Weih

Wapen/Flagg	Koort
Basisdaten
Bundsland: Neddersassen Landkreis: Horborg Samtgemeen: Hanstää Gemeen: Hanstää
Inwahners:
Postleettall:	21271
Vörwahl:	04187
Geograafsche Laag:	Koordinaten:53° 17′ N, 9° 55′ O53° 17′ N, 9° 55′ O

Weih (hoochdüütsch Weihe) is en Oort in de Gemeen Hanstää (Samtgemeen Hanstää) in’n Landkreis Horborg, Neddersassen.

Weih liggt an dat rechte Över von de Seev. In’n Süüdwesten liggt dat Naturschuulrebeed Hangbornmoor bi Weih.

De Naveröörd sünd Lüll in’n Noorden, Wiedenhoff in’n Noordoosten, Hassel in’n Oosten, Höpen, Drumbargen un Diekshuus in’n Süüdoosten, Schierhoorn in’n Süden, Holm in’n Süüdwesten, Thälsdörp in’n Westen un Holm-Seppens un Seppens (mit de Seppenser Möhl) in’n Noordwesten.

Weih weer fröher blots en enkelten Hoff. Dat hüdige Gebüüd is in siene öllsten Delen von 1559. Dat weer en Kötner-Huus, later aver en Halvhoff.

Eerst in dat 20. Johrhunnert sünd in’n Noordoosten von’n Hoff Weih an de Grenz na Lüll un Wiedenhoff en Reeg Wahnhüüs boot worrn.

De Hoff Weih is von 2005 af an saneert worrn un warrt nu as Eventlocation bruukt. He is as Bodenkmaal schuult.

In de Franzosentied von 1810 bet 1814 hett de Oort to de Mairie Garlstörp in’n Kanton Garlstörp höört. Dat Rebeed hett in disse Tied 1810 to dat Königriek Westfalen un von 1811 bet 1814 to dat Franzöösche Kaiserriek ünner Napoleon höört.

De Oort hett vör 1852 to de Amtsvaagdie Garlstörp in dat Amt Winsen tohöört. In dat Johr is Weih denn Deel von dat Amt Solzhusen worrn, dat aver blots söven Johr bestahn hett. 1859 is dat wedder an dat Amt Winsen kamen. Na 1885 weer dat in’n Kreis Winsen un 1932 is dat Deel von’n Kreis Horborg worrn.

Weih hett to de Buurschop Schierhoorn un later to de Gemeen Schierhoorn höört. De Oort is an’n 1. Juli 1972 as Deel von de Gemeen Schierhoorn mit de Gemeenreform in Neddersassen an de Gemeen Hanstää kamen.

Weih is evangeelsch-luthersch präägt un höört to dat Kaspel von de Jakobi-Kark in Hanstää.

För de Kathoolschen is de St.-Petrus-Kark in Bookholt tostännig.

Dör Weih löppt de Kreisstraat 67, de in’n Noorden na Lüll an de K 83 geiht un in’n Süden in Schierhoorn an de K 55. De K 83 geiht in’n Noordoosten denn na Jesborg un an de Landsstraat 213 un in’n Noordwesten na Bookholt. De K 55 löppt in’n Oosten na Diekshuus un Hanstää an e L 213 un in’n Westen na Holm.

De nächsten Autobahnen sünd de A 1 un de A 7. De Opfohrt 42 Dibbersen op de A 1 liggt so twölv Kilometer in’n Noorden von Weih un de Opfohrt 39 Thieshoop op de A 7 twölv Kilometer in’n Oosten.

De nächste Bahnhoff is so bi fiev Kilometer wied weg in’n Süüdwesten de Bahnhoff Büsenbeekdaal an de Heidbahn. Von 1874 bet 1981 hett dat ok Personenverkehr op de Bahnlien Wittenbarg–Bookholt geven. De nächste Bahnhoff weer in disse Tied de Bahnhoff Jesborg fiev Kilometer in’n Noordoosten. Na’n Eersten Weltkrieg is tosätzlich de Bahnhoff Reindörp anleggt worrn, de denn blots noch veer Kilometer wied weg weer.

De Kinner ut Weih gaht na de Grundschool Hanstää.

De Schauspelerin Heidi Mahler is 1944 in Weih boren. Ehr Öllern harrn dor en Feernhuus.

1. ↑ Christoph Barthold Scharf: Statistisch-Topographische Samlungen zur genaueren Kentnis aller das Churfürstenthum Braunschweig-Lüneburg ausmachenden Provinzen. Meier, Bremen 1791, Sied 248
2. ↑ Curt Heinrich Conrad Friedrich Jansen: Statistisches Handbuch des Königreichs Hannover. Hannover 1824, Sied 646
3. ↑ Friedrich Wilhelm Harseim, Carl Schlüter: Statistisches Handbuch für das Königreich Hannover. Schlütersche Hoffbookdruckeree, Hannover 1848, Sied 104
4. ↑ Die Gemeinden und Gutsbezirke des Preussischen Staates und ihre Bevölkerung. Berlin 1873, Sied 134