Ox

Wapen/Flagg	Koort
Basisdaten
Bundsland: Neddersassen Landkreis: Cuxhoben Gemeen: Cuxhoben
Inwahners:
Postleettall:	27478
Vörwahl:	04723
Geograafsche Laag:	Koordinaten:53° 48′ N, 8° 37′ O53° 48′ N, 8° 37′ O

Ox (hoochdüütsch Oxstedt) is en Oort in de Gemeen Cuxhoben in’n Landkreis Cuxhoben, Neddersassen.

Ox liggt op de Geest bi veer Kilometer af von de Noordsee. In’n Noorden liggt de Cuxhobener Küstenheid. De Süüdgrenz billt de Oxter Beek, över den dat Water na de Noordsee hen afflütt.

De Naveröörd sünd Olenwoold, Franzenborg un Godendörp in’n Noordoosten, Noordholt in’n Süden, Spieker Neefeld in’n Westen un Berensch in’n Noordwesten.

In de Oorkunnen kummt de Oort toeerst 1139 vör. De Naam schall wohrschienlich von Ockenstede kamen, also de Steed, an de en Persoon mit’n Naam Ocko wahnt hett. De Oxter Beek an’n Süüdrand von Ox billt de Grenz na Land Wusten. Ox sülvs hett fröher to dat hambörgsche Amt Ritzbüttel höört.

In’n Eersten Weltkrieg sünd 15 Soldaten ut Ox fullen oder vermisst, un in’n Tweten 43^[1].

1935 hebbt se in de Heid in’n Oosten von Ox dat Marinesperrwaffenarsenal Ox anleggt. Na’n Krieg hebbt de Briten de Anlaag denn sprengt. As de Bundsrepubliek Düütschland denn aver wedder en Bundswehr opstellt hett, is 1963 wedder en neet Depot anleggt worrn, dat bet 2005 bedreven worrn is.

An’n 1. Juli 1968 is Ox denn Deel von de Gemeen Olenwoold worrn un an’n 1. Juli 1972 is Ox mit de Gemeenreform in Neddersassen tohoop mit Olenwoold an de Gemeen Cuxhoben kamen un is nu en Deel von de Oortschop Olenwoold binnen de Gemeen.

Ox is evangeelsch-luthersch präägt un höört to dat Kaspel Olenwoold.

För de Kathoolschen is de Twölv-Apostels-Kark in Olenwoold tostännig, de siet 2008 to de Karkengemeen St. Marien in Cuxhoben tohöört.

Dat Wapen wiest op grönen Grund dree gollen Ekenbläder un en sülvern Ruut. De Ruut stellt en Odalruun dor, wat na de Naamherkumst von’n Oort wiest. De Naam Ocko schall von dat germaansche Woord odal (Besitt) herkamen. De Ekenbläder staht för de Holten bi Ox.

En Denkmaal för de Fullenen ut Ox ut de twee Weltkrieg’ steiht op’n Karkhoff.

Bi Ox gifft dat den Golfplatz Hoge Klint mit 18 Löcker op 62 Hektar. De Küsten-Golfclub Hoge Klint, de den Platz bedrifft, is an’n 30. August 1978 grünnt worrn. De Platz sülvs is an’n 27. September 1980 inwieht worrn.

Ok en Freebad hett Ox. Dat Bad hett 1964 apenmaakt.

De Schüttenvereen is 1914 grünnt worrn.

In’n Süüdwesten von Ox liggt en Windpark mit alltohoop 16 Windrääd, von de aver blots dree direkt op dat Rebeed von Ox staht, de Rest op dat Rebeed von Spieker Neefeld un Noordholt.

Ox liggt an de Kreisstraat 7, de von Süüdwesten von Dieksenn her kummt un in’n Noordwesten na Berensch löppt. In’n Oosten löppt de K 13 na Godendörp. Ans gifft dat noch en lüttjere Straat na Spieker Neefeld.

De nächste Bahnhoff is de Bahnhoff Noordholt an de Bahnlien Bremen-Cuxhoben, wat so bi fiev Kilometer weg is.

1. ↑ http://www.denkmalprojekt.org/dkm_deutschland/cux-oxstedt_wk1u2_ns.htm
2. ↑ Franz Heinrich Neddermeyer: Zur Statistik und Topographie der Freien und Hansestadt Hamburg und deren Gebietes. 1847, Sied 194: http://books.google.de/books?id=sHoAAAAAcAAJ&pg=PA194
3. ↑ Statistik des Hamburgisches Staats. Ergebnisse der Volkszählung vom 3ten December 1866. S. 44, http://books.google.de/books?id=C6Q5AQAAIAAJ
4. ↑ Statistik des Hamburgisches Staats. Ergebnisse der Volkszählung vom 1. Dezember 1871. S. 78, http://books.google.de/books?id=C6Q5AQAAIAAJ
5. ↑ http://www.gemeindeverzeichnis.de/gem1900/gem1900.htm?hannover/lehe.htm
6. ↑ ^{a b c} http://www.verwaltungsgeschichte.de/hadeln.html

Ox. Mehr Biller, Videos oder Audiodateien to’t Thema gifft dat bi Wikimedia Commons.