Harry Potter and the Chamber of Secrets (filem)
| Harry Potter and the Chamber of Secrets | |
|---|---|
| Disutradarani | Chris Columbus |
| Diprodhuseri | David Heyman |
| Ditulis déning | Skénario: Steve Kloves Novèl: J. K. Rowling |
| Dibintangi | Daniel Radcliffe Rupert Grint Emma Watson Richard Harris Kenneth Branagh Jason Isaacs Christian Coulson Robbie Coltrane |
| Dimusiki | John Williams Jinupuk lan kaayahi: William Ross |
| Sinématografi | Roger Pratt |
| Dibesut déning | Peter Honess |
Perusahaan prodhuksi | |
| Dibabar déning | Warner Bros. Pictures |
Tanggal metu | London premiere: 3 Novèmber 2002 United States: 14 Novèmber 2002 Worldwide: 15 Novèmber 2002 |
Suwéné | 161 menit |
| Nagara | Karajan Manunggal Amérikah Sarékat |
| Basa | Basa Inggris |
| Rantaman | US$100 yuta |
| Kalarisan | $878.643.482 |
Harry Potter lan Kamar Resiya utawa Harry Potter and the Chamber of Secrets yaiku sawijining filem ing taun 2002 kang kaarahaké déning Chris Columbus lan kababar déning Warner Bros. Pictures. Filem iki dijupuk saka novèl fantasi J. K. Rowling kang mawa irah-irahan kang saèmper uga. Punjeraning crita adhedhasar taun kaping pindhoné Harry Potter ing Sekolah Sihir Hogwarts lan nalika iku ahli warisé Salazar Slytherin kasil mbukak Kamar Resiya, banjur ngeculaké monster kang nggawé sawetara warga sekolah malih kaku saèmper kaya watu. Paraga utama ing filem iki yaiku Daniel Radcliffe minangka Harry Potter, Rupert Grint minangka Ron Weasley , lan Emma Watson minangka Hermione Granger.
Laku carita
[besut | besut sumber]Carita diwiwiti nalikané Harry Potter dipréntah supaya cepak-cepak lan reresik omah awit koléga kerjané Vernon Dursley bakalé rawuh. Sawisé rampung anggoné cepak-cepak omah, banjur Harry dikon lumebu menyang kamaré. Nalika ing kamar, Harry ketemu sawijining peri omah aran Dobby. Dobby meling marang Harry amrih ora bali menyang Hogwarts, nanging Harry kukuh nulak piwelingé Dobby iku mau. Banjur Dobby ngobrak-abrik omah lan gawé bubrah patemoné Vernon. Vernon banjur ngancingi Harry ing jeron kamaré amrih ora bisa bali menyang Hogwarts. Nanging Ron, Fred, lan George Weasley marani klawan nunggang montor kang bisa mabur kanggo nylametaké Harry saka kulawargané Vernon. Harry banjur digawa menyang omahé kulawarga Weasley aran The Burrow.[1]
Nalika ing The Burrow, Harry pethukan karo Ginny, kang ora liya yaiku adhiné Ron. Ginny bakal wiwit sekolah ing Hogwarts uga ing taun iki, lan Harry nandang asmara lawan Ginny. Harry uga pethukan karo bapaké Ron, nama Arthur Weasley. Banjur Harry lan kulawarga Weasley lunga menyang Diagon Alley mawa bubuk Floo. Nalika blanja, Harry pethukan karo Gilderoy Lockhart, sawijining juru sihir kang kaloka lan uga minangka panganggit buku. Ing papan iku, Harry uga pethukan karo Draco lan Lucius Malfoy kang karoné iku ngalem Voldemort lan ngécé Harry, Hermione, lan kulawarga Weasley.[1]
Sasuwéné taun ajaran, Colin Creevey, Justin Finch-Fletchley, Hermione lan uga memedi Gryffindor Sir Nicholas ditemokaké kaku, lan buku cathetan padinané Tom Riddle ngilang. Harry lan Ron mutusaké kanggo mara menyang omahé Hagrid, nanging nalika durung rampung Hagrid anggoné njlèntrèhaké babagan sapa sajatiné kang mbuka Kamar Resiya, ujug-ujug Mantri Sihir Cornelius Fudge lan Lucius Malfoy teka ing omahé Hagrid. Sawetara iku Ron lan Harry langsung ndhelik mawa Kemul Gaib. Mantri Sihir ngandharaké manawa Dumbledore ditangguhaké minangka kepala sekolah lan Hagrid dicekel awit diarani minangka wong kang wis mbuka Kamar Resiya. Sadurungé Hagrid digawa menyang penjara Azkaban, dhèwèké ngandhani Harry lan Ron amrih ngetutaké kemangga menyang Alas Larangan kanggo mangertèni kang sajatiné.[1]
Banjur Harry lan Ron nglakoni apa kang wis diweling Hagrid. Ora dinyana karoné padha pethukan karo Aragog, kemangga raseksa kang diarani minangka kang wis matèni siswa ing sèket taun kepungkur. Aragog mratélakaké manawa dhèwèké iku dudu raseksa kang wis matèni siswa lan uga Hagrid iku ora salah. Anak-anaké Aragog banjur nyerang Harry lan Ron, nanging begjané montor maburé kulawarga Weasley teka kanggo nylametaké Harry lan Ron.[1]
Harry lan Ron nemokaké dluwang kertas ing tangané Hermione kang ngandharaké manawa raseksa kang ana ing Kamar Resiyaiku Basilisk. Karoné uga krungu manawa Ginny diculik menyang Kamar Resiya, mula Lockhart diutus para guru amrih bisa nylametaké Ginny. Nanging Lockhart malah wedi lan arep minggat lunga, banjur Harry lan Ron kasil nyekel Lockhart. Saka prastawa iki dimangertèni manawa carita-caritané Lockhart kang nggumunaké lan tinulis ing bukuné iku jebul mung palsu, dhèwèké migunakaké mantra pambusak-mémori para juru sihir, banjur dhèwèké njupuk préstasiné para juru sihir iku mau.[1]
Wong telu iku mau banjur nemokaké dalan kanggo lumebu menyang Kamar Resiya ing kolah Moaning Myrtile, kenya kang mati jaman biyèn nalika kamar iku dibuka. Banjur telu-teluné padha lumebu kamar lan nemokaké lungsungan ula gedhé. Sawisé Lockhart éthok-éthok sempaut, banjur dhèwèké ngupaya ngendhegaké Harry lan Ron mawa mantra pambusak-mémori, nanging jalaran kang anggoné ngucap mantra iku mawa sadané Ron kang rusak, banjur mantrané iku mbalik ngenani awaké dhéwé. Lockhart kang ilang mémoriné banjur agawé guwané rubuh kang misahaké antarané Harry lan Ron. Harry nuli kasil bisa nemokaké Ginny, ujug-ujug Tom Riddle teka lan ngandharaké manawa dhèwèké iku sajatiné mémori kang sinimpen ing jeron buku cathetan padinan lan kang mbuka Kamar Resiyaiku sajatiné ya Ginny Weasley kang kena daya hipnotisé, banjur Ginny uga kang ngutus Basilisk amrih nyerang ing para warga sekolah lan uga kang nulis layang ing témbok mawa getih. Harry sadhar manawa Riddle iku minangka ahli warisé Slytherin lan uga minangka nalika Lord Voldemort nalika rumaja. Riddle banjur ngetokaké lan ngutus Basilisk supaya matèni Harry, nanging begjané manuk Phoenixé Dumbledore kang aran Fawkes teka kanggo ngéwangi Harry. Fawkes nyerang matané Basilisk saéngga picak. Banjur Fawkes mènèhi Topi Selèksi marang Harry, lan Harry ndudut pedhang Godric Gryffindor saka jeroné. Nalika Basilisk mangap, Harry nuli njojoh cangkemé nganti tembus endhasé, nanging racun siyungé Basilisk nancep ing tangané Harry. Harry kasil ngrumpak Riddle klawan njojoh buku cathetan padinan mawa siyung racuné Basilisk. Ginny banjur sadhar lan weruh Harry kang wis ra nduwé daya manèh, nanging Fawkes nambani tatuné Harry mawa ilu matané. Fawkes banjur nggawa metu Harry lan liyané saka Kamar Resiya.[1]
Dumbledore banjur nerusaké jabatané minangka kepala sekolah lan ngirim layang kanggo mardikakaké Hagrid saka Azkaban. Pungkasané Harry mangertèni manawa Lucius iku kang nyèlèhaké buku cathetan padinan iku marang Ginny lan Dobby iku peri omah kulawarga Malfoy. Banjur Harry ngrékadaya Lucius amrih mènèhi kaos sikil marang Dobby, saéngga Dobby mardika saka kulawargané Malfoy. Ing pahargya pésta pungkasaning warsa, kabèh kurban kang kaku jalaran Basilisk wis padha mari, lan Hagrid nampa pangayubagya awit baliné menyang Hogwarts manèh.[1]
Paraga
[besut | besut sumber]- Daniel Radcliffe minangka Harry Potter
- Rupert Grint minangka Ronald Weasley
- Emma Watson minangka Hermione Granger
- Richard Harris minangka Albus Dumbledore
- Maggie Smith minangka Minerva McGonagall
- Alan Rickman minangka Severus Snape
- Kenneth Branagh minangka Gilderoy Lockhart
- Robbie Coltrane minangka Rubeus Hagrid
- Warwick Davis minangka Filius Flitwick
- David Bradley minangka Argus Filch
- Christian Coulson minangka Tom Marvolo Riddle/Lord Voldemort
- Robert Hardy minangka Cornelius Fudge
- Jason Isaacs minangka Lucius Malfoy
- Tom Felton minangka Draco Malfoy
- Richard Griffiths minangka Vernon Dursley
- Fiona Shaw minangka Petunia Dursley
- Harry Melling minangka Dudley Dursley
- John Cleese minangka Nick Kang-Sirahé-Mèh-Thugel
- Mark Williams minangka Arthur Weasley
- Julie Walters minangka Molly Weasley
- Matthew Lewis minangka Neville Longbottom
- James Phelps minangka Fred Weasley
- Oliver Phelps minangka George Weasley
- Chris Rankin minangka Percy Weasley
- Bonnie Wright minangka Ginny Weasley
- Devon Murray minangka Seamus Finnigan
- Joshua Herdman minangka Gregory Goyle
- James Waylett minangka Vincent Crabbe
Filem kang laris
[besut | besut sumber]Harry Potter and the Chamber of Secrets nggelar world premier ing Odeon Leicester Square rikala 3 Novèmber 2002,[2] lan resmi karilis ing Inggris Raya lan Amérika Sarékat rikala 15 Novèmber 2002.[3] Filem iki mecahaké rékor rikala dina purwakané. Ing AS lan Kanadha, filem iki ing purwakané cinathet ngasilaké $ 88,4 yuta ing 3.682 biyoskup, mula uga ginelar minangka asil paling gedhé nomer 3 rikala purwakaning dina, mapan ana sangisoré filem Spider-Man lan Harry Potter and the Sorcerer's Stone.[4] Filem iki ngasilaké total $ 879 yuta, miturut gunggungé pangasilan pamuteran sajagad.[5][6] Mula filem iki minangka filem paling laris angka 2 sajagad rikala taun 2002, mapan ana saburiné filem The Lord of the Rings: The Two Towers.[7]
Deleng uga
[besut | besut sumber]- Harry Potter and the Sorcerer's Stone (filem)
- Harry Potter and the Prisoner of Azkaban (filem)
- Harry Potter and The Goblet of Fire (filem)
- Harry Potter and the Order of the Phoenix (filem)
- Harry Potter and the Deathly Hallows 1
- Harry Potter and the Deathly Hallows 2
Rujukan
[besut | besut sumber]- ↑ a b c d e f g Harry Potter and the Chamber of Secrets (2002) - IMDb, dibukak ing 2020-07-04
- ↑ "Fans Spellbound at Potter Premiere" (ing basa Inggris Karajan Manunggal). 2002-11-03. Dibukak ing 2020-06-13.
- ↑ ""Harry Potter and the Chamber of Secrets" Movie Released Worldwide". MuggleNet (ing basa Inggris Amérika Sarékat). 2002-11-15. Dibukak ing 2020-06-13.
- ↑ "'Harry Potter' Potent with $88.4 Million Weekend". Box Office Mojo. Dibukak ing 2020-06-13.
- ↑ "Harry Potter and the Chamber of Secrets". Box Office Mojo. Dibukak ing 2020-06-13.
- ↑ "Chamber of Secrets sneaks pasts Jurassic Park". The Numbers. Dibukak ing 2020-06-13.
- ↑ "2002 Worldwide Box Office". Box Office Mojo. Dibukak ing 2020-06-13.