Amt Soltau

Dat Amt Soltau weer en Verwaltungsrebeed in dat Königriek Hannover mit Seet in Soltau binnen de Landdrostie Lümborg.

Dat Leid över dat Amt harr bet 1867 en Amtmann. In de Prüßentied na 1867 hett de eerste Beamte Amtshauptmann heten.

Dat Amt Soltau is bi de Verwaltungs- un Justizreform an’n 1. Oktober 1852 in dat Königriek Hannover ut de Stadt Soltau un Delen von de Amtsvaagdien Fambossel, Bargen un Harmsborg un de Ämter Ebstörp un Winsen billt worrn. Von de Amtsvaagdie Fambossel weren dat de Buurschoppen von de Vaagdie Soltau (Ahlften, Brauk, Deimen, Dibbern, Harwer, Hötzen, Leitzen, Marbossel, Meinen, Mittelstenderp, Mai, Oenn, Teindörp, Wiegen), von de Amtsvaagdie Bargen de Buurschoppen von de Vaagdie Witzendörp (Mebossel, Meinholt, Rergen, Serei, Witzendörp), von de Amtsvaagdie Harmsborg de Öörd Deithel un Sülten ut de Buurschop von dat Kaspel Müen, von dat Amt Ebstörp de Gemenen Alwern, Breloh, Ilster, Munste, Töpen, Krützen, Kohlbissen, Örrl un Traun un von dat Amt Winsen de Buurschoppen Behrn, Bissen, Ehrhoorn, Hörpel (utbenahmen den Oort Ebendörp), Hützel (utbenahmen den Oort Swinnbeek) un Volgern.^[1]

As Gericht för dat Amt is to’n 1. Oktober 1852 dat Amtsgericht Soltau inricht worrn.

1859 bi de nächste Verwaltungsreform hett dat Amt ok dat Rebeed von dat Amt Snevern ut de Landdrostie Stood tokregen.

Nadem dat Königriek Hannover 1866 an Prüßen kamen is, sünd 1867 Stüürkreise in de ne’e Provinz Hannover inricht worrn. Dat Amt hett denn to’n Stüürkreis Fambossel tohöört.

Dat Amt hett bet 1885 bestahn, as in de Provinz Hannover de Ämter oplööst worrn sünd. Dor is denn de Kreis Soltau nee inricht worrn.

• 1852–1854: Lüder Arenhold
• 1854–1864: Anton Mensching
• 1865–~1870: Gustav Eduard Amallo Wulf Wyneken
• ~1870/1880: Rudolph Böning
• ~1882: Bruno Otto Carl von Hohnhorst (opdragswies)
• 1883–31. März 1885: Carl August Bruno Wellenkamp

Na 1859 tostännig för den Bezirk von dat ole Amt Snevern:

• 1859–1865: Amtsassesser Johann Heinrich August Hermann Stuckenschmidt
• ~1865: Wilhelm Zimmler

1. ↑ Hannoversche Gesetzgebung über Staats- und Gemeinde-Verwaltung. Helwing, 1852, Sied 61