Rob Ehrens

Dit artikel is gesjreve in 't Gelaens. Ómdat 't plaatsgebónge is, maogs doe 't ómzètte nao 't Echters, es te dit dialek sjpriks.

Rob Ehrens (Ech, 30 oktober 1957) is eine veurmalige Nederlandjse sjprèngruter en rutercoach.

Es sjprèngruter behaolde hae circa dertig Grand Prix euverwinninge. In 1988 deeg hae mit aan de Olympische Sjpele in Seoel en behaolde doa mèt zien paerd Olympic Sunrise ein individuele 16e plaatsj en ein achste plaatsj mèt ’t team dat wiejer besjtóng oet Jos Lansink, Jan Tops en Wout-Jan van der Schans.

Saer 2002 is hae op verzeuk van de KNHS bóndjscoach van de Nederlandse equipe. Hae waas o.a. de begeleijer van de Nederlandjse equipe nao de Olympische Zomersjpele 2008 in Peking. Dat team besjtóng oet Angelique Hoorn, Marc Houtzager, Gerco Schröder, Vincent Voorn en es reserve Leon Thijssen.

Op 24 mieërt 2007 woort Ehrens biej Indoor Brabant oetgerope tot Paerdesjportman van 't Jaor, waeges 't behaole van 't waereldkampioensjap mèt zien team. Ehrens óntving hiejveur 't Zilvere Paerd, oetgereik door Jan Willem Körner.

Anno 2008 haet hae eine eige hanjels- en sjprèngsjtal in Wieërt. Ziene zoon Robbert Ehrens (gebaore 8 juni 1986) is ouch sjprèngruter.

• 1980 in Hickstead: Groate Pries van Hickstead – 2e plaatsj individueel en 3e plaatsj in teamverbandj mèt zien paerd Koh I Noor
• 1988 in Hickstead: winnaer Groate Pries van Hickstead mèt Sunrise
• 1988: winnaer Jumping Amsterdam mèt Olympic Sunrise
• 1988 - Olympische Zomersjpele 1988 in Seoel, 16e plaatsj individueel en 8e plaatsj in teamverbandj.

• 2005 - Brónze medajje mèt zien team op 't Europees kampioensjap.
• 2006 - De waereldtitel mèt zien team (besjtaonde oet Jeroen Dubbeldam, Piet Raijmakers, Gerco Schröder en Albert Zoer) op de Waereldrutersjpele in Aoke.
• 2014 - De waereldtitel mèt Jeroen Dubbeldam mèt o.a. zien paerd Zenith FN en de waereldtitel mèt zien team (besjtaonde oet Jeroen Dubbeldam, Maikel van der Vleuten, Gerco Schröder en Jur Vrieling) op de Waereldrutersjpele in Normandië.