Urang Pekal

Templat:Referensi

Urang Pekal^[1] atau Pikal adolah suku bangso atau kalompok etnik yang mandiami daerah Kabupaten Bengkulu Utara di Provinsi Bengkulu, dan jugo wilayah sakitar Kabupaten Mukomuko yang barado dakek parbatasan Jambi samo Sumatra Barat. Populasi urang Pekal pado sansus tahun 2000 yoitu sabanyak 30.000 urang.

Urang Pekal bakaitan samo mitologi suku bangso lainnyo yang dominan tadapek di wilayah pabatasan urang Pekal. Mitologi ko bakaitan samo mitologi urang Rejang jo hikayaik Rajo Inderapura dari Minangkabau.

Mitologi urang Rejang mampunyoo partalian arek samo hikayaik-hikayaik karajaan Pagaruyuang di Minangkabau.

Kisah parjalanan Ampek Petulai dari Pagaruyuang manjadi bagian dari mitologi urang Rejang. Dalam mitologi tasabuik talampir mitologi kabaradoan urang Pekal.

Dalam ciek sisi nampak sacaro langsuang urang Rejang mangakui urang--urang dari urang Pekal marupoan bahagian dari urang Rejang di bawah Bangmego Tubui. Dari sisi lainnyo pado dasarnyo urang Pekal ndaklah dapek disabuik sabagai bagian dari urang Rejang. Hal ko tacamin dari panggunoan bahaso, aturan samo nilai budayo jo struktur sosial lainnyo yang sabagian maambiak tata aturan nilai budayo Minangkabau.

Pekal barasa dari kato "mengkal" yang bararti sarupo buah yang alun masak, tatapi ndak lo mantah^[2]. Dapek dimaknai bahwa urang Pekal dapek juo disimpulkan marupoan bantuak mangka dari urang Rejang samo urang Minangkabau.

Ndak lapeh dari asa muasa katahun. Dahulu kala ado surang rajo yang barasa daru Rejang Lebong punyo 7 urang anak. Carito ko bamulo dari anak tarakhir dan ciek-cieknyo anak padusi yang banamo putri Rindu Bulan. Karena putrinyo ko main mato samo pamudo biaso di karajaan, sahingga mambuwek Rajo Rejang Lebong berang.

Rajo mamarintahan kaanam putranyo untuak mambunuah putrinyo tu. Ateh parintah dari ayahnyo barangkeklag anam anaknyo tu, tatapi kaanam kakaknyo ndak tega mambunuah adiaknyo. Malah mareka mambawok adiak bungsunyo ka tapi batang aia gadang dan mambuwek rakik dari bambu samo diagiah bareh jo ayam.

Mako barakiklah sang putri manalusuri batang aia. Batang Aia iko barasa dari duo bukik yang ciek tu buki Tapus yang batang aianyo bamuaro di muaro Ketahun dan yang ciek lai bamuaro ka Jambi. Hari dami hari, minggu dami minggu bahkan babulan bulan hinggo satahun putri Rindu Bulan manyusuri batang aia hinggo rakiknyo rusak di muaro.

Kamudian ayam yang dibawok barubah manjadi saikua elang, sadangkan bareh yang dibawok baserak tu barubah manjadi senggugu.

Satalah rakiknyo dipelokan, putri Rindu Bulan kambali barakik hinggo akhirnyo sampai di pulau Pagai di daerah Padang. Kamudian inyo disalamaikan dek urang-urang di sinan. Putri Rindu Bulan diagiah baju yang rancak, karano kecantikannyo, sang putri Rindu Bulan mampu mamikek anak rajo dari karajaan Pagai.

Kamudian dipinanglah putri Rindu Bulan dan manikahlah inyo samo anak rajo. Di daerah asanyo putri Rindu Bulan, ayahnyo batanyo ka anam anaknyo. Apokah putri Rindu Bulan alah dibunuah. Tantunyo kaanam kakaknyo manjawek ndak, karano mereka ndak tega mambunuah adiak kanduang nyo surang, mereka alah tarlalu manyayanginyo.

Putri Rindu Bulan kamudian mangecekan pado lakinyo bahwa daerah asanyo dari daerah Rejang Lebong. Kamudian putri Rindu Bulan samo lakinyo mamutuihan untuak baliak ka Rejang Lebong. Itulah awal carito batang aia Ketahun yaitu barasal dari batang aia yang dilewati dek putri Rindu Bulan salamo satahun, mako batang aia tu diagiah namo batang aia Ketahun samo juo daerahnyo yang banamo Ketahun. Ado lo riwayaik lainnyo mangenai asa istilah kato Ketahun, dahulu urang Balando yang masuak ka daerah itu maambiak sumber alam yang ada di sinan. Karano di sinan banyak bana harimau, mako urang Balando tu manyabuik daerah itu Kat Town.

Sairiang bajalannyo wakatu, ejaan tasabuik disasuaian samo kabiasaan satampek jo daerah tasabuik manjadi Ketahun.

Artikel utamo untuak bagian ko adolah: Bahasa Pekal

Bahaso urang Pekal jaleh mancaliakan campuaan antaro bahaso Minangkabau samo bahaso Rejang. Kini campua bahaso tasabuik ndak hanyo jaleh mancaliak antaro bahaso Minangkabau samo bahaso Rejang. Kini campua bahaso tasabuik ndak hanyo sabateh pado bahaso Minangkabau jo Rejang, tatapi juo maambiak bahaso-bahaso lainnyo saparti Batak, Jawa jo Bugis.

Pabedaan varian bahaso manjadi ciri khas lainnyo dari campua bahaso pado urang Pekal. Varian tasabuik bakaitan samo intensitas jo urang Minangkabau samo Rejang. Jiko daerah tasabuik labiah dakek samo daerah urang Rejang, varian bahasonyo nampak dari dialek akan maarah pado bahaso Rejang. Jiko mandakati wilayah budayo Minangkabau, dialeknyo maarah pado bahaso Minangkabau.

Tradisi samo budayo Pekal ko banyak dipangaruhi dek duo budayo lain saparti budayo Minangkabau samo budayo Rejang jo saketeknyo pangaruah dari Melayu Pesisir Bengkulu. Saparti mereka sangaik mudah manyerap tradisi jo badayo dari lua samo manarimonyo manjadi bagian dari budayo mereka surang.

Kino ko sangaik susah mancari aka budayo dari urang Pekal, karano sabagian gadangnyo maambiak dari tradisi samo budayo dari luanyo.

Urang Pekal adolah pamaluak Islam sacaro mayoritas. Babarapo acara adaik jo seni budayo mereka nampak unsur-unsur Islami. Walaupun mareka alah mamaluak Islam, tatapi babarapo kaparcayaan tahadap hal-hal animisme jo dinamisme masih nampak dalam kahidupan masyarakaik urang Pekal. Mereka picayo hal-hal goib samo tampek-tampek karamat yang kunun dapek mampangaruhi kahidupan samo kasehatan inyo.

Rumah adaik masyarakaik urang Pekal tu ndak babeda samo rumah adaik samo suku lainnyo yang ado di Bengkulu yaitu rumah pangguang. Sadangkan untuak sanjato urang Pekal yoitu keris, tombak samo parang. Elok yang dianggap sabagai bendo karamaik samo juo digunoan sabagai sanjato untuak baburu sarto digunoan dalam kagiatan-kagiatan yang lainnyo. Makanan khas dari urang Pekal itu sambal unjang. Sambal unjang adoalah makanan yang dimasak dalam bambu dan isinyo ikan dicampua samo rampah-rampah. Ikan itu dihancuaan basamo bumbu-bumbum tu dilatakan di ateh api jo diatehnyo ditutuik samo daun pisang. Hampia samo jo caro mamasak lamang atau mamasang ikan pais, tatapi yang mambedaannyo ikan pai manggunoan daun pisang kalau sambal unjang manggunoan bambu.

Masyarakaik urang Pekal ko rato-rato iduik samo bakarajo sabagai patani di ladang samo kabun. Babarapo dari masyarakaik urang Pekal ko alah bakarajo pado sektor swasta samo pamarintahan. Urang pekal 80 % mato pancariannyo marupoan patani yaitu mayoritas bakabun karet samo kalapo sawik. Dari mato pancarian ko nampak bahwa urang Pekal pado maso kini baradao pado tingkatan paradaban partanian.

Teknik ko marupoan ciri-ciri dari tingkek paradaban partanian manetap. Ado juo masyarakaik urang Pekal yang barado di pasisia pantai mamanfaatkan hasil lauik sabagai nalayan. Ado juo sabagai dari masyarakaiak urang Pekal ko bakarajo di tambang batu bara punyo PT Bijaksana samo di di tambang ameh di Lebong yang dikenal jo tambang ameh Lebong Tandai.

Sistem kakarabatan urang Pekal sangaik arek antaro sasamo urang Pekal. Babeda samo urang yang baru mereka kenal, mereka hanyo mancaliak urang tasabuik apokah elok atau ndak.

Jiko urang tasabuik elok mako mereka akan maanggap urang tasabuik sarupo saudaro surang, tatapi jiko kalakuan urang tu buruak mako urang Pekal akan manjauhinyo.

Dalam adaik urang Pekal, padusinyo dijujur atau dibali dek laki-laki, kebalikan dari adaik urang Minang.

Jiko saurang paduasi alun manikah akan dimandikan samo pitih logam jo disumpah, mako padusi itu alah dijua ka calon lakinya dan padusi tu alah manjadi hak dari lakinyo.

Pitih yang barasa dari pambalian adiaknyo tadi dipakai dek kakaknyo untuak mambali padusi yang akan manjadi calon bininyo.

Adaik ko mulai hilang samo jarang basobok karano parubahan zaman.

Proses parnikahan urang pekal adolah sabagai barikuik :

1. Malamar atau berasan
2. Biaya adaik
3. Manikah
4. Baarak (supayo urang-urang tau akan ado yang manikah mako acara arakan ko wajib ndak buliah ditinggaan).
5. Duduak di karusi tangah laman dikaliliangan dek urang banyak samo diiringan jo tarian pancak silek.
6. Baliak ka palaminan
7. Maminum punai untuak urang yang manolong dalam manyiapan parnikahan yoitu pado pagi hari.
8. Makan besak maksudnyo hari puncak samo jo makan-makan basamo pado sore hari.
9. Satalah salasai acara parnikahan, bisuaknyo diadoan ngubak basung atau doa (balik bahasa).
10. Adaik pulang bukti gadih, iko adolah adaik yang manyatoan kasadioan manarimo padusi yang dinikahi jiko masih parawan. Pado adaik ko sang laki maagiah seperai atau aleh kasua pado malam partamo ka ibu si padusi sabagai tando anaknyo masih suci. Jiko ndak suci lai, sang laki berhak mambaliakan anak gadih yang ndak dapek manjago kasuciannyo. Si laki berhak mambatalan parnikahan. Iko manandoan batapo tinggi masyarakaik urang Pekal manganuik ajaran agamo Islam yang sajatinyo.

Masyarakaik urang Pekal mayoritasnyo baragamo Islam, tatapi masyarakaik urang Pekal masih picayo samo roh-roh nenek moyang atau mamaliharo makhluk goib saparti harimau. Manuruik mereka, urang Pekal yang alah maningga beko akan barubah manjadi harimau. Jadi ado sabuah ritual yang dilakukan dek masyarakaik urang Pekal jiko sawah atau ladang mereka dirusak dek babi. Dalam ritual tasabuik masyarakaik Pekal maagaiah sasajen di daerah sawah atau ladang mereka yang dirusak dek babi tu. Sasajen tu barupo tujuah talua ayam kampuang yang dilatakan bidai (anyaman bambu) samo diiriangi jo mantra-mantra. Mereka picayo sasajen yang diagiah tu akan dimakan dek roh-roh nenek moyang mereka. Manuruik kaparcayaan bahwa roh-roh nenek moyang mereka akan berubah manjadi harimau untuak mausia babi. Satalah mereka malakukan ritual tu mako biasonyo pado malamnyo tadanga suaro harimau dan itu sangaik dipicayo dek urang Pekal. Jadi sawah atau ladang mereka ndak paralu dijago lai karano alah ado dijago dek harimau. Acara kaagamoan urang Pekal samo mantuak acara kaagamoan suku-suku lainnyo yang ado di Bengkulu saparti zikir jo badendan.

Ado tari gandai yoitu tarian batautan yang dilakukan dek laki-laki dari urang Pekal asli. Jiko dilakukan dek laki-laki samo pidusi sacaro bapasangan yang barasal dari urang Pekal asli mako disabuik tari gandai ambat. Tarian yang dilakukan sacaro bagantian manunjuakan aksi samo kehebatan mereka, biasonyo tari ko diiringi jo redap, serunai^[3], gong yang marupoan alaik musik tradisional dari urang Pekal. Ado tigo jenus tarian gandai yoitu leluen, nenet, samo sementaro. Tarian gandai ko wajib ditampilan saat pesta parnikahan, tatapi bisa juo ditampilan pado saaik upacara panyambutan tamu dari pejabat-pejabat atau urang penting yang datang. Lagu daerahnyo yoitu berpantun (gamaik).

Serunai^[4] adolah alaik musik tradisional tiup aerophone yang dimainkan dek surang urang. Alaik musik ko diyakini barasa dari urang Pekal yang ado di Kacamatan Malin Deman, Kabupaten Mukomuko, Bengkulu.

Serunai bakambang hinggo ka saluruah wilayah Kabupaten Mukomuko. Dilansir dari Warisan Budaya Kemdikbud, Serunai atau Sunai tabuwek dari bambu kapa atau telang kapa yang iduik di tapi batang aia karano tekstur bambu tu labiah tipis, mudah untuak diolah samo manghasilkan suaro yang labiah nyariang.

• Bahasa Pekal