Missiun

Questa pagina è scritta en puter.

Missiun deriva dal pled latin missio (que voul dir mischiun (sün basa d'üna incumbenza)) e significha la via da l'evangeli da Gesu Crist tar ils pövels dal muond inter.

Gesu svess do a sieus discipuls il cumand da missiuner, da fer dvanter discipuls e da battager sül nom dal Dieu da triunited. Quist cumand daiva'l zieva ch'el s'ho fat palais scu il resüsto (tenor evangeli seguond Matteus, chapitel 28).

Missiun d'eira dal prüm davent ün fenomen dal cristianissem in tuottas sias fuormas e confessiuns. Paulus da Tarsus faiva in sieu uffizi scu apostel trais viedis da missiun per funder nouvas raspedas e per sustgnair quellas chi existaivan già.

Dal 6evel fin al 8evel tschientiner as vezzaiva ün'activited missiunarica in Irlanda ed in Ingialterra (la missiun celtica inglaisa).

Intuorn la vouta dal millenni missiunaiva la baselgia ortodoxa da Bizanz in Europa da l'ost. In seguit dvantaivan ils pövels slavics cristiauns.

La missiun da la baselgia catolica romauna as collia impustüt culs gesuits (societed da Gesu).

I'l temp modern tampriv as sviluppaiva tres l'influenza dal pietissem üna missiun intensiva evangelica, traunter oter dals Herrnhuters (cumünaunza da frers) suot il mneder spirituel Nikolaus Ludwig von Zinzendorf.

Hozindi collavureschan las baselgias indigenas e las societeds da missiun europeicas in möd da partenedi.

Ün cas speciel es il svilup da la missiun interiura al cumanzamaint dal 19evel tschientiner. Cu as drizza il sguard süls stedis infra üna naziun giâ cristianiseda.

• Litteratura davart l'incletta cristiauna che cha missiun es