Siebeerje

Siebeerje of Siberië (Russiesch : Сиби́рь) is e grôote eirdrykskunige streeke, en ku in de bridste betêeknisse gezien wordn lik Nôord-Oazje. Siebeerje is vanof de 17-ste êewe e stik van Rusland.

't Groendgebied van Siebeerje ligt ten ôostn van den Oeral toe an de schiddiengs-lyne tusschn de woatre-bekkens van d' Arktiesche en de Sille Oseoane. Siebeerje strekt êm uut van d' Arktiesche Oseoane toe an d' euvls van nôord-sentroal Kazakstan en toe an de nasjonoale grenzn van Mongoolje en Sjiena ^[1]. Mêt 'n ippervlakte van 13,1 mieljoen vierkante kielomeetrs, êe Siebeerje 77% van Rusland, mo dr weun mo 40 mieljoen menschn of 27% van de bevolkienge van 't land. Da komt oovrêen mêt e gemiddelde bevolkiengsdichteid van roend de 3 inweunrs per vierkante kielomeetre (e bitje lik vor Oostroalje), zoda Siebeerje êen van de minst bevolkte streekn is in de weirld.

Sommigte bronn beweirn da "Siebeerje" zoed uut 't Siebeeriesche Tartoars kommn en willn zeggn "sloapnd land" (Sib Ir)^[2]. 'n Andre versje is da 't de noame was van d' oede stamme van de Siepyrs, e mysteerjeus volk, loatre glykgesteld mê de Siebeeriesche Tartoarn. 't Modern gebruuk van de noame verschêen in de Russiesche toale achtre de veroovrienge van 't Siebeeriesche Khanoat. Nog 'n andre bronne zegt da de streeke genoamd is no 't Xibe-volk ^[3]. Den uutleg da de noame ofgeleid is van 't oed-Sloaviesche wôord vo "nôodn" (север, sever) wierd no vôorn gebrocht deur de Poolsche iestôoriekus Chycliczkowski ^[4] mo die verkloarienge wierd teegngesprookn deur Anatole Baikaloff ^[5] omda de Sjieneezn, Arabiern en Mongooln (die e gliekoaridige noame ên vo de streeke) gin Russiesch kunn gekend ên. Zyn eign mêenienge is da de noame e kombienoasje is van twêe wôordn, "su" (woatre) en "bir" (wild land).

• Boreoale busschn van ôostlik Siebeerje

1. ↑ Great Soviet Encyclopedia (in Russian), Encycl.yandex.ru.
2. ↑ (en) Trans-Siberian for softies.
3. ↑ (en) Crossley Pamela Kyle 2002 : The Manchus (Peoples of Asia), vol. 14, 3-rd edition, Wiley-Blackwell, 213 p., ISBN 0-631-23591-4
4. ↑ Czaplicka M.C.1915 : Aboriginal Siberia
5. ↑ Baikaloff Anatole 1950 : Notes on the origin of the name "Siberia", Slavonic and East European Review, 29/72, p. 288