Speed (Film)

Speed (op Platt so veel as „Tempo“) is en US-amerikaanschen Action-Speelfilm vun 1994. In dissen Film werr Jan de Bont (Kameramann bi Die Hard) to’n eersten mol Speelbaas.

To Anfang bringt Howard Payne in en Hoochhuus en’n Fohrstohl vull mit Börgen in sien Kontroll, den he afstörten laten will, wenn he nich op’n Slag 3 Millionen US-Dollar kriggt. Man de Bombenspezialisten Jack un Harry vun de Polizei künnt de Börgen retten un em de Tour vermasseln. Payne warrt binah faat kregen, aver allns sütt dorna ut, as wenn he sik sülvst in de Luft jagt.

Aver kotte Tiet later sleiht Payne wedder to, üm aftoreken. He jagt en Bus in de Luft un nimmt Kontakt op to Jack. Ditmol verlangt he 3,7 Millionen Dollar för en Lienenbus, in de he en Bomb verstecken hett. De Bomb is so präpareert, dat se hooch geiht, wenn de Bus langsomer fohrt as 50 Mielen in de Stünn (ungefäähr 80 km/h). De Fohrgäst dröfft nich ruthollt warrn. Jack kann nich verhinnern, dat de Bomb scharp maakt warrt, aver he kriggt klor, in den Bus rintokamen.

As de Busfohrer anschaten warrt, mutt Annie, een vun de Fohrgäst, de ehr’n Föhrerschien afgeven müüst vun wegen, dat se to snell föhrt is, an sien Steed an’t Stüer gahn un den Bus snell noog hollen. In’n dichten Verkehr vun Los Angeles mutt de Bus de Snelligkeit hollen un Jack en Weg finnen, de Börgen ahn Schaden to retten. He finnt rut, dat Payne den Bus över en Videoanlaag överwacht. He finnt en Weg, den Bombenlegger to tüüschen. He lett Annie na’n Flaaghaven föhren, wo de Bus jümmers in’n Kreis föhren kann, bit all Börgen ruthollt warrn künnt.

Aver Payne hett noch en letzten Trump in’n Arm. He lockt Annie, verkleedt as Polizist, in en U-Bahn. Jack hollt jem in un schapt rechttietig, den Tog to kriegen, woneem de beiden binnen sünd. Op dat Dack vun’n Tog kummt dat to’n Kamp twüschen Jack un Payne, wobi Payne starvt. De Tog föhrt mit gresig Snelligkeit wieter un klabastert opletzt över en Ramp bit an de Bavenflach, wo he to’n Stahn kummt. Annie un Jack överleevt.

De Film is 1994 mit twee Oscars in de Kategorien Best Toon un Tooneffekt uttekend woorn. Bito weer he nomineert de Kategorie Best Snitt. Bito hett de Film noch 12 wietere Utteken kregen, dorünner:

• den Saturn Award för Sandra Bullock as Best Schauspelerin
• BAFTA Awards in de Kategorien Best Snitt un Best Toon
• den BMI Film Music Award för de Best Filmmusik
• de Golden Lienwand
• den MTV Movie Award in fief Kategorien

• Speed in de Internet Movie Database (engelsch)