Edison (Film)

Edison is en US-amerikaanschen Thriller ut dat Johr 2005. Speelbaas weer David J. Burke, de ok sülvst dat Dreihbook schreven hett. Ofschoonst de Film mit utermatig veel bekannte Lüüd besett weer, is de Film nie in de Kinos kamen: Bi en Vörföhren to Proov is he bi de Tokiekers dörfallen. Op DVD is he in’n Dezember 2005 op’n Markt kamen.

De Stadt Edison is en opstreven US-amerikaansche Metropol. In de Ünnerwelt hebbt aver nich alleen de Verbrekers dat Seggen, man ok Polizisten vun de Elite-Eenheit F.R.A.T. seht to, dat se jemehrn Deel afkriegt. Officer Deed is noch nee bi de F.R.A.T. un schall glieks op sien eerste Tour en Verbeker doodscheten, de jem verraden will. As he dat nich toweeg bringt, övernimmt sien Kolleeg Lazerov dat un vertellt en tweeten Verbeker, wat he vör Gericht to seggen hett. Liekers geiht Deed dat to nah, wat vun sien Kollegen argdenkern opnahmen warrt.

Bi de Gerichtsverhanneln vun den Fall is ok de junge Journalist Joshua Pollack togegen. As sik de Beklaagte bi Deed bedanken deit, as dat Oordeel fallt, glöövt Pollack, dat he en grote Saak op de Spoor is. Sien Baas Ashford will dor eerst nix vun weten un smitt em rut, liekers gifft he em Henwiesen, woans he de Saak richtig maken mutt. Bi sien Naforschen stött Pollack op verkehrte Angaven vun de F.R.A.T.-Beamten. Man he prickelt ’n beten to deep un warrt een Avend tosamen mit sien Fründin vun Liddmaten vun de F.R.A.T. tosamenslahn. Kort later warrt ok de Fangene in’t Gefängnis afsteken, dat he nix mehr betügen kann.

De F.R.A.T. richt Verdächtige an’n Daatoort hen in’n Opdrag vun Gewarfslüüd in de Stadt, de mit de F.R.A.T. drang tosamenarbeit. De Tall vun de Verbrekens is so üm bit to 80% torüch gahn, wat sik na buten hen goot maken deit. In Wohrheit aver is de F.R.A.T. in tallrieke Korrupschoonsfäll verwickelt un wascht dat Geld, dat se vun de Verbrekers insammelt – dat is wat de Ermittler Wallace rutfunnen hett. Man, na denn Dood vun den Fangenen hebbt se nix mehr in de Hand – afsehn von Deed, de aver bang is üm sien Bruut. Wallace schallt nu dat FBI in un sett de F.R.A.T. ünner Druck. För de Band is kloor, dat ok Pollack an de Siet mutt.

Opletzt sleiht sik Deed denn doch op Pollack sien Siet un reddt em in letzte Sekunn. Dat kummt to en Scheteree twüschen Deed un Pollack op de een Siet un den Rest vun de F.R.A.T. op de annern. Vun de F.R.A.T. blifft nümms an’t Leven. Un ok de in de Korrupschoon verwickelte Staatsafkaat warrt vun Pollack un Ashford achteran kloor maakt, dat se över allns Bescheed weet un he vör keen Amt kannederen schüll, wenn he nich will, dat de Saak publiek maakt warrt.

• Dat Lexikon vun’n internatschonalen Film segg över Edison, dat dat en soliden Thriller weer, de eenmol mehr den Gloven an dat oprechte Geweten un de Oprichtigkeit vun de US-amerikaanschen Presse anropen deit.^[1]
• Dat Magazin Prisma fünn dat Dreibook vun den Science-Fiction-Thriller nich jümmer stimmig. Kevin Spacey un Morgan Freeman wiesen eenmol mehr, dat se to de eerste Reeg vun Hollywood tellen, wiels de fröhere Teenie-Swarm Justin Timberlake sien Unvermögen as Schauspeler ünner Bewies stellen de.^[2]

De Film is mit en Budget vun ruchweg 25. Millionen US-Dollar dreiht worrn. In de Kinos lööp Edison aver blots in de Nedderlannen.

De DVD is eerst mit de ümstreden Kopeerschuul Alpha-DVD in en fröhe Beta-Faten vun den düütschen Dvd-Verleher Kinowelt utlevert worrn. Dat geev Afspeelapparaten, de de DVD aver nich afspelen künnen oder dat Menü gor nich eerst lesen künnen. De meisten Standalone-Spelers künnen de DVD aver ahn Lasten afspelen.^[3][4] De Ennfaten vun den Kopeerschuul weer later bi Mr. & Mrs. Smith insett un is teemlich ümstreden, vunwegen dat dat Programm Windows to’n Nadeel vun den Bruker ännern kann. To’n Bispeel kann överwacht warrn, wat he veel höörn deit, oder de Funkschonen vun’n Reekner warrt minnert.

1. ↑ Kritik to’n Filmin’t Lexikon vun’n internatschonalen Film
2. ↑ Edison Filmkritik bi prisma.de
3. ↑ Video-Kopiersperre Alpha-DVD blockiert Brenner Melln vun’n 4. Februar 2006
4. ↑ c’t: Action-Komödie beeinträchtigt PC-SicherheitDVD-Kopiersperre öffnet Sicherheitslöcher

• Edison in de Internet Movie Database (engelsch)
• Kritiken to’n Film op Rotten Tomatoes
• Vergliek vun de Snittfatens Pro 7 FSK 12 — Pro 7 FSK 16 op Schnittberichte.com