd also blangen de Standstriepens boet worrn. Dat gifft den Plaan, de Autobahn twüschen dat Krüüz München-Noord un de Anslusssteed Haar ok op acht Striepens uttoboen. Man, woneem dat Geld opbröcht warrn schall, is noch nich kloor. För den eersten Boafsnitt twüschen dat Krüüz München-Noord un de Anslusssteed Aschheim/Ismaning is Anfang 2013 de Plaanfaststellbesluss rutgahn^[5]. De hele Utbo schall 147 Millionen Euro kösten^[6].

En Sünnerheit vun de A 99 is de Eschenrieder Spang, de faken ok as A 99a betekent warrt. Dat is en veer Kilometer langen Sietenarm vun de A 99, de na de A 8 in Richt Stuttgart föhrt.

De Aubinger Tunnel is mit en Läng vun 1956 m de längste Autobahntunnel vun Bayern. De ADAC hett em as een vun de sekersten Tunnels uttekent. Bito is de Tunnel mit een vun de modernsten Kontrollanlagen vun Europa för de Snelligkeit utrüst. De Kontrollen warrt maakt, ahn dat de Fohrers dorvun wat marken doot. Meetsteden gifft dat in beide Richten. De Daten warrt direkt an de Polizei wietergeven.

Twüschen de Anslusssteden Hohenbrunn un Haar gifft dat in Fohrtricht Nürnbarg/Stuttgart en Lastwagen-Kontrollsteed vun de Polizei un vun’t Bundsamt för Göderverkehr. Mit Sensers, de in de Fohrbahn inarbeit sünd, warrt to Proof vun’t tolaten Samtgewicht al vör de Steed de Asslasten vun de Lastwagens meten. Opfallig Lastwagens warrt an de Kontrollsteed rutwunken un nipp un nau wagen^[7].

1. ↑ 1. Twüschenbericht to de Projektstudie Süüdring (26. November 2008) (PDF; 4,7 MB)
2. ↑ 2. Twüschenbericht to de Projektstudie Süüdring (29. April 2009) (PDF; 4,7 MB)
3. ↑ Afslussbericht to de Projektstudie Süüdring (27. Mai 2010) (PDF; 8,0 MB)
4. ↑ Autobahn-Südring: Das Projekt ist begraben – die Probleme bleiben (SZ vun’n 16. Juni 2010)
5. ↑ Regierung von Oberbayern gibt grünes Licht für den 8-streifigen Ausbau der Bundesautobahn A 99 Ost Autobahnring München zwischen dem AK München-Nord bis zur AS Aschheim-Ismaning, Pressemitdeelen Nr. 032 vun’n 29. Januar 2013 op www.regierung.oberbayern.bayern.de; afropen an’n 13. Februar 2013
6. ↑ A 99 soll achtspurig ausgebaut werden op sueddeutsche.de; afropen an’n 9. November 2011
7. ↑ http://www.abdsb.bayern.de/wir_ueber_uns/am_hohen_b.php

BAB 99. Mehr Biller, Videos oder Audiodateien to’t Thema gifft dat bi Wikimedia Commons.

• Naue Streckenbeschrieven vun de A 99

Düütsche Bundsautobahnen

Strecken in Bedriev:

Hööftstrecken: A 1 | A 2 | A 3 | A 4 | A 5 | A 6 | A 7 | A 8 | A 9

Över- un regional: A 10 | A 11 | A 12 | A 13 | A 14 | A 15 | A 17 | A 19 | A 20 | A 21 | A 23 | A 24 | A 25 | A 26 | A 27 | A 28 | A 29 | A 30 | A 31 | A 33 | A 37 | A 38 | A 39 | A 40 | A 42 | A 43 | A 44 | A 45 | A 46 | A 48 | A 49 | A 52 | A 57 | A 59 | A 60 | A 61 | A 62 | A 63 | A 64 | A 65 | A 66 | A 67 | A 70 | A 71 | A 72 | A 73 | A 81 | A 92 | A 93 | A 94 | A 95 | A 96 | A 98 | A 99

Regional un lokal: A 100 | A 103 | A 111 | A 113 | A 114 | A 115 | A 117 | A 143 | A 210 | A 215 | A 226 | A 255 | A 261 | A 270 | A 280 | A 281 | A 293 | A 352 | A 391 | A 392 | A 395 | A 445 | A 480 | A 485 | A 516 | A 524 | A 535 | A 540 | A 542 | A 544 | A 553 | A 555 | A 559 | A 560 | A 562 | A 565 | A 571 | A 573 | A 602 | A 620 | A 623 | A 643 | A 648 | A 650 | A 656 | A 659 | A 661 | A 671 | A 672 | A 831 | A 861 | A 864 | A 952 | A 980 | A 995

Plaant oder ehmolige Strecken:
A 16 | A 18 | A 22 | A 32 | A 34 | A 35 | A 36 | A 41 | A 47 | A 50 | A 51 | A 54 | A 55 | A 56 | A 69 | A 74 | A 77 | A 80 | A 82 | A 83 | A 84 | A 85 | A 86 | A 87 | A 88 | A 89 | A 90 | A 91

A 102 | A 104 | A 105 | A 106 | A 107 | A 205 | A 227 | A 241 | A 250 | A 252 | A 253 | A 263 | A 282 | A 290 | A 314 | A 339 | A 369 | A 376 | A 388 | A 430 | A 432 | A 441 | A 443 | A 448 | A 451 | A 480* | A 533 | A 545 | A 552 | A 558 | A 580 | A 610 | A 621 | A 647 | A 652 | A 653 | A 654 | A 655 | A 680 | A 683 | A 687 | A 713 | A 720 | A 722 | A 731 | A 751 | A 752 | A 753 | A 828 | A 834 | A 840 | A 860 | A 862 | A 863 | A 863* | A 881 | A 895 | A 921 | A 922 | A 942 | A 944 | A 985 | A 990 | A 991 | A 992 | A 993 | A 994 | A 996 | A 997 | A 998 | A 999
* ehmolig Plaan, Tall is intwüschen anners vergeven