Bisicle

Un bisicle es un veculo con du rotas, la un pos la otra, un manico per dirije, e un o plu sejas. Lo es tipal propulsada par la ata de la montor, nomida un bisicliste, sur la pedales.

Bisicles ia es introduida en la sentenio 19 en Europa. Par la temprana de la sentenio 21 on ia ave plu ca un bilion bisicles. On ave multe plu bisicles ca autos. Bisicles es la modo xef de transporta en multe rejiones. Los furni ance un forma popular de recrea, e ia es adatada per usa como juetas de enfantes. Bisicles es usada per eserse fisical, aplicas militar e polisial, servis de mesajor, corsa de bisicles, e siclisme artal.

La forma e desinia fundal de un bisicle vertical o "de securia" tipal ia cambia poca de la model prima con cadena ia es developada sirca 1885. Ma, multe detalias ia es bonida, spesial de la ariva de materias moderna e desinia aidada par computador. Estas ia permete un sperde de desinias spesialida per multe tipos de siclisme. En la sentenio 21, bisicles eletrical ia deveni popular.

La inventa de la bisicle ia ave un efeto enorme a sosia, en relata con e cultur e la avansa de metodos industrial moderna. Alga composantes cual ia jua un rol clavin en la developa de la automobil ia es inisial inventada per usa en la bisicle, incluinte cosinetos de bales, numaticos, piniones con cadena, e rotas de raios tensa.