Thomas Edison

Thomas Alva Edison, nassù a j'11 ëd fërvé dël 1847, mòrt ai 18 d'otober dël 1931, a l'é stàit n'anventor american. Soa anvension pi avosà a l'é miraco la lampadin-a. Edison a l'ha ëdcò ël record për ël nùmer dij brevet: 1093.

Thomas Alva Edison a l'era nassù a Milan, ant l'Ohio. La famija a l'era peui trasferisse ant ël Michigan anté a l'ha ancaminà a andé a scòla, ma a l'avìa dovusse artiré a motiv ëd na maladìa. A dodes agn n'àutra maladìa a l'avìa falo vnì ciòrgn quase dël tut.

Antlora a l'avìa amparà ël Còdes Morse e a l'era dventà operador dël telégraf. A 16 agn a l'ha fàit soa prima anvension, un ripetidor automàtich.

Dël 1868, Edison a l'é andàit a travajé për la Western Union Company a Boston ant ël Massachusetts, sempe com operador telegràfich. Li a l'ha pijà ël prim brevet, për na màchina elétrica për le votassion. Peui Edison a l'é trasferisse a New York. Li, dël 1877, Edison a l'ha anventà ël fonògraf, la prima màchina ch'a podìa memorisé e arprodove ij son. Peui, dël 1879, Edison a l'ha anventà la lampadin-a.

Edison a l'era mariasse doe vire. Prima con Mary Stilwell dël 1871, mòrta dël 1884, don a l'avìa avù tre fij: Marion Estelle Edison, Thomas Alva Edison Jr. e William Leslie Edison.

Peui a l'é mariasse con Mina Miller e a l'ha avù dj'àutri tre fij: Madeleine Edison, Charles Edison e Theodore Miller Edison.