Ipopotamo

La ipopotamo es un mamal grande, semiacual, e xef erbivor de Africa susaharan, e un de sola du spesies esistente en sua familia con sua relata la ipopotamo pigmea. La nom orijina en elinica ἱπποπόταμος (cavalo de rio). Pos la elefante e la rinosero, la ipopotamo es la mamal tre en grandia estra la mamales de mares. An si los sembla porcos, la relatas la plu prosima es la setaseos, de cual los diverje sirca 55 milion anios a ante.

Ipopotamos es reconoseda par sua corpos barilin, bocas vasta con dentones canin, corpos cuasi sin capeles, gamas colonin, e grandia. Adultes pesa sirca 1500 kg per mases e 1300 kg per femas. An si los ave corpos grande e gamas corta, los es capas de core sirca 30 km/h tra distantias corta.

La ipopotamo abita rios, lagos, e pantanes rizoforosa, do la mases teritorial domina un estende de rio e grupos de sinco a 30 femas e enfantes. En a dia, los fria se par resta en la acua o fango. Reprodui e pari aveni en acua. An si ipopotamos reposa prosima con lunlotra en la acua, los come a pasto solitar e la ipopotamos no es teritorial sur tera. La ipopotamos es entre la animales la plu perilosa en la mundo e es multe violente e nonpredisable. Los es menasada par la perde de abita e xasa nonlegal per sua carne e dentes canin de ivor.