Idrisy

I Idrisy dia mpaminanin' ny silamo voalaza ao amin' ny Kor'any, izay heverin' ny Mozilmana fa mpaminany fahatelo taorian' i Seta. Izy no mpaminany faharoa voalaza ao amin' ny Kor'any. Ny lovantsofina silamo dia niray feo nanondro an' i Idrisy ho i Henôka ao amin' ny Baiboly. Maro ny manam-pahaizana mozilmana tamin' ny Andro Taloha klasika sy tamin' ny Andro Antenatenany izay nihevitra fa olona iray ihany i Idrisy sy i Hermesy Trismegistôsy. Amin' ny teny arabo izy dia itao hoe إدريس /ʾIdrīs.

Voalaza ao amin' ny Kor'any fa "mendri-pitokisana" sy "mahari-po" ary ny Kor'any koa dia milaza fa "nasandratra ho any amin' ny toerana ambony" izy. Noho izany sy ny noho ny fisian' ny fitovian-dahatsoratra hafa, dia iheverina ho i Henôka ao amin' ny Baiboly i Idrisy, ary ny lovantsofina silamo matetika dia mametraka an' i Idrisy ho ao amin' ireo Taranaka voalohan' i Adama, ary mihevitra azy ho iray amin' ny mpaminany tranainy indrindra voalaza ao amin' ny Kor'any, mametraka azy eo anelanelan' i Adama sy Nôa. Ny maha tokan-tsata an' i Idrisy dia nanentana ny fitantarana maro taty aoriana momba azy ao amin' ny lovantsofina silamo.

Araka ny hadita, notantarain' i Malik ibn Anas ary hita ao amin' ny Sahih Muslim, dia voalaza fa tamin' ny dian' i Mohamady tamin' ny alina dia nifanena tamin' i Idrisy tany amin' ny lanitra fahefatra izy. Ny lovantsofina izay nivoatra manodidina an' i Idrisy dia manao azy ho mpaminany sy filôzôfa ary mistika, ary maro ny mistika mozilmana taty aoriana, na Sofy, anisan' izany i Ruzbihan Baqli sy Ibn Arabi, izay nilaza ihany koa fa nihaona tamin' i Idrisy tao amin' ny fahitana ara-panahy.