Bantu

La linguas bantu composa un ramo tradisional de la familia de linguas nijer-congo. On ave sirca 250 linguas bantu. La linguas es parlada xef este de sude de Camerun, en la rejiones conoseda como Africa sentral, Africa sude-este, a Africa Sude. La lingua con la cuantia la plu grande de parlores es suahili, con sirca 180 milion parlores. La plu de los usa suahili como un lingua du, ma lo es la lingua prima de sirca du milion.

Otra linguas major de la familia inclui zulu, con 27 milion parlores (15.7 milion como lingua de), e xona, con sirca 11 milion parlores. Ciniaruanda e cirundi (comprendable mutual) ave 12.4 milion parlores.

La cualia la plu notable de la gramatica de la linguas bantu es la usa estendeda de afisas. Cada nom es un parte de un de multe clases, simil a jeneros mas e fema de alga linguas european. La clase es indicada par un prefisa a la nom e como marcas a la verbo e cualias de la nom. Pluralia es indicada par un cambia de clase e un cambia de prefisa.

La verbos ave ance un cuantia de prefises, an si en la linguas de la ueste trata los como parolas autonom. En suahili, per esemplo, Mtoto mdogo amekisoma sinifia "la enfante peti ia leje lo (la libro)". Mtoto (enfante) governa la prefisa m- de la ajetivo, e la prefisa sujeto a la verbo a-. Alora on ave la marca de la pasada -me- e la marca de la ojeto -ki- cual acorda con la parola implicada kitabu ("book", de la arabi kitab). Si on plurali "enfantes", on debe dise Watoto wadogo wamekisoma, e si on plurali ance "libros", on debe disse Watoto wadogo wamevisoma.

Parolas bantu es tipal construida con silabas abrida de la tipo CV (consonante-vocal), con la plu de linguas avente sola esta tipo. La lingua buxong ave consonantes final, e la lingua tonga de malaui ave vocales final farfuliada, an si los es scriveda. Per la plu de la linguas bantu, parolas es tipal CV, VCV, CVCV, VCVCV, etc, e tota parolas fini con un vocal.