Salvatore Niffoi

Salvatore Niffoi (mutidu Carrone) (Orane, 1950) est unu iscritore.

S'est laureadu in lìteras in Roma in su 1976 cun d'una tesi subra de sa poesia dialetale sarda (sos relatores fiant Carlo Salinari e Tullio de Mauro). Como insinnat matèrias literàrias in sas iscolas mèdias de Orane.

At esordidu in su 1997 cun su romanzu Collodoro; a pustis, at publicadu Il viaggio degli inganni in su 1999, Il postino di Piracherfa (in su 2000, custu bortadu fintzas in frantzesu) e Cristolu (2001). S'ùrtima òpera sua est La sesta ora publicada, che a sas àteras, dae sa domo de imprenta Il Maestrale. Cun Adelphi at torradu a publicare, rinnovadu, La leggenda di Redenta Tiria.

In sos romanzos suos impreat unu limbàzu espressivu meda. Resessit a trasmiter a chie leghet, un'idea de sa Sardinna chi non est petzi bella, ma finas areste e misteriosa. Iscriet in italianu, però in sos romanzos suos impreat finas paràulas sardas e sardismos sintàticos. Carchi òpera est istada presentada finas in teatru (mescamente dae Bocheteatro e Cada die teatro) comente Cristolu e àteros contos (Il maestro pazzo e La balente).