Einseleakkelej
Dit artikel is gesjreve (of begós) in 't Mofers. Laes hie wie v'r mit de versjillende saorte Limburgs ómgaon.
d'n Einseleakkelej (Aquilegia einseleana) is 'n euverblievendje plantj oete ranonkelfemielje (Ranunculaceae), die veural is te vinjen inne subalpien zaon vanne zujelike enne oeastelike Alpe.
De plantj greutj veurnamelik op werm plaatsen op kalksteinbaom, wie graaslenj, bósrenj en puunhellingen inne subalpien zaon vanne hoeagberg toet op 1.800 m huuegdje.
d'n Einseleakkelej is 'n euverblievendje, kroedechtige plantj, mit 'ne meistes ónvertakdje, toet 45 cm langen, óngeraan kalen en op baoven aan kleerechtig behaordje bloomsstengel. De gróndjblajer zeen gesteeldj, dóbbeldrietalig, ónbehaordj of ane baovekantj sjaars behaordj, mit 'nen ónregelmaesig gekarteldje blaadrandj. De versprèdj-stäöndje stengelblajer zeen klènder, inkelveljig en zittendj.
De blome zeen knakkendj, toet 3,5 cm lank en viefdeilig. Zowaal de oetgesprèdje kelchblajer wie de inne midde gebunjeldje kroeanblajer zeen blawpaars toet pórper-gekluuerdj. De späör baovenane kroeanblajer zeen, in taengestèlling toet die vanne meiste anger akkelej, rech en bolvörmig anen toep. De maeldräöj zeen felgael-gekluuerdj en staeke neet boete de bloom oet.
De plantj bleutj van junie toet julie.
De botanische naam is 'n ieërbetoean ane Beierse botanicus en dokter August Max Einsele (1803-1870), dae de plantj haw óntdèk.