Williamina Fleming

Williamina Fleming
Gebuertsnumm	Williamina Paton Stevens
Gebuer	15. Mee 1857
Gestuerwen	21. Mee 1911 Boston
Nationalitéit	USA, Vereenegt Kinnekräich
Aktivitéit	Astronom
Member vun	American Astronomical Society, Société astronomique de France, Royal Astronomical Society

Dësen Artikel zitéiert keng Quellen. Wannechgelift, hëlleft dësen Artikel ze komplettéieren, andeems Dir konkreet Quellendonnéeë bäisetzt.

D'Williamina Paton Stevens Fleming, gebuer de 15. Mee 1857 zu Dundee a Schottland, a gestuerwen den 21. Mee 1911 zu Boston, am Massachusetts, war eng US-amerikanesch Astronomin. Si huet e System fir d'Klassifizéierung vun de Stären entwéckelt^[1] a vill Gasniwwelen, Stären an Novaen entdeckt.

Hir Eltere waren de Robert Stevens an d'Mary Walker Stevens. D'Williamina war zu Dundee an d'Schoul gaangen a gouf mat 14 Joer Léierin. Si huet sech mat dem James Orr Fleming bestuet. Mat 21 Joer ass déi jonk Koppel op Boston geplënnert. Wéi si iwwer hirem Jong Edward war, huet hire Mann si eleng gelooss. Sou huet si missen Aarbecht sichen, fir hire Liewensënnerhalt ze verdéngen.

Si krut eng Plaz als Déngschtmeedchen am Haus vum Professer Edward Charles Pickering. De Pickering war mat senge männlechen Assistenten um Harvard College Observatoire onzefridden a sot, säin Déngschtmeedche kéint deenen hir Aarbecht besser maachen. Sou huet de Pickering 1881 d'Willimina ugestallt, Büroaarbechten am Observatoire ze maachen. An hirer Zäit op där Plaz huet si sech e System fir d'Klassifizéierung vun de Stären ausgeduecht an huet gehollef, et anzeféieren. D'System baséiert dorop, all Stär e Buschtaf bäizeuerdnen an Ofhängegkeet dovun, wéi vill Waasserstoff a sengem Spektrum observéiert konnt ginn. A-Stäre haten am meeschte Waasserstoff, B-Stäre e bëssi manner, a sou weider.

D'Annie Jump Cannon huet dee System verbessert an eng méi einfach Klassifizéierung opgrond vun der Temperatur entwéckelt. D'Fleming huet sech un der Katalogiséierung vun de Stäre bedeelegt, déi spéider als Henry-Draper-Katalog publizéiert gouf. Bannent 9 Joer huet si esou méi wéi 10.000 Stäre katalogiséiert. Bei hirer Aarbecht huet si 59 Gasniwwellen, 310 Verännerlech Stären an 10 Novaen entdeckt. 1907 Huet si eng Lëscht vun 222 verännerleche Stären, déi si entdeckt hat, publizéiert.

Si krut d'Verantwortung fir Dosende vu Fraen, déi ugestallt waren, mathematesch Klassifikatiounen duerchzeféieren, a si huet d'Publikatioune vum Observatoire redigéiert. 1899 krut si den Titel Kurator fir Astronomesch Fotografien an am Joer 1906 gouf si Éieremember vun der Kinneklecher Astronomescher Gesellschaft vu London - déi éischt Fra, déi déi Éier krut. Kuerz duerno krut si ee Éierestipendiat um Wellesley College.

Kuerz virun hirem Doud gouf si vun der Mexikanescher Astronomischer Gesellschaft fir d'Entdeckung vun neie Stäre mat der Guadalupe Almendaro Medail ausgezeechent. Si ass 1911 zu Boston un enger Longenentzündung gestuerwen.

Portal Astronomie

Commons: Williamina Fleming – Biller, Videoen oder Audiodateien

1. ↑ (en)Williamina Paton Stevens Fleming | Discoverer of Stars, Harvard Observatory & Astronomy Pioneer | Britannica. www.britannica.com. Gekuckt de(n) 19.08.2024.