Kalevipoeg
El Kalevipoeg l'è on poema epegh in lengua estona, faa su in del XIX secol del scrittor Friedrich Reinhold Kreutzwald (e, prima de lu, del Friedrich Robert Fählmann), e publicaa in tra el 1857 e 'l 1861. L'è ona regolta in 19.000 vers, spartii foeura in 20 cant, e 'l cunta su i aventur del fioeu de Kalev (in eston Kalevipoeg). Kalevala e Kalevipoeg hinn i dò font principai per cognoss la mitologia di popolazion ugro-finnegh.
L'è devegnnu el poema nazional de l'Estonia anca per via d'ona vena patriottega bella forta. L'è staa faa su in l'istessa manera del Kalevala, el poema nazional finlandes. El Kreutzwald l'ha regolt i testimonianz de la tradizion oral e j'ha mettuu tucc insemma in d'on gran corpus de legend (anca se on quai tocch l'è staa giontaa proppi de l'autor, per impienì on quai boeugg narativ).
Se cred che 'l Kalevipoeg, al contrari del Kalevala, el gh'abbia pussee influenz de la mitologia germanega, come che se ved de certi stori pussee tragich e sanguanent.
La storia
[Modifega | modifica 'l sorgent]El gigant Kalevipoeg el partiss per la Finlandia per cercà la soa mader, che l'è stada rapida. In del sò viagg el compra ona spada, ma el coppa anca el fioeu pussee grand del ferree dopo 'na discussion. El ferree el malediss la spada, e le butta dent a on fiumm.
Tornaa indree, el Kalevipoeg el devegn el re de l'Estonia, dopo avè battuu i sò fradei in d'ona gara a lancià i sass. El costruiss torr e fortin. Despoeu d'avè faa 'sti robb, el partiss fina ai confin del mond per slargà el sò savè. El riva a l'Inferno, el batt el Demoni e 'l salva tre tosann.
Dopo 'na longa guerra che l'ha portaa la ruvina in Estonia, el Kalevipoeg el ghe lassa el trono al sò fradell Olev e 'l ne va in gir per i bosch. Rivaa a on fiumm, el troeuva la spada maledetta del ferree, ghe 'l ghe taja i gamb giò de mezz. Inscì el moeur e 'l va in Paradis. La dea Taara, d'acordi cont i alter divinità, la fa tornà in vita el Kalevipoeg, e la ghe tacca anmò i gamb, per fàll vegnì el guardian de l'Inferno.