Adele

Adele
Persovntiäđuh
Šoddâm	vyesimáánu 5. peeivi 1988 (ahe 36)
Šoddâmsaje	Tottenham, Lontoo, Eŋland
Aalmugjeessânvuotâ	eŋlandlâš
Musikkár
Lávlumkielah	eŋgâlâskielâ
Aktiivlâžžân	2006–
Genreh	soul, blues, pop
Čuojânâsah	kiitaar, piano, basso, ruumbuh
Skiärrufinnodâh	XL Columbia
Lasetiäđuh
Päikkisijđo	adele.com

Adele Laurie Blue Adkins ađai Adele (š. vyesimáánu 5. peeivi 1988, Tottenham, Lontoo, Eŋland) lii eŋlandlâš lávloo-laavlârähtee. Suu albumeh láá vuobdum paijeel 120 miljovn pittád maailmvijđosávt. Sun lii vuáittám ohtsis 15 Grammy-palhâšumed já oovce BRIT-palhâšumed.

Adele Laurie Blue Adkins šoodâi vyesimáánu 5. peeivi 1988 Lontoo Tottenhamist. Suu vaanhimeh lává eŋlandlâš Penny Adkins já waleslâš Marc Evans. Eeči vuolgij ko Adele lâi kyevtihásâš, já enni šoddâdij Adele ohtuu. Adele lávluškuođij neelji-ihásâžžân. Ive 1997 9-ihásâš Adele varrij enijnis Brightonân. Suoi maccáin Lontoon ive 1999. Adele čaalij lavluid jo nuorrân. Sun juuđij BRIT School -taaiđâškoovlâ já valmâštui vyesimáánust 2006.

18-ihásâš Adele raahtij sopâmuš XL-skiärrufinnoduvváin čohčâmáánust 2006. Suu vuossâmuš single Hometown Glory almostui ive 2007 loopâst. Siämmáá ive sun finnij vuossâmuu Brit-palhâšume. Nubbe single Chasing Pavements almostui uđđâivemáánust 2008 já pajanij listo njunošân Ovtâstum kunâgâskoddeest. Kyehti oho maŋeláá almostum skiärru 19 lâi meiddei miänástus. Kuovâmáánust 2009 Adele vuoitij pyeremuu uđđâ artist Grammy-palhâšume.

Adele nubbe skiärru almostui ive 2011 aalgâst. Album lâi maailmvijđosâš miänástus já tot pajanij listo njunošân 17 Euroop staatâst sehe Ovtâstum staatâin. Album vuobdui ive 2011 ääigi 15 miljovn pittád. Roovvâdmáánu 2021 räi tot lii vuobdum paijeel 47 miljovn pittád^[1]. Skiärru finnij ive pyeremuu album palhâšume kuovâmáánu 2012 Grammy-gaalast, mast Adele vuoitij ohtsis kuttâ Grammy-palhâšume. Siämmáá ive BRIT Awards -gaalast sun finnij ive nissoonartist já 21 ive pyeremuu album palhâšume. Skammâmáánust 2011 sun vuoitij kulmâ American Music Award -palhâšume. Adele raahtij ive 2012 almostum James Bond -elleekove 007 Skyfall tubdâldâhpitá oovtâst Paul Epwortháin. Ive 2013 sun vuoitij pyeremuu lavluu Oscar- já Grammy-palhâšuumijd Skyfall-pittáin.

Adele kuálmád skiärru almostui skammâmáánust 2015 já tot lâi tállán stuorrâ miänástus. Album vuossâmuš single Hello pajanij listo njunošân maaŋgâin enâmijn. Album almostum maŋa Adele lávdástij vijđáht Euroopist, Ovtâstum staatâin, Australiast já Uđđâ-Seelandist. Ive 2017 sun finnij vittâ Grammy-palhâšume, ovdâmerkkân ive pyeremuu album já pyeremuu pop-album palhâšuumijd sehe pyeremuu pitá palhâšume Hello-pittáin.

Adele niäljád album almostum maŋanui koronapandemia tiet. Vuossâmuš single Easy on Me almostui ive 2021 roovvâdmáánust já album 30 skammâmáánust. Album kieđâvuš Adele näimi-iäránem. Tot pajanij tállán listo njunošân maailmvijđosávt.

• 19 (2008)
• 21 (2011)
• 25 (2015)
• 30 (2021)

Wikimedia Commonsist láá koveh teikkâ eres tiätuvuárháh fáádást Adele.

Taat artikkâl teikkâ uási tast lii jurgâlum teikkâ toos láá uccum tiäđuh ereskielâlâš Wikipedia artikkâlist.
Algâalgâliih artikkâleh: fi:Adele & en:Adele