Puaso

Puaso adolah tindakan basarayo untuak bapantang dari makanan, minuman, atau kaduanyo, babuek buruak sarato dari sagalo hal nan mambatalan puaso untuak periode wakatu tatantu^[1]. Puaso mutlak (sabana puaso) biasonyo didefinisikan sabagai bapantang dari sadoalah makanan jo minuman untuak periode tatantu, biasonyo salamo ciek ari (24 jam), atau bahari-hari. Puaso lain mungkin hanyo mambatasi sabagian, mambatasi makanan tatentu atau zat tatantu. Praktik puaso dapek maalangi aktivitas seksual dan lainnyo sarato makanan. Puaso, acok dilakukan dalam rangka manunaikan ibadah, juo dilakukan di lua tuntutan ibadah untuak maningkekan kualitas iduik spiritual sasaurang nan malakukannyo. Hal samacam ko acok ditamukan dalam diri biarowan atau rahib. Inti dari mukasuik dan tujuan puaso itu adolah panahanan diri dari kainginan untuak mancapai sabuah tujuan.

Puaso acok dilakukan sabalun pambadahan atau prosedur nan mamaraluan anestesi umum (bius umum) karano risiko aspirasi paru dari isi paruik (lambuang) sasudah diagiah bius (muntah atau taisok muntahan ka paru, barisiko maancam nyao).^[2][3][4] Sabagai tambahan, pamaresoan (tes) medis tatantu, misanyo pareso kolesterol atau gulo darah (glukosa darah), paralu puaso babarapo jam sabalunnyo supayo ambang bateh dapek ditantuan. Pado pamaresoan kadar lamak tubuah (lipid panel), kagagalan dalam bapuaso salamo 12 jam sabalunnyo mambuek hasianyo bias dek tajadi paningkekan trigiserida.^[5]

Masyarakaik Kanker Amerika (America Cancer Society) mangatokan baso bapuaso atau pantang kalori indak paguno untuak mambuek cegak dari kanker.^[6]

Pado sabuah tinjauan (review), bapuaso maningkekan kawaspadaan, suasana hati, sarato managah tajadinyo depresi.^[7]

Bapuaso salamo kurang dari 24 jam (puaso nan dijarangkan atau indak panuah) manunjuakan hasia nan efektif untuak mangurangi barek badan pado urang jo obesitas sarato mamiaro massa tubuah nan ideal (lean body mass).^[8][9][10]

Puaso acok dilakukan dalam rangka manjalankan ibadah dalam suatu agamo. Ado babarapo agamo di dunia nan mampunyoi parintah untuak bapuaso manuruik caro tiok agamonyo surang. Parintah bapuaso ado dalam agamo Islam, Kristen, Yahudi, jo Baha'i.

Dalam Yahudi, puaso bamukasuik untuak manahan diri kasadoalahannyo dari makanan jo minuman, tamasuak aia. Bahkan manggundar gigi diharamkan pado puaso ari rayo Yom Kippur jo Tisha B'Av, tapi dibuliahan pado puaso hari ketek. Umaik Yahudi bapuaso sampai hari ka anam pado satu tahun. Jo pangacualian Yom Kippur, puaso indak dibuliahan pado ari Sabat.

Artikel utamo untuak bagian ko adolah: Saum

Dalam Islam, puaso (disabuik juo Shaum) nan basipaik wajib dilakukan pado bulan Ramadhan salamo sabulan panuah sarato ditutuik jo Ari Rayo Idul Fitri. Puaso dilakukan jo manahan diri dari makan jo minum sarato dari sagalo pabuatan nan dapek mambatalan puaso mulai dari tabik fajar inggo tabanamnyo matoari jo niaik sasuai parintah dalam kitab suci Alquran. Puaso juo batujuan untuak mananaman sikap untuak saliang babagi ka sasamo, karano sawakatu bapuaso, umaik muslim turuik marasoan baa urang nan indak mampu kapayahan mandapek makan.

• Puaso Ramadan