Ilau

De Ilau billt tohoop mit den Sneegraven den 21,0 Kilometer langen^[1] Hauptgraven Ilau-Sneegraven, de de Maschwettern mit de Ilmenau verbinnen deit. De Waterloop liggt in de Elvmasch von de Landkreise Lümborg un Horborg. De Ilau-Sneegraven hett en Afströömrebeed von 94,7 km²^[2].

De Ilau un de Sneegraven sünd ole Arms von de Elv, de later bi dat Indieken von de Maschen to Gravens worrn sünd, de dat Water afleiden schöölt.

De Sneegraven hett sien Anfang in’n Noorden von Echen. Dor twiegt de Graven von de Maschwettern af. De Verloop geiht von dor na Westen. Bi dat Naturschuulrebeed Fehlingsbleck geiht de Sneegraven ünner’n Elv-Siedenkanaal dör. Op de annere Sied wennt sik de Graven na Noordwesten un geiht twüschen Addelborg un Lüdershusen ünner de Bundsstraat 209 dör.

Von de Maschwettern bet na Bütel billt de Sneegraven de Grenz twüschen Echen, Lüdershusen un Bütel (fröher Amt Scharnbeek-Bütel) in’n Süden un Haunstörp un Addelborg (fröher Amt Addelborg) in’n Noorden. Dorvon hett de Graven ok sien Naam (Sneed = Grenz).

Fröher is de Sneegraven in Bütel mit de Ilau tohoopflaten, de kort vörher bi Horborg un Boorn as Arm ut de Neetz aftwiegt is. Vondaag is de Waterloop aver in en Bagen in’n Noorden üm Bütel rümföhrt. De Ilaugraven kummt hier an Tesp vörbi.

In’n Noordwesten von Bütel, al dicht bi Eekholt draapt sik ole Ilau un Ilaugraven denn wedder. Bi Eekholt geiht de Waterloop ünner de Bundsstraat 404 dör. De Ilaugraven geiht denn na Westen dör dat Maschrebeed von O’rshusen, Hunnen un Tönnhusen op dat linke Över un Krüms un Draag op dat rechte Över. Bi Tönnhusen drippt de Ilaugraven op den Loop von de Ole Ilmenau. Hier weer fröher de Münn von de Ilau. Vondaag flütt de Ilau aver wieder in dat Bedd von de Ilmenau bet na’n Loop von de ne’e Ilmenau. Ilaugraven un ne’e Ilmenau draapt sik twüschen Winsen un Lassrönn.

1. ↑ Michael Bergemann: Gesamtliste der Fließgewässer im Elbeeinzugsgebiet. 2012
2. ↑ Gewässergütebericht ELBE 2000 Niedersachsen.

Koordinaten:53° 23′ N, 10° 14′ O