Clima

Clima es la state de la atmosfera en un rejion a un tempo o periodo spesifada. Climatolojia es la studia siensal de clima, e meteorolojia es la usa de la siensa per predise clima local.

En climatolojia, clima es la crea de models fundida sur statisticas de la situa atmosferal tra la mundo. Lo es mesurada par oserva la varia de temperatur, umidia, presa atmosferal, presipita, conta de particulas atmosferal, e otra variables tra un periodo longa. La clima local es derivada de esta modeles.

La clima local de un rejion es efetada par sinco composantes: atmosfera (la aira), idrosfera (mares, lagos, rios, etc), criosfera (temperatures), litosfera (la solo, rocas, etc), e biosfera (plantas, animales, e otra viventes).

Paleoclimatolojia es la studia de climas antica. Car oservas direta de clima no es disponable ante la sentenio 19, paleoclimas es deduida de variables nondireta cual inclui la depones en la fondos de lagos, la nucleos de jelo, la anelos de arbores e coral. Modeles de clima es modeles matematical de climas pasada, presente, e futur. Cambias de clima pote aveni tra periodos longa o corta como la resulta de multe fatores.

Per esemplo, un cambia de 3 grados celsius en la promedia de temperatur anial de la mundo coresponde a un cambia de isoterma de sirca 300 a 400 km latitude (en la zona temperada) o 500 m en altia. Donce, on ta espeta ce viventes va move a supra de altia, o en la dirije de la polos e a via de la ecuator, como la zonas de clima cambia. Si la clima mundal inclui un crese de temperatur, on pote espeta ce, entre multe efetos variosa, la jelo de la rejiones artica e antartica, e lo de la glasias en la montanias, ta fonde, cual pote leva la mares par multe sentimetres o an metres, cual, en ordina, ta engoli areas grande de la costas, cual alora ta causa la migra de miliones de persones a locas plu alta... La cambia de clima (o caldi global) es un problem multe grande de nosa eda, probable causada en la plu parte par nosa usa de petrolio e otra cimicas.