Godfried van Bouillon

Godfried van Bouillon

1060-1100
Hertog van Neder-Lotharingen
Periode 1089-1100 Vôorganger Konrad Ipvolger Hendrik I van Limburg
Verdediger van 't Heilig Graf
Periode 1100 Vôorganger Nieuwn titel Ipvolger Boudewyn I van Jeruzalem
Voader Eustace van Boulogne Moeder Ida van Verdun

Godfried van Bouillon (Bonen of Baisy-Thy, 18 september 1060 – Jeruzalem, 18 juli 1100) was (ols Godfried IV) hertog van Neder-Lotharingen en êen van de leyders van den Êeste Kruustocht. Je wierd ook uutgeroopn toet den êeste keunienk van 't keunienkryk Jeruzalem moa je refuseerde dien titel.

Godfrieds ouders woarn groaf Eustace II van Boulogne en Ida van Verdun, zuster van hertog Godfried III van Lotharingen (met de Bulte) die hem in 1076 had angeduud ols zyn erfgenoam. Moa keyzer Hendrik IV van 't Heilig Rooms Ryk besliste van 't hertogdom an zyn eygn zeune Konrad te geevn en allêne moa Bouillon en 't markgroafschap Antwerpn an Godfried. In 1089 krêeg Godfried ton toch 't hertogdom in handn, ols dank vo zyn dienstn in den oorloge van de keyzer teegn de Saksn en teegn paus Gregorius VII. Je dêed belangryke schenkiengn an verschillige klôosters, lyk 't Sint-Michielsklôoster (de loatere Sint-Michielabdie) in Antwerpn, d' abdien van Munsterbilzen, Genepiën en Gorze. Je richtte in 't klôoster van Antwerpn ook drie kapelln ip, gewyd an Sinte-Moartn, an Maria Magdalena en an d' heilign Marcellinus en Petrus.

In 1095 wierd 't Concilie van Clermont g'houdn. Paus Urbanus II en Peter de Kluzenoare riepn ip vor e kruustocht t' houdn ter bevrydienge van Jeruzalem. Godfried gienk doarip in. Je verkocht en verpandde al zyn bezittiengn, surtout an de prins-bisschop van Luuk, inclusief 't kastêel van Bouillon.

In ogustus 1096 sloot 'n hem an by den Êeste Kruustocht, tegoare mè zyn broers Eustace en Boudewyn van Boulogne en ze vertrokkn met e leger van 40.000 man, die oender boane nog angevuld wierd met hêern en ridders, moar ook vele avonturiers, toet e leger van 100.000 man. Jeruzalem wierd in 1099 veroverd.

By de veroverienge ip Akko zou Godfried volgns den Arabische schryver Ibn al-Qalanisi getroffn zyn deur e pyle en doaran uutendelyk in Jeruzalem gestorvn zyn. Moa volgns de westersche schryvers Albert van Aken en Ekkehard van Aura zou Godfried binst zyn verbluuf an 't hof van Caesarea vergiftigd zyn deur den emir van die stad. Andere bronn vermeldn de pest ols reedn.

Nog vo dat 'n stierf gaf Godfried ipdracht an zyn broere Eustace, die zou werekêern noar huus, vo drie relikwien van 't Heilig Bloed van Jezus mee te pakkn vo de steedn Bonen, Lens en Antwerpn. Zyn stoffelyk overschot zou begroavn zyn in d' Heilig Grafkerke ip Golgotha.

Ofbeeldiengn die ier by passn ku je vien in de categorie Godfrey of Bouillon van Wikimedia Commons.