Infrabel-Linn 44

D'Infrabel-Linn 44 ass eng belsch Eisebunnsstreck déi Pepinster mat Spa verbënnt. Tëscht 1867 an 1959, hat se vu Spa aus iwwer Stavelot, Trois-Ponts a Gouvy eng direkt Verbindung mat Lëtzebuerg. Zu Stavelot gouf et vun 1914 un duerch den Tunnel vun der Haute Levée en Uschloss un d'Linn 45 an Direktioun Malmedy.

D'Streck gouf a véier Etappe gebaut, déi kuerz noeneen ageweit goufen:

• 21. Oktober 1854: Pepinster - Theux (4,2 km)
• 07. November 1854: Theux - La Reid (3,2 km)
• 17. Februar 1855: La Reid - Spa (3,8 km)
• 20. Februar 1867: Spa - Stavelot (25,6 km) als Deel vun der Streck Lëtzebuerg-Spa weider op Trois-Ponts an op déi lëtzebuergesch Grenz.

1854 huet d'Société du chemin de fer Pépinster-Spa mam Bau vun der Streck ugefaangen, déi 1855 konnt bis op Spa a Betrib geholl ginn. Wéi 1867 de Guillaume-Luxembourg seng Streck vun der Grenz bis op Spa fäerdeggebaut hat, krut deen e Pachtvertrag fir d'Streck vu Pepinster op Spa, an hat domat en direkten Zougank op d'Infrabel-Linn 37 an op d'Industrieregioun Léck. Nom Däitsch-franséische Krich vun 1870 gouf d'Streck vun de belsche Staatsbunnen iwwerholl.

De Persounentrafic tëscht Géronstère a Stavelot war den 2. August 1959 eriwwer, an 1963 goung et och mam Giddertransport op en Enn. Bei Geleeënheet vu Courssen um Circuit vu Spa-Francorchamps sinn nach bis 1966 Extrazich gefuer. 1973 gouf d'Streck tëscht Géronstère a Stavelot ofgerappt.

D'Streck war mat engem Gleis gebaut ginn, an 1903 koum en zweet Gleis tëscht Pepinster a Spa dobäi. Dat gouf 1942 vum däitsche Besatzer nees ewechgerappt.

D'erlaabt Vitess op der Streck ass 70 km/h an zanter dem 23. Mee 1971 ass d'Streck mat 3 kV Gläichstroum elektrifizéiert.

Dës Beschreiwung vun der Streck entsprécht den Donnéeë wéi se vu Bel.rail unhand vun der SNCB-Numeréierung duergestallt ginn. Si entsprécht deemno net honnertprozenteg der geschichtlecher Entwécklung vun der Streck.