Don’t Say a Word (Film)

Don’t Say a Word (op plattdüütsch so veel as „Segg keen Woort“; dt. Titel: Sag kein Wort) is de Titel vun en US-amerikaanschen Thriller ut dat Johr 2001. Dat Dreihbook baseert op den Roman mit glieken Naam vun Andrew Klavan. Speelbaas vun den Film weer Gary Fleder, de Hööftrull speel Michael Douglas.

De Deef Patrick Koster hett mit sien Mackers en ro’en Demant ut en Bank in New York City klaut, de ruchweg teihn Millionen US-Dollar weert is. Man Burrows, een vun de Mackers, neiht mit den Demant ut. Mit de annern Deev tosamen stött Koster Burrows vör en U-Bahn, as he den Demant nich rutgeven will. Burrows kummt dorbi üm’t Leven. Dorna warrt he aver vun de Polizei faten kregen un insparrt. Teihn Johren mutt Koster afsitten. Aver he maakt sik en Plaan, woans he an den Eddelsteen kummt, wenn he wedder free is.

De junge Elisabeth Burrows hett mitansehn müsst, as ehr Vadder vör’n Tog smeten weer. Siet Johren is se ahn Spood in verschedene Nervenkliniken behannelt worrn, vunwegen dat se kort dorvör is, sik sülvst ümtobringen. Nu is se bi den Psychiater Nathan R. Conrad in Therapie. Koster is sik kloor, dat Burrow sien Dochter weet, woneem de Steen versteken is. Wieter weet he, dat Elisabeth en Tall kennt, de mit dat Versteek to doon hett. Koster plaant dorüm, Conrad sien lütte Dochter Jessie in sien Gewalt to bringen, üm em ünner Druck to setten. Mit sien Lüüd richt he sik in en Naverwahnung in – de Hüürfro bringt se üm – un kann so Conrad un sien Fro överwachen. De Psychiater schall nu in blots en poor Stünnen ut Elisabeth rutkriegen, woneem de Demant liggt. Wenn he dat nich henkriggt, drauht he Jessie an de Siet to maken.

Conrad blifft nix anners över, as to versöken an Elisabeth rantokamen. Langsom un mit veel Möh kann he ehr Vertroen winnen un maakt sik opletzt mit ehr op’n Weg, den Demant to söken. De Weg föhrt na Potter’s Field op Hart Island. Dor is en Karkhoff för Minschen, de nümms kennt. Dor is ok dat anonyme Graff vun Elisabeth ehrn Vadder. Koster un sien Lüüd blievt em de hele Tiet op de Hacken. De Tall, de Elisabeth in ehrn Kopp hett un de Conrad rutfinnen schall, stellt sik as de Tall vun dat Graff rut, woneem Burrows begraven liggt. Burrows harr den Demant dormols vör teihn Johren in de Popp vun sien Dochter steken, de se denn aver kort vör’t Gräffnis in’n Sarg vun ehrn Vadder leggt harr.

Conrad sien Fro liggt in de Twüschentiet to Huus un kann nix maken, vunwegen dat se en Been in Gips hett un in’t Bett liggt. Se warrt wieter vun Koster sien Lüüd överwacht, dat se keen Dummheiten maakt. Dat geiht nich lang goot: as Jessie luut to singen anfangt, höört ehr Mudder ehr Stimm. Koster will ehr doodmaken laten, man se is nu so in de Brass un in Sorg üm ehr Dochter, dat se Koster sien Macker utschalten kann.

In Potter’s Field drapt Conrad un Elisabeth mit Koster op’nanner. Koster kriggt den Demant in sien Hannen un will Conrad nu an de Siet maken laten. De kann sik aver wehren un den Macker K.o. slahn. En wieteren vun Koster sien Mackers warrt vun de Polizistin Cassidy utschalt de över verscheden Moordfäll op de Spoor vun de Verbrekers un so ok op den Karkhoff kamen is. Cassidy warrt vun Koster anschaten, man Conrad schuppst Koster in en utkuhlt Graff, dat he to’n Instörten bringt. Koster warrt tosamen mit den Eddelsteen lebennig verschütt. Conrad kriggt sien Dochter ahn Sehren torüch un ok Elisabeth kummt mit hele Huut dorvun af.

• F.-M. Helmke kritiseer op filmszene.de, dat de Thriller afsluut bregenfree weer.^[1]

• Ulrike Steiner schreev an’n 19. Januar 2002 in de OÖ Nachrichten, dat de Geschicht vigeliensch un mit Spannung vun twee Ennen her oprullt warrt, üm opletzt aver vun en dusselig „En Kerl sütt root“-Finale op argerliche Wies verschenkt to warrn.

• TV Movie oordeel över den Film as Hoochspannung vun’n Feinsten.

• Dat Lexikon vun’n internatschonalen Film beteken den Film as handwarklich solide inszeneerten Thriller, de de Handlung to en spanned Föög formt un so en süstere Atmosphäär vun Överwachen un Drauhn maakt. Kritiseert warrt eenige Mangeln in de Logik un bi’n Inholt.^[2]

De Film hett keen Filmpriesen wunnen, man he weer 2002 för den Golden Satellite Award in de Kategorie Best Nevendorstellersche in en Drama för Brittany Murphy vörslahn.

De Film weer vun de Filmsellschop 20th Century Fox publizeert. De Dreiharbeiten hebbt ruchweg 50 Millionen US-Dollar köst. Inspeelt hett de Film in de Kinos üm un bi 55 Millionen.^[3]

1. ↑ http://www.filmszene.de/filme/sag-kein-wort
2. ↑ Kritik in’t Lexikon vun’n internatschonalen Film
3. ↑ http://www.imdb.com/title/tt0260866/business

• Don’t Say a Word in de Internet Movie Database (engelsch)
• Kritiken to’n Film op Rotten Tomatoes
• Pressekritiken op Metacritic.com