Meta-fintzione

Custu artìculu est iscritu cun sa grafia Limba Sarda Comuna. Abbàida sas àteras bariedades gràficas:

campidanesu · logudoresu · nugoresu

Sa meta-fintzione est una forma de fintzione chi ponet ènfasi in s'artifitzialidade sua, in manera de ammentare totora a is letores o a is ispetadores chi sunt leghende o bidende un'òpera de fantasia.

In àteros faeddos, sa meta-fintzione est un'òpera de fantasia cun cussèntzia de sese in contu de su limbàgiu, de sa forma literària e de sa narratzione. Custas òperas atirant in manera direta o indireta s'atentzione a subra de su status issoro de produtos artifitziales.^[1] Sa meta-fintzione est a s'ispissu impreada comente a forma de parodia, o comente a trastu pro iscutinare is cunventziones literàrias e esplorare su raportu intre literadura e realidade, o intre vida e arte.^[2]

Sa meta-fintzione disafiat e ponet in duda su printzìpiu de sa suspensione de s'incredulidade, chi a su sòlitu istat in sa base de is òperas de fantasia.

Mancari sa meta-fintzione siat a fitianu assotziada a sa literadura post-moderna chi s'est isvilupada a metade de su sèculu XX, si nde podet agatare s'impreu in òperas de narrativa meda prus antigas, comente a The Canterbury Tales de Geoffrey Chaucer (1387), Don Chisciotte de sa Mancia de Miguel de Cervantes (1605), Tristram Shandy de Laurence Sterne (1759), Vanity Fair: A Novel Without a Hero de William Makepeace Thackeray (1847), gasi comente in òperas prus reghentes comente a The Hitchhiker's Guide to the Galaxy de Douglas Adams (1979), House of Leaves de Mark Z. Danielewski (2000) e Me tous anthropous apo ti gefyra de Dimitris Lyacos (2018). In s'àmbitu de sa literadura pro piseddos, Claude Ponti impreat a s'ispissu custu isbrigu narrativu.^[3]

1. ↑ (EN) Patricia Waugh, Metafiction – The Theory and Practice of Self-Conscious Fiction, London, New York, Routledge, 1984, p. 2.
2. ↑ (EN) Rüdiger Imhof, Contemporary Metafiction – A Poetological Study of Metafiction in English since 1939, Heidelberg, Carl Winter Universitätsverlag, 1986, p. 9.
3. ↑ (FR) Isabelle Artigues, L’éducation du lecteur à travers la figure de la métalepse chez Claude Ponti, in Loxias. URL consultadu su 12 austu 2024 (archiviadu dae s'url originale su 13 ghennàrgiu 2024).