Rngsux Paru

Seuxal balay bsiyaq bi qmuyux paru ni mrana paru ka gsilung bitaq wada bungun gsilung ka ppngpung dgiyaq. Kiya ni kana seejiq o qduriq musa mssli ququy dgiyaq Klbiyun. Mssli empprngaw ka dhiya﹐spuhay ta ka gsilung nii, kiya do mha meelih ka qsiya da, mkksa. Kiya do ngalun dha ka 2 hiyi tghmut bi risaw ni wauwa. psaun dha bluhing ka 2 hiyi nii wada dha psaun gsilung. Embrinah miyah dxgal ka dhiya, ida ini keelih ni rinah mrana ka qsiya. Kiya do dseejiq ga, marah duri empprngaw “aji wah” braha ta gmaaw 1 mkla bi tmsamat ni ini smhmut malu bi risaw, 1 wauwa mkla bi tminun ni seejiq bi wauwa ka psaaw ta, mkksa. Kiya do wada dha psaun gsilung ka 2 hiyi nii﹐mowsa kmaraw sudu gaga smpuy pusu gsilung hiya. Yasa gaga htngayan sudu ka elug uuda gsilung. Ungat ka sudu niya do wada asi ksa “Wax” mtrawah ka gsilung ni paah siida wada meelih uri da. Wada msa “Wax” mhgut ka gsilung do kika hmici gmqguq、gmeayug dxgal ni maadgiyaq ni ayug﹐rklu ni yayung da. Miyah sapah duri ka dhiya ni taan dha ka rpun aji uri o sapah dha o nii htngyan qsurux kana. Kiya do sqada dha ka qsurux ni ida ki napa dha ka uqun mnsngari o psaun dha ruwan rpun ni bunga napa dha o saan dha rmbung ptangug. Lala ka tangug wahir dha do prnaun dha mhuma. Pnaah saw nii lala bi ka gnhiyi bunga dha do niqan ka uqun dha, ini keuray da.

• 金清山. (2011). Wikipedia 維基百科 族語詞條試寫─原住民族語詞條 2011作品集. 教育部.