Castelle feudale de Palascianidde

Castelle feudale de Palascianidde
Ubicazione
Regione	Pugghie
Cetate	Palascianidde
'Nderizze	Vico Conte
Coordinate	40°36′48.58″N 16°58′26.26″E40°36′48.58″N, 16°58′26.26″E
'Mbormaziune generale
Tipe	Castelle
'Mbormaziune militare
Tutela	Patrimonie culturale
vôsce de architetture militare presende sus'a Uicchipèdie
Cange le date sus Uicchidate · Manuale

'U castelle feudale de Palascianidde nasce sus a 'u punde cchiù ierte d'u paese, in posizione strateggeche pe condrollà 'u territorie atturne.

Da quedde altezze se pò osservà 'u territorie a 360 grade 'nzigne a le mundagne d'a Sila (Calavrie).

Esiste 'nu rapporte de condinuità 'mbrà le case scavate jndr'à gravine e 'u castelle, 'a quale costruzione accumenzate probbabbilmende jndr'à prima metà d'u XVI sechele a opere d'a famigghie Domini Roberti pa difese d'u casale de Palascianidde, spicciate, ma non combletamende, jndr'à 'u XVIII sechele sotte a 'u dominie de le Caracciolo.

'U castelle, ca presende 'na piande qudrangolare bella grosse cu 'nu granne cortile cendrale, munite de quattre torrione a le angole de fore, tène tutte le caratteristeche strutturale difensive de le fortilizie d'u XVI sechele.

L'ingresse de osce a die d'u castelle se iacchie sus a 'u late sud, invece origgenariamende s'acchiave a ovest e ve se traseve ausanne 'nu ponde levatoie ca ha state sostituite da 'nu ponde in murature a doje arche.

Jndr'à 'u piane inferiore se iacchiane le majazzine e le stalle invece jndr'à quidde superiore se iacchiane le locale ca avenèvene ausate da abitazione d'u feudatarie; in corrispondenze d'u 'ngresse, a 'u termine d'a scalinate ca porte a 'u piane superiore se iacchie 'nu salone larie pe riunione de rappresendanze cu volte a vele, mandenute da arche absidale, sus 'a quale stè appettate 'u stemme gentilizie.

Jndr'à 'na stanze a 'u piane terre ste 'na botole ca porte a 'nu passagge segrete ca iesse jndr'à gravine de Palascianidde.

'U Castelle, sus 'a vanne ierte, jè merlate tutte atturne cu 'a presenze de 'nu sacche de feritoie.

Jndr'à 'u 1874 'u vecchie 'ngresse avenìe achiuse pe ricevarne 'na cappelle in onore d'a Vergine de le sette dulure proggettate da l'architette Gabriele Califano, sus 'a commissione d'u conde Andonie Stella Caracciolo. 'A Cappelle ha state date cu ause perpetue da 'u Conde Caracciolo a 'a Confraternite d'a 'Ddulurate.

Le caratteristeche probbie d'u fortilizie, costruite cioè seconne le canone difensive affermatese duranne 'u regne de Carlo V, se rescondrane jndr'à 'u Castelle de Palascianidde: "'U comblesse difensive, ca rappresende tipologgecamende 'nu termine de transizione 'mbrà 'u castelle e 'a residenze fortificate, avenìe costruite in mazzarre. Ave chiande quadrangolare e cortile cendrale de forme uguale. A le quattre spigole tène le torrione quadrangolare. 'Nu tore marcapiane, accumbagnate da 'n'ornamendazione sottile, l'avvrazze tutte 'ndorne dividenne a 'u levèlle d'u piane, 'a vanna vasce appene scarpate da 'a superiore a parete verticale. 'U castelle, monumende nazionale, da 'u 1924 jè cercunnate da 'nu profonne fossate traverse da 'u quale ste traseve da 'nu ponde levatoie".

Angore 'nu stemme jè murate a 'u cendre d'a volte d'u stesse scalone.

Apprisse 'u 1678, le Caracciolo, marchise de Sanderamo e Cervinara, le quale avèrene accattate 'u feude de Palascianidde da 'a famigghie De Ribera, condinuarene le fatìe de combletamende ca, non g'avenèrene spicciate purcé 'a torre ca se iacchie a Nord-Ovest jè angore osce a die ingombiute.

'A Chiesere piccenne, jndr'à quale se stipe 'na statue de preggevole fatutre, de màne scanusciute, de Criste Muèrte, tène 'na strutture a rettangole e se sveluppe a 'na sola navate de 8 metre de lunghezze e 4,5 metre de larghezze.

L'uneche altare, in marme policrome, se iacchie jndr'à l'abside semicircolare recavate 'nvadenne 'u cortile 'nderne d'u Castelle. A 'u 'nderne, sus 'a porte d'ingresse, a l'altezze de l'ammezzate ha state recavate 'na tribbune jndr'à quale se tràse ausanne 'na scale ca scenne da 'u prime piane. 'A tribbune, probbabbilmende, dave 'a possibilità a le serve, viste ca 'a scale iesse jndr'à cucine, de partecipà a le rite releggiose.

Jè tradizione andiche ca, da sta Chiesere, 'u venerdìe Sande ave inizie 'a prugessione de le Mistere. Apprisse 'u cangiamende, jndr'à facciate Sud d'u Castelle avenìe recavate 'u 'ngresse sus a 'u quale ha state murate 'u stemme de le Caracciolo, megghie Rocco Stella-Caracciolo.

'U Castelle, ca da 'u 1979 face parte d'u patrimonie d'u Comune de Palascianidde pe averle accattate, ha state javetate da 'u Conde Andonie Rocco Stella nate Caracciolo de Sanderamo 'nzigne a 'u 1950, anne d'a morta soje.

'U Fortilizie, osce a die jè inderessate da fatìe de restrutturazione e consolidamende, comungue, ce se face 'nu combronde 'mbrà 'a descrizione d'u Castelle fatte jndr'à 'u 1676 e cumme ste osce a die, abbesogne dicere ca jidde stipe le linee sevre de 'na residenze de cambagne e jndr'à 'u stesse tiembe 'nu fortilizie ca ninde dè a leziosaggine o barocchisme.

'U comblesse difensive ca rappresende tipologgecamende 'nu termine de transizione 'mbrà 'u castelle e 'a residenze fortificate, jè costruite in mazzere, ave chiande quadrangolare e cortile cendrale de figure uguale.

Se sviluppe sus a 'na superfici comblessive de 1.640 m². 'U cortile cendrale ave late de metre 13,20 x 14,20.

A le quattre spigole stonne le torrione quadrangolare de dimenziune picche diverse 'mbrà de lore.

'Nu tore marcapiane, accumbagnate da 'nu ornamende sottile, l'avvrazze tutte atturne dividenne, a 'u levèlle d'u prime piane, 'a vanna vasce appene scarpate da 'a superiore a parete verticale. 'Nu cornicione condinue a archette 'u corone a 'a sommità.

'U 'ngresse de osce a die 'du Castelle se iacchie sus a 'u late Sud d'u stesse invece, origgenariamende, se acchiave sus a 'u late Ovest e ve se traseve ausanne 'nu ponde levatoie sus a 'nu fossate, angore osce a die esistende, ca costegge 'u 'ndere late Ovest e vanne d'u late Nord. 'U ponde levatoie ha state sostituite da 'nu ponde in urature a doje arche.

'U vecchie 'ngresse ha state achiuse e ave date spazie a 'na cappelle, angore osce a die esistende, proggettate jndr'à 'u 1874 da l'architette Gabriele Califano.

Sus a 'u 'ngresse prengepale, ha state ingastonate 'u stemme gendilizie de le conde Stella-Caracciolo rappresendate da 'nu scude, supranate da 'na corone, fatiate a vascerilieve a 'u 'nderne d'u quale, jè raffigurate 'nu lione rampante ca uarde a sinistre e 'na stelle a uette punde.

Trasenne jndr'à 'u 'ngresse d'apprime se arrive jndr'à 'u cortile addò affacciane tutte le 'ngresse de le ambiende ca se iacchiane a piane terre. Sus a 'u late Nord, a le spalle d'u Castelle stè 'nu locale (certamende de epoche successive a 'a costruzione d'u castelle) ca tène 'a scale da fore in murature ca porte a 'u prime piane; se tratte de 'na scale secondarie purcé pe 'nghianà a 'u prime piane stè quedda prengepàle assaije larie addò se passe direttamende da 'u cortile e se iacchie immediatamende a sinistre d'u 'ngresse stesee.

Le mure perimetrale, de spessore rilevande (metre 2,20) sonde a sacche cu paraminde in conce de tufe de granne dimenziune (cm. 50 X 100) e nuclèe cendrale in scapole de tufe e petre senza forme cu malte de cauce e terra rosse.

Le coperture de tutte le ambiende d'u piane terre onne state realizzate cu volte a botte: Le aperture jndr'à le mure, sie ca sò finestre o porte, onne state fatte cu piattabande in conce de tufe, 'u pavimende d'u cortile jè fatte in basolate calcarèe.

Jndr'à l'ambiende javetate 'u pavimende jè in cerameche invece jndr'à l'otre ambiende jè realizzate cu mattune in terracotte.

Le parete de fore presendane le murature de conce de tufe a facce viste, invece chidde inderne sò prive de intonache e viangate a latte de cauce.

A destre d'u 'ngresse, cu accesse dirette da 'u cortile, se iacchie 'nu locale de granne dimenziune (m 8,10 X 14,20) destinate a ricovere de le cavaddere; 'nfatte, jndr'à 'u 'nderne sue, stonne angore tre mangiatoie.

'Nghiananne 'a scale larie prengepàle se iacche, in corrispondenze d'u 'ngresse d'u piane superiore, 'nu salone larie assaije de rappresendanze (m 8 X 14).

'U salone, ca tène 'na strutture orizzondale de coperture jè 'na volte a sckife, jè ornate da 'na serie de lunette ca 'u coronane tutte atturne.

Jè illuminate da cinghe finestre, de le quale doje se affacciane sus a 'u cortile, doje sus a 'u late sud e une sus a 'u late est. Da jidde se pò trasè sie jndr'à l'ambiende ca se iacchiane sus a 'u late est sie jndr'à 'u torrione ca se iacchie a sud-est, sie jndr'à l'uneche scale ca porte sus a 'u piane de coperture e, spiccianne, jndr'à scale ca porte jndr'à 'nu locale ca se iacchie a 'u seconde piane d'u torrione sud-est. 'A maggior parte de le ambiende d'u prime piane presendane 'na coperture fatte cu volte a sckife.

Sus a 'u late ovest stonne quattre ambiende ca presendane de le volte a vele, mendre le locale ca se iacchiane jndr'à le torrione presendane de le volte a botte. Jndr'à une de chiste locale stè 'na scale piccenne ca scenne jndr'à cappelle de sotte.

Doje locale d'u prime piane onne state fatte, in epoche securamende successive a quedde de costruzione d'u castelle, doje soppalche a le quale se tràse ausanne doje scale in murature stritte assaije.

Le mure sò a sacche cu paraminde de fore in conge de tufe e nuclèe cendrale in scapole de tufe e petre calcarèe senza forme legate cu malte de cauce e terra rosse.

Sus a 'u tore marcapiane ca segne l'elemende de separazione d'u piane terre da le otre piane, se 'ndruche ca le filare de conge de tufe presendane doje diverse spessore e precisamente stonne sei filare de conge d'u spessore de 50 cm. 'Nguèdde a 'u tore (stu spessore jè uguale a quidde de le filare de sotte) mendre le filare rumanende sò d'u spessore de 30 cm.

Tutte quiste face penzà ca 'u castelle avenìe 'nzippate in epoche differende, pure ce s'ha notate ca le quattre pitte cca affacciane sus a 'u cortile presendane filare de conge de spessore costande de 30 cm.

Le aperture de le mure, sie ca sò finestre sie ca sò porte onne state fatte cu piattabande in conge de tufe o petre da tagghie.

Le paveminde de le stanze sò soprattutte in cemende pressate. Le parete de fore presendane 'a murature de conge de tufe a facce viste. Le parete de jndre onne state 'ndonacate e vianghite a latte de cauce. Tutte le finestre tènene 'na grate de firre. 'A quote de calpestìe de le stanze ca se iacchiane a prime piane jè de 4,80 metre.

'U seconde piane se sviluppe sùle sus a 'u late ovest d'u Castelle ca affacce sus 'a gravine. Se tràse ausanne 'na scale piccenne e pericolose in murature ca se iacchie a 'u 'ngresse d'u prime piane.

Apprime de arrevà a 'u seconde piane se arrive jndr'à 'na stanze ca se iacchie a levèlle de mmienze (quote de calpestìe 7,60 metre) 'a quale presende 'na finestre ca affacce sus a 'u late sud d'u Castelle. 'Nu corridoie luènghe e strette dè 'a possibbilità de trasè jndr'à le quattre stanze d'u seconde piane divise 'mbrà de lore da tramezzature de 30 cm.

Le tre finestre d'u corridoie, ca tènene le piattabande onne state fatte in conge de tufe, affacciane sus a 'u cortile 'nderne, mendre le finestre de le stanze se iacchiane sus a 'u late ovest. Le chiusure orizzondale de coperture sò caratterizzate da volte a botte, mendre 'u pavimende jè in mattune de cemende pressate.

'U seconde piane rappresende 'nu cuèrpe aggiunde costruite in epoche securamende successive a 'a costruzione d'u Castelle.