John Locke

John Locke (Aagos 29, 1632 – Aktuoba 28, 1704) wehna wan Ingglish filasifa. Piipl kansida Locke di fos British impirisis bot im iikwali impuotant tu suoshal kanchrak tiori. Im aidiya dem av nof influens pan di development a epistimalaji an palitikal filasifi, an im kansida bai nof az wan a di muos influenshal Iej a Enlaitnment tingka dem, klasikal ripoblikan, an kanchribyuuta tu libaral tiori. Im raitin dem influens Voltier an Rousseau, nof Skatish Enlaitnment tingka, an nof Amerikan revaluushaneri liida. Da influens abvios ina di Amerikan Deklarieshan a Indipendens. Di tiori a di main, bai Locke, sait aafn az di arijin fi madorn kansepshan a aidentiti an “di self”, an yu kyan obzorv dis ina di lieta wok a filasifa laik David Hume, Jean-Jacques Rousseau an Immanuel Kant. Locke wehna wan di fos filasifa dem fi difain imself chuu di kantinyuiti a “kanchosnes”. Im put faawod se di main a wehn wan “emti sliet” ar “tabula rasa”; dat fi se, difrent fram Kaatiizhan ar Kristiyan filasifi, Locke biliiv se piipl baan widout inbaan aidiya, an se nalij kom bout onggl chuu expiiriens we gyada fram di sens dem.