Salvatore Cambosu

Salvatore Cambosu (Oroteddi, 1895 - Nùgoro, 1962) est istadu unu iscritore sardu.

At fatu sos primos istùdios in Nùgoro, in ue at leadu sa maturidade clàssica e su diploma de maistru de iscola elementare. At istudiadu in sas Universidades de Pàdua e Roma sena mai si laureare. Torradu a Sardigna at insinnadu in unas cantas biddas de s'ìsula, a pustis si nche tramudare pro semper a Casteddu.

Giornalista produtivu e impinnadu, osservadore atentu de sa realidade sarda, at collaboradu cun giornales sardos e italianos comente "Il Politecnico", "Il mondo", "Nord e Sud", "Ichnusa", "L'Unione Sarda".

Iscritore sensìbile, connoschiat bene sas traditziones de sa terra sua e la contat in un'època de gherra intre sa cunservatzione de su tempus coladu e su andòngiu chirru a su tempus venidore.

S'òpera sua de importu prus mannu est Miele amaro (1954) definida dae sos intelletuales sardos de su tempus, comente "su fatu prus importante de sa crònaca literària sarda de sos ùrtimos deghe annos" (A. Pigliaru), "unu bastimentu de ispètzias e de paristòrias, de contos, de mele e de poesia" (G. Pinna), etc.

Si podent ammentare finas àteras òperas de Cambosu, comente Lo Zufolo de su 1932, Il carro publicadu a puntadas in su 1934 in L'Unione Sarda, Una stagione a Orolai sinnaladu dae sa giuria in su prèmiu Grazia Deledda de su 1954.

Mameli G. , Bua M., Lo scrittore nascosto. Il meglio di Salvatore Cambosu, Edizioni Della Torre