Sur' Kivi

Sur' Kivi
Большой Камень

Lidnanznam	Flag
Valdkund	Venäma
Eläjiden lugu (2023)	40,448 ristitud
Pind	119,82 km²
Pämez'	Rustäm Abušajev (viluku 2022—)
Telefonkod	+7−42 335-xx-xxx
Avtokod	25, 125
Aigvö	UTC+10 (MSK+7)

Sur' Kivi (ven.: Большой Камень [bɐlʲˈʂoj ˈkamʲɪnʲ]) om Venäman lidn da lidnümbrik Merenrandaližen randan suves. Vhesai 2015 se oli sauptud lidnaks.

Eländpunktan aluz om pandud vl 1947 kuti UNR-261-sauvomine (ven.: Стройка УНР-261), atomlaivoiden tegim radaškanzi vn 1954 3. päiväl tal'vkud. Vspäi 1956 kätihe radnikžiloks i nimitihe nügüdläižikš sijaližen merikaran mödhe. Vl 1963 poukahtihe järedad kived (kall' 15 metrhasai kortte) merikaran randal sauvomha tegimen cehad. Radnikžilo sai lidnan statusad vl 1989.

Sur' Kivi-lidn šingotase vedenalaižiden laivoiden kohendusen i civiližen laivansauvomižen «Tähtaz»-tegimel (ven.: «Звезда»), sömtegimišton edheotandoil (kalan püdon da ümbriradmižen laivišt, leibänkombinat), mugažo pästtas punümbriradajad mašiništod, seifid da meblid tegimel.

Lidn sijadase Japonijan meren Ussuriiskan lahten randal, 48 m ü.m.t. keskmäižel korktusel. Sijaline Sur' Kivi-merikar om kaitud hüvin erazvuiččid tulleid vaste, se om 12 m süvütte, randanpird koume kilometrad.

Matkad Vladivostokhasai om 20 km päivlaskmha orhal lahten kal't, 110 km avtotedme Artöm-lidnan kal't vai 105 km raudtedme. Lähembaine lidn om Fokino 25 km suvipäivnouzmha avtotedme. Nevondkundaližen aigan ehtatim ühtenzoiti lidnad Vladivostokanke.

Petrovk-žilo (ven.: село Петровка, 977 rist. vl 2010) i Suhodol-žilo (ven.: село Суходол, 301 rist. vl 2010) mülüdas lidnümbrikho Suren Kiven ližaks. Lidnümbrikon pind — 119,82 km².

Lidnümbrikon pämez' om sen Administracijan pämez'. Edeližed lidnan pämehed oma Aleksandr Andrühin (viluku 2018 — viluku 2022), Väčeslav Moskajev (edel vn 2018 vilukud). Lidnümbrikon Duman ezimez' om Aleksei Kuznecov vn 2017 redukuspäi.

Vn 2010 Venäman rahvahanlugemižen mödhe lidnan eläjiden lugu oli 39 257 ristitud, lidnümbrikon — 40 535 ristitud. Vl 2017 kaik 38 493 ristitud elihe lidnas i 39 739 ristitud kaikes lidnümbrikos. Kaikiš suremb lidnan ristitišt oli 65 621 eläjad vl 1989.

Ortodoksižen hristanuskondan koume pühäpertid^[1] oma saudud lidnas: ph. Mikulai-čudonsädajan jumalanpert' (2007), Raštvoiden jumalanpert' (1999−2003), ph. Petr-apostolan päjumalanpert' (2010−2022).

Edahaižen Päivnouzmman laivansauvomižen kolledž^[2] om lidnan professionaližen opendusen aluzkundaks.

• 
  K-434-VA-laivan hat (2015)
• 
  K-419 Kuzbass-VA-laiv Edahaižen Päivnouzman «Zvezda»-tegimen dokas (2015, Tähtaz)
• 
  Edahaižen Päivnouzman «Zvezda»-tegimen ratud kuva (2010)
• 
  Petrovk-raudtestancii vl 2014

1. ↑ Suren Kiven pühäpertid sobory.ru-saital. (ven.)
2. ↑ Edahaižen Päivnouzmman laivansauvomižen kolledžan sait (dvssk-bk.ru). (ven.)

• Suren Kiven lidnümbrikon tobmuden sait (bkamen.gosuslugi.ru). (ven.)
• Lidnan informacine sait (bkamen.info). (ven.)

Sur' Kivi Vikiaitas