Klint (Gemeen Heckthusen)

Wapen/Flagg	Koort
Basisdaten
Bundsland: Neddersassen Landkreis: Cuxhoben Samtgemeen: Hemmoor Gemeen: Heckthusen
Inwahners:
Hööchd:	3 m över NN
Postleettall:	21755
Vörwahl:	04774
Geograafsche Laag:	Koordinaten:53° 38′ N, 9° 13′ O53° 38′ N, 9° 13′ O

Klint is en Dörp in de Gemeen Heckthusen in’n Landkreis Cuxhoben, Neddersassen. Bi Klint höört ok de Oortsdeel Koppel.

Klint liggt an de Oost un is na Süden hen vun dissen Stroom afspirrt. Naveröörd sünd Lohmöhlen in’n Westen, Ihlbeek in’n Noordwesten, Bornbarg in’n Noorden, Koppel un Heckthusen in’n Noordoosten, Burweg un Blomendol in’n Süüdoosten un Kronenborg in’n Süden.

Klint kummt 1342 as uppe deme Klinte toeerst in de Oorkunnen vör. De Naam kummt von dat Woord Klint un steiht för de steile Överkant, den de Geest hier na de Oost billt.

Op’n Klint hett dat fröher dree Eddelgöder geven: den Geesthoff un de Göder Klint I un Klint II.

An’n 4. April 1949 is op’n Geesthoff in en grote, mit Reet deckte Schüün en Brand utbraken. De Weken vörher weer dat jümmer dröög ween un dör starken Süüdwestwind hett sik dat Füür gau op dat Dörp utbreedt, dat in’n Noordoosten von’n Geesthoff liggt. All de Weertschopsgebüüd op dat Good un 32 Gebüüd op’n Klint sünd afbrennt. De Freewilligen Füürwehren ut Klint un twölv Öörd ümto sünd tohooptagen worrn un hebbt achtteihn annere Gebüüd noch reddt, de al Füür fungen harrn.

Op’n Klint gifft dat an de Oost den Ferienpark Geesthoff, de in Besitt vun de Freeherrn-Familie Marschalck von Bachtenbrock is, de op dat Good Hutloh in Heckthusen ehren Sitt hett.

In de Franzosentied von 1810 bet 1814 hett de Oort to de Mairie Heckthusen in’n Kanton Himmelpoorten höört. Dat Rebeed hett in disse Tied 1810 to dat Königriek Westfalen un von 1811 bet 1814 to dat Franzöösche Kaiserriek ünner Napoleon höört.

De Oort hett vör 1850 to dat Gericht Heckthusen höört. 1850 is dat denn Deel von dat Amt Himmelpoorten worrn, dor aver man twee Johr bleven un is 1852 an dat Amt Oosten kamen. 1885 is dat Amt Oosten in’n Kreis Neehuus opgahn. 1932 is de Oort an’n Landkreis Land Hadeln kamen un 1977 Deel von’n Landkreis Cuxhoben worrn.

1962 is de ole Gemeen Klint to de Samtgemeen an de Oost kamen. Disse Samtgemeen is denn an’n 1. Juli 1972 mit de Gemeenreform in Neddersassen to de hüdige Gemeen Heckthusen worrn, to de Klint nu höört.

Klint is evangeelsch-luthersch präägt un höört to dat Kaspel von de Marienkark in Heckthusen.

För de Kathoolschen is de St.-Nikolaus-Kapell in Heckthusen tostännig, de siet 1. September 2010 to de Karkengemeen Hillig Geist in Stood tohöört.

Dat Wapen wiest baven en sülvern Peerd op roden Grund, wat ut dat Wapen vun Neddersassen stammt. Neern is ene blaue Well op sülvern Grund, wat för de Oost steiht.

De Schützenvereen Klint is 1891 grünnt worrn. De Oort hett ok en Freewillige Füürwehr.

Dat Kriegerdenkmaal op’n Klint erinnert an de 25 Fullenen ut den Eersten Weltkrieg. Ok an de Lüüd, de in’n Tweten Weltkrieg fullen sünd, warrt erinnert. Man de staht nich mit Naams mit op dat Denkmaal.

Dör Klint geiht de Landstraat 116, de in’n Oosten in Heckthusen an de Bundsstraat 73 rangeiht. In’n Westen löppt de L 116 na Loomst wieder un geiht dor an de Bundsstraat 495 ran. Na Noorden löppt en lüttje Straat na Bornbarg un na Ihlbeek. Na Süden kummt een blot över de Brügg över de Oost in Heckthusen.

De nächste Autobahn is de Autobahn 26 (Afsnidd Stood–Hamborg). De Opfohrt 2 Stood-Süüd liggt so 23 Kilometer in’n Süüdoosten von Klint an de B 73.

De nächste Bahnhoff is de Bahnhoff Heckthusen an de Nedderelvbahn von Cuxhoben na Hamborg, de direkt an dat Noordoostenn von dat Dörp liggt (annerthalv Kilometer weg von dat ole Dörp).

De Schölers ut Klint gaht na de Grundschool Heckthusen. Later köönt se op de Oberschool Loomst wesseln oder alternativ op de Haupt- un Realschool Hemmoor. As Gymnasium is dat Gymnasium Warstood för den Oort tostännig.

Dat gifft ok en Kita an de Landstraat, de siet August 2017 besteiht. Vörher weer dat en Speelkreis. De Kita warrt von de evangeelsche Kark bedreven.

1. ↑ Christoph Barthold Scharf: Statistisch-Topographische Samlungen zur genaueren Kentnis aller das Churfürstenthum Braunschweig-Lüneburg ausmachenden Provinzen. Meier, Bremen 1791, Sied 128
2. ↑ Curt Heinrich Conrad Friedrich Jansen: Statistisches Handbuch des Königreichs Hannover. Hannover 1824, Sied 334
3. ↑ Friedrich Wilhelm Harseim, Carl Schlüter: Statistisches Handbuch für das Königreich Hannover. Schlütersche Hoffbookdruckeree, Hannover 1848, Sied 150
4. ↑ Die Gemeinden und Gutsbezirke des Preussischen Staates und ihre Bevölkerung. Berlin 1873, Sied 148
5. ↑ Inwahnertallen op gemeindeverzeichnis.de
6. ↑ ^{a b c} Inwahnertallen op verwaltungsgeschichte.de

Klint (Gemeen Heckthusen). Mehr Biller, Videos oder Audiodateien to’t Thema gifft dat bi Wikimedia Commons.