Ayran

Ayran is 'n verfrissende drank wat van jogurt berei word en sy oorsprong in die Kaukasus en Anatolië het. In landelike gebiede van Turkye is ayran die tradisionele drank wat aan gaste aangebied word.

Om ayran te berei word jogurt en water in die verhouding 2:1 tot 1:1 met 'n knippie sout geroer totdat dit skuimerig is. Gewoonlik dien skaapmelk- of koeimelkjoghurt met 'n hoë vetinhoud en baie suur jogurtkulture (Streptococcus thermophilus en Lactobacillus bulgaricus) as basis vir die drank. Indien dit nie beskikbaar is nie, word minder suur jogurt met 'n bietjie suurlemoensap vermeng. Soms word ayran met suurlemoen-melisse, pepermunt of basiliekruid gegeur.

Industrieel vervaardigde ayran is lankal ook in supermarkte te koop en word in twee variante, met 'n souterige of vrugtesmaak, aangebied.

In Rusland het ayran as deel van die Kaukasiese kookkuns onder sy Armeense naam tan gewild geraak. Tan word hier met of sonder koolsuur aangebied, en daar is ook variante met 'n verskeidenheid geure soos bokmelk-tan met komkommersap, met dille, ander kruie of swart peper. Hierdie soorte is nou verwant aan Kaukasiese kefir.

Soortgelyke jogurtdranke is ook gewild in ander Suid-Asiatiese en Oosterse lande, soos byvoorbeeld lassi in Indië en Pakistan asook dugh in Iran waarvan souterige en soet variante met 'n verskeidenheid kruie aangebied word.

Daarnaas is laban, 'n soort dik- of suurmelk, nou verwant aan ayran.

• Hierdie artikel, of gedeeltes daarvan, is uit die volgende Wikipedia-artikel vertaal: Ayran