Obesia

Obesia es un disturba medical, a veses regardada como un maladia, en cual la gras de corpo cumula tan multe ce lo pote ave efetos negativa a la sania. On clasi persones como obesa cuando sua indise de masa corpal (IMC) - la pesa de un person divideda par la altia de la person cuadrida - es supra 30 kg/m ²; la estende de 25 a 30 kg/m ² es definida como suprapesosa. Alga paises de Asia este usa valuas plu basa per calcula obesia. Obesia es un causa major de descapasia e es corelatada con maladias e disturbas diversa, spesial maladias cardiovascular, diabete tipo 2, apnea blocinte de dormi, alga tipos de canser, e artrose.

Obesia ave causas individua, sosioeconomial e ambiental. Alga causas conoseda es dieta, ativia fisical, automati, urbani, afetablia jenetical, medisines, disturbas mental, politicas economial, disturbas endocrin, e esposa a cimicales cual disturba la sistem endocrin.

An si la plu de persones obesa a cualce tempo atenta perde pesa e susede frecuente, manteni la perde de pesa per dura longa es rara. On ave no interveni eficas, bon definida e fundida sur demostras per preveni obesia. La preveni de obesia nesesa un stratejia complicada, incluinte intervenis a niveles sosial, comunial, familial e individua. Cambias a la dieta e eserse es la tratas xef recomendada par la profesales medical. On pote boni la cualia de la dieta par redui la consuma de comedas con multe enerjia, como los alta en gras o zucares, e par aumenta la consuma de fibre dijestal, si esta elejes dietal es disponable a bon custa. On pote usa medisines, en junta con un dieta conveninte, per redui la apetito o diminui la asorbe de gras. Si dieta, eserse e medisin no es eficas, on pote usa un balon gastral o fa un opera per redui la volum de la stomaco o la longia de la intestines, produinte un sensa de plenia plu temprana, o un capasia reduida de asorbe nurintes de comedas.

Obesia es un causa xef de mori prevenable tra la mundo, con tasos aumentante en adultes e enfantes. En 2022, plu ca un bilion persones ia es obesa tra la mundo (879 milion adultes e 159 milion enfantes), representante plu ca du veses la casos de adultes (e cuatro veses plu alta ca la casos de enfantes) rejistrada en 1990. Obesia es plu comun entre femes ca entre omes. Oji, on ave un opina nonfavorable de obesia en la plu de la mundo. Ma alga cultures, pasada e presente, ave un opina favorable de obesia, vidente lo como un simbol de ricia e fertilia. La Organiza Mundal de Sania, la SUA, Canada, Nion, Portugal, Deutxland, la Parlamento European e sosias medical, per esemplo la Asosia Medical American, clasi obesia como un maladia. Otras, como la Rena Unida, no fa lo.