Alaudinsk

Alaudinsk
Нижнеудинск
Lidnanznam;	Flag;
Valdkund	Venäma
Eläjiden lugu (2021)	29,995 ristitud
Pind	75 km²
Pämez'	Jurii Maskajev; (reduku 2022—)
Telefonkod	+7−39 557-xx-xxx
Avtokod	38, 85, 138
Aigvö	UTC+8 (MSK+5)

Alaudinsk (ven.: Нижнеу́динск, burät.: Доодо-Үдэ хото) om Venäman lidn da lidnankund Irkutskan agjan päivlaskmas. Se om Alaudinskan rajonan administrativine keskuz, mülüb rajonha vspäi 2010.

Istorii

Eländpunktan aluz om pandud Elisei Tümencev-atamanan ohjandusel kuti Pokrovskii-lidneihut (ven.: Покровский городок) tal'vdundan sijaks vl 1648. Nimitihe Udinskii-lidnusudeks (ven.: Удинский острожек) vl 1649. Alaudinsk sai makundan lidnan statusad vl 1783, nimitihe erištamha Üläudinskaspäi. Vspäi 1899 Alaudinsk-raudtestancii i depo ratas Transsibal.

Alaudinsk šingotase loštkiven ümbriradmižen fabrikal^[1], sömtegimišton edheotandoil (Novosibirskan Konditerižen «Sibir'»-fabrikan filial, oluden edheotand), sauvondmaterialiden sarakol.

Geografijan andmused

Lidn sijadase Ud-jogen randoil (ven.: Уда, Angar-jogen hurapol'ne bassein), 420 m ü.m.t. keskmäižel korktusel. Matkad Irkutskhasai om 506 km suvipäivnouzmha. Lähembaižed lidnad oma Tulun 107 km päivnouzmha-suvipäivnouzmha orhal, 117 km avtotel vai Transsibal, i Alzamai 76 km pohjoižhe orhal, 91 km avtotedme vai Transsibadme.

Klimat om terav kontinentaline. Voden keskmäine lämuz om −0,4 C°, kezakun-elokun +15..+17,9 C°, tal'vkun-uhokun −16,6..−20,6 C°. Ekstremumad oma −49,7 C° (viluku, tal'vku) i +36,4 C° (kezaku, eloku). Kezaaigan minimum om −4,5 C° (kezaku), tal'vaigan maksimum om +12,9 (uhoku). Voib panda halad kezaaigan miččel taht kul. Paneb sadegid 410 mm vodes, enamba heinkus-elokus (89..90 mm kus), vähemba kül'mkus-keväz'kus (7..14 mm kus).

Tobmuz

Alaudinsk om lidnankundan üks'jäižeks eländpunktaks.

Edeline lidnankundan pämez' (Administracijan pämez') om Aleksandr Putov (keväz'ku 2012 — reduku 2022). Lidnan Duman ezimez' om Jelena Jabločkina vn 2022 redukuspäi, edeline om Dmitrii Averjanov.

Eläjad

Vn 2010 Venäman rahvahanlugemižen mödhe lidnan eläjiden lugu oli 36 999 ristitud. Kaik 33 954 eläjad oli lidnas vl 2017. Kaikiš suremb lidnan ristitišt oli 44 tuhad eläjid vll 1992−1996.

Ortodoksižen hristanuskondan puine ph. Mikulai-čudonsädajan jumalanpert'^[2] om letud vll 1907−1908. Sündun Voznesenjan koume pühäpertid oma kadonuded: päjumalanpert', jumalanpert', časoun'.

Alaudinskan raudtetransportan tehnikum^[3] i medškol^[4] oma lidnan professionaližen opendusen aluzkundoikš.

Galerei

Riškotamižkomitetan sauvuz (2015)
Ph. Mikulai-čudonsädajan jumalanpert', vn 2013 nägu
«Jermak»-torguindkeskuz federaliženno «Sibir'»-trassanno vl 2015
Avtomotodrom vl 2010
Alaudinsk-päraudtestancijan sauvuz vl 2012

Homaičendad

↑ Alaudinskan loštkiven fabrikan sait (nmf.narod.ru). (ven.) (angl.)
↑ Nižneudinskan pühäpertid sobory.ru-saital. (ven.)
↑ Alaudinskan raudtetransportan tehnikuman sait (ntgtio.ru). (ven.)
↑ Alaudinskan medškolan sait (nmu38.ru). (ven.)

Irdkosketused

Alaudinskan municipaližen ühtnikan oficialine sait (n-udinsk.ru). (ven.)

Alaudinsk Vikiaitas

	Irkutskan agjan lidnad
	Alaudinsk \| Alzamai \| Angarsk \| Baikal'sk \| Birüsinsk \| Bodaibo \| Bratsk \| Čerömhovo \| Irkutsk \| Kirensk \| Sajansk \| Sibirin Usol'je \| Slüdänk \| Svirsk \| Šelehov \| Zim \| Železnogorsk Ilimal \| Taišet \| Tulun \| Ust'-Ilimsk \| Ust'-Kut \| Vihorevk

[1] Alaudinskan loštkiven fabrikan sait (nmf.narod.ru). (ven.) (angl.)

[2] Nižneudinskan pühäpertid sobory.ru-saital. (ven.)

[3] Alaudinskan raudtetransportan tehnikuman sait (ntgtio.ru). (ven.)

[4] Alaudinskan medškolan sait (nmu38.ru). (ven.)

[1]