Luis Medegh

Quest articol chì l'è scrivud in lombard, con la Noeuva Ortografia Lombarda

El Luis Medegh (Luigi Medici in italian, Milan, 1888 - Trezz, 2 de avril 1965) a l'è stad un avocat e poeta italian, stimad autor in dialet milanes.

Fioeul del ragionat Vincenz e de la pianista Teresa Crespi, l'è stad compagn di studi del Delio Tessa e in del 1915 el se laurea in lesg a l'Università di Studi de Pavia, per poeu fà l'avocat per circa 30 agn.

L'ha tolt part a la prima guerra mondial 'me soldad sempliz, e 'na voeulta tornad l'ha studiad a Brera indova che in del 1920 el ciapa una laurea pussee in filosofia e l'è abilitad anca a insegnà, roba che 'l farà per 10 agn al Liceo Ginnasi Statal Lissander Manzon.

A l'éra propi ligad a la Martesana, indova che 'l pader el lavorava, e 'l farà San Martin definitivament a Trezz in del 1943 desgià che la soa cà de Milan l'è stada destrugada di bombe.

In del 1959 el vinc l'Ambrosin d'Or e in del 1965 el moeur.

In del 1916 el se marida con la Felicita Maria d’Incisa di Camerana, e 'l restarà vedov in del 1959. In del 1963 el se marida con la Itala Ceresani, e 'l moeur du agn dopo.

Dopo la soa mort la miee la cura el so archivi personal, per poeu dàll in del 1982 a l'amis Piero Airaghi, che l'ann dopo el donarà a la Biblioteca Ambrosiana.

L'è stad member eminent de la pupart di sociazzion ligad al dialet milanes compagn del Circol Filologich Milanes e l'ha anca fondad l'Istitut Fassista de Coltura de Milan, ma a l'éra in polemica costanta cont el regim per el so tratament di lengov regionai e, quand che i fassista gh'hann ordenad de scriver domà in italian l'ha publegad una poesia clandestina che la s'è spantegada inscì tant che l'ha menad a la revoca de l'ordenanza.

El so stil poetich l'era decadentista e ispirad ai campagne lombarde 'me simbol de libertà.

• Schiribizz (1914)
• Rime ambrosiane (1931)
• Vecchie osterie milanesi (1932)
• Nuove poesie milanesi (1934)
• Ona fiorida de moneghell (1939)
• Tutti matti giù a Milano: l'ultima cavalcada de Bernabò (1955)
• Incontri di anime da l'alba del XX secolo (1957)
• Poesie (1963)

• Letteratura milanese: dagli albori ai giorni nostri (1947)

• El club de la cerva (1930)

• Fondo Luigi Medici presso la Biblioteca Ambrosiana di Milano.