Linguas salix

La linguas salix es un grupo de 23 linguas de la Pasifica norde-ueste (un rejion de America Norde cual conteni la statos american de Washington, Oregon, Idaho, e Montana, e la provinse canadian Columbia Brites. Los es marcada par aglutina e consonantes silabal. Per esemplo, la parola en nuhalc - clhp’xwlhtlhplhhskwts’ (API: [xɬpʼχʷɬtʰɬpʰɬːskʷʰt͡sʼ]) - cual sinifia "el ia ave (como sua posese) un planta (corneo canadian)", ave 13 consonantes constrinjente en un linia con no vocales fonetica o fonemica. La linguas es jeografial continuante, con la eseta de nuhalc, en la costa sentral de Columbia Brites, e la lingua estinguida tilamuc a la sue a la costa sentral de Oregon.

Tota linguas salix es videda como menasada seria, algas con sola tre o cuatro parlores. La linguas estinguida es comun nomida "linguas dorminte". En la sentenio 21, poca linguas salix ia ave plu ca 2000 parlores. Parlores fluente de cuasi tota linguas salix es jeneral plu ca sesdes anios, e otras con sola parlores supra 80 anios. Linguas salix es plu comun scriveda usante la scrive fonetica americaniste per maneja la vocales e consonantes variosa cual no esiste en la plu de alfabetas moderne. Multe grupos ia evolui sua propre modos de la alfabetas latina, per esemplo st'at'imc.

Cualias de esta familia inclui:

• armonia posvelal
• esiste de silabas sin vocales
• redupli gramatical
• usa de enfisas, metatese, glotali
• asentia de tempos verbal
• asentia de nomes (controversial - vide a su!)
• ordina VSO (verbo-sujeto-ojeto)
• no marca de caso
• pronomes tipal afisas de verbos
• nomes personal deveni tabu per un periodo

Tota parolas estra particulos gramatical pote aveni como la nucleo de un predica (incluinte parolas con sinifias tipal "nomin") o en un partisipante (incluinte parolas con sinifias tipal "verbin" cual refere a avenis). Parolas nomin es egal a "es + nom" cuando usada como predicas, como, en la salix de la streta Puget, sbiaw cua sinifia "(es un) coiote". Parolas verbin, cuando usada como partisipantes, es egal a "algun ci + verbo" o "verbo + er". Per esemplo, denova en la salix de la streta Puget, ʔux̌ʷ sinifia "(algun ci) vade".