I morbinosi/Atto IV

Catte. Za che no gh’è nissun, spazzizemo un pocheto.

Betta. Varda, no ghe parlar, se vien sior Giacometo.
So muggier xe tornada.
Catte.   Dasseno?
Betta.   In verità.
De lu no la se fida.
Catte.   Che gran bestialità!
Lo savè, siora Beta, come che mi son fata.
Lo savè che coi omeni mi no fazzo la mata.
Toni xe assae sutilo: no lo vôi desgustar.
Ma giusto co sta siora me la voria cavar.

Anzoletta. Oe, no savè? Sta sera i vuol far un festin.

Catte. Baleremio anca nu?
Anzoletta.   Pol darse un pochetin.
Betta. I darà anca da cena.
Anzoletta.   Sì, ma nu no gh’intremo.
Betta. Quando che i dà da cena, qualcossa magneremo.
Catte. Mi me basta balar.
Anzoletta.   E mi gh’ho el mio dileto
A véder a fenir un certo negozieto.
Quela certa signora che no se sa chi sia,
I dise che la sposa un de sta compagnia.
Mi me par impussibile; ghe vederemo el fin.
Catte. Donca per le so nozze i farà sto festin.
Anzoletta. Pol esser.
Betta.   Sì, seguro, e co ghe xe novizzi,
No ghe mancherà certo nè torte, nè pastizzi.

Giacometto. Pute, bondì sioria.

Catte.   Patron.
Giacometto.   Bondì, fia mia. (a Catte)
Betta. (Oe, no ghe disè gnente, che so muggier ghe sia.
La m’ha dito che tasa). (piano a Catte)
Giacometto.   Coss’è? ghe parlè in rechia?
Betta. No ghe posso parlar?
Giacometto.   Eh, vu se volpe vechia.
Betta. Vecchia a mi?
Giacometto.   Non intendo de parlar de l’età;
Digo che sè una dona, che el fato soo lo sa.
Betta. Certo no son minchiona.

Anzoletta.   Credeu che solamente

Le vostre Veneziane sia brave e sia valente?
Nualtre Zuechine lustrissime no semo,
Ma i nostri catareti¹ anca nu li gh’avemo.
Chi vol pute de sesto, s’ha da vegnir da nu.
Per aria e per bon gusto, Zuechine e po no più.
Se se metemo in testa un galaneto, o un fior,
Sento che tuti dise: le fa cascar el cuor.
In materia de balo, per far de le furlane,
No ne pol impatar² gnanca le Veneziane.
Mi no parlo de mi, che mi no son de quele,
Ma su sta fondamenta le luse co fa stele.
Bei musi, bele vite, penini che inamora.
Se vedessi? ma tute no le vol vegnir fora.
La festa da Venezia vien via sti licardini³,
I va da un cao a l’altro, facendo i paregini⁴,
Col codegugno niovo⁵, col fazzoleto al colo,
Co la vita scavezza⁶ a usanza de bigolo⁷.
Varda, passa, saluda, i se voria butar⁸,
Ma i sol trovar dei ossi duri da rosegar.
Stimemo un Zuechin più assae de un Venezian,
Volemo un mariner, volemo un ortolan.
Se no gh’avemo el gusto de star ala cità,
Ne piase più de tuto la nostra libertà.
Giacometto. Care fie, mi ve lodo. Ma i omeni, me par,
Tuti ne li mesura l’istesso brazzolar⁹.
Mi son un galantomo; cognosso el mio dover.
Anzoletta. Eh, vu faressi meggio tender a la muggier.
Giacometto. Che tendo a le so ore.
Betta.   Cessa veleu, gramazzo?
Anca lu el vien a torse un poco de solazzo.
Xe vere che sta sera i fa un festin?

Giacometto.   Se dise.

Betta. Fene vegnir a veder, care le mie raise¹⁰.
Giacometto. Perchè no? Vederemo.
Catte.   Se vegno, vôi balar.
Betta. E se i dasse da cena, voggio anca mi cenar.
Giacometto. Se no i volesse done, come è stà stamatina?
Betta. Che i voggia anca sta sera sta bela secadina?
Senza done no i bala; co le gh’è, le ghe sta.
Sè tuti galantomeni, savè la civiltà.
Anzoletta. Che bisogno ghe xe, che s’abia da cenar?
Betta. Tasè là, cara vu, no ve ne stè a impazzar.
Giacometto. Basta, farò de tuto, perchè vegnì anca vu,
E se i altri no magna, faremo tra de nu.

Tonina. Bravo, sior Giacometo. Me piasè in verità.

Giacometto. No sè andada a Venezia?
Tonina.   Dasseno che son qua.
Giacometto. Cara siora Tonina, andemo co le bone.
Tonina. Tuto el dì v’ho da veder a star co ste frascone?
Anzoletta. Come parlela, siora?
Catte.   Frascone la n’ha dito.
Betta. A nualtre frascone? Cossa credela?...
Giacometto.   Zito.
Betta. Chi credela che siemo?
Anzoletta.   Semo zente onorata.
Catte. E no semo de quele.
Betta.   E cusì no se trata.
Tonina. Co sta bela insolenza se parla a una par mio?
Feme portar respeto: tocca a vu, sior mario.
Giacometto. Voleu aver creanza? (alle Zuecchine)

Anzoletta.   Ela n’ha strapazzà.

Giacometto. Se parla con maniera. (a Tonino)
Tonina.   Mandele via de qua.
Giacometto. Ande via. (alle Zuecchine)
Catte.   Semo in orto, e ghe volemo star.
Tonina. Fè che le vaga via. (a Giacomello)
Giacometto.   Se no le vol andar. (a Tonina, con collera)
Tonina. Donca vegnì con mi.
Betta.   Vardè che bel mario!
Giacometto. Cossa aveu dito?
Betta.   Gnente.
Catte.   Ande, coreghe drio¹¹.
Anzoletta. Povero pampalugo.
Tonina.   Andemio, o non andemio?
Giacometto. (Se ghe vago, i me burla).
Tonina.   Sior mario, cossa Femio?
Giacometto. (E se no vago, è pezo).
Tonina.   Sì, ve lezo in tel cuor.
Ve cognosso ala ciera, che gh’avè del brusor
Per causa de ste sporche...
Betta.   Oh per diana de dia.
Cate. Coss’è sto strapazzar?
Anzoletta.   Coss’è sta vilania?
Catte. Qua no ghe xe sporchezzi.
Anzoletta.   Ela s’ala insporcà?
Betta. La se vaga a netar....
Giacometto.   Zito, per carità.

Ottavio. Cossa xe sto sossuro¹²?

(affettano il veneziano, e lo parlano male)
Lelio.   Cossa xe sto fracasso?

Giacometto. (Sior Ottavio e sior Lelio, sì tolemose spasso).

Ottavio. Questa xe mia moggier. (accennando Betta)
Lelio.   Questa ghe xe mia sposa.
(accennando Anzoletta)
Ottavio. Questa xe mia sorella. (accennando Catte)
Lelio.   De Giacomo morosa.
Tonina. (Me vien suso el mio caldo).
Betta.   (Bisogna segondar).
(piano a Catte e Anzoletta)
Giacometto. (I parla el venezian, ma no i lo sa parlar).
Tonina. Se una è vostra muggier, l’altra vostra sorela,
Disè, con mio mario cossa gh’intrela quela?
(accennando Catte)
Subito andemo via. (a Giacometto)
Ottavio.   Come! el xe maridao?
Lelio. E el ghe xe vegnù qua per far l’inamorao?
Tonina. Sentìu? (a Giacometto)
Ottavio.   Cossa disìu? (a Giacometto)
Giacometto.   Mi no so cossa dir.
(Me vien da ghignazzar, no me posso tegnir).
Tonina. Ride, sior Giacometto? Ancora me burlè?
Giacometto. Mi no rido de vu.
Tonina.   El bel omo che se!
Ottavio. Presto, andemo al festin. (a Bella)
Betta.   Son qua, caro paron.
Lelio. Andemoghe anca nu. (ad Anzoletta)
Anzoletta.   Se me volè, ghe son.
Lelio. E sta puta con chi ghe xanderala?
Betta.   (Oh belo!)
Cate ghe xanderà col so caro fradelo.
Lelio. (Parlo ben veneziano?) (piano a Giacomelto)
Giacometto.   (In venezian perfeto).
(piano a Lelio)
Ottavio. Che ghe dago la man la Cate a Giacometo.
Giacometto. Sentìu?

Lelio.   Cossa disìu?

Tonina.   Chi xe sti papagai?
Ottavio. Semo do Giudechini, che ghe xe qua arivai.
Tonina. No, sto vostro parlar nol xe da Veneziani;
Me parè do foresti, parè do oltramontani.
Scoverzive chi se, ve prego per favor.
Ottavio. Mi ghe xe mariner.
Lelio.   Mi ghe xe pescador.
Tonina. Col vostro mi ghe xe no me l’ave impiantada.
Mi ghe xe, mi ghe xe... la xe una baronada.
Co le donne civil no se trata così.
E ve lo digo in fazza.
Ottavio.   Gh’ave rason, uì¹³.
Tonina. Uì, sior Venezian?
Giacometto.   Mo no vedeu, minchiona,
Che i xe do cari amici, che ve dà la baldona?¹⁴
Tonina. Ben, se i vol minchionar, se i gh’ha sta bela peca,
Che i vegna a minchionar quele dela Zueca.
Betta. Come sarave a dir?
Catte.   Chi credela che siemo?
Betta. Burlar le Zuechine?
Catte.   Per diana, no ghe stemo.
Anzoletta. No semo spiritose, come le Veneziane,
Ma gnanca no se femo piantar dele panchiane.
Ottavio. Eh scacciate, signora, codesta gelosia.
Lelio. Vi vogliamo guarire da tal malinconia.
Tonina. No la xe la maniera.
Giacometto.   Cossa avemio da far?
Ottavio. Presto, andiamo al festino. (a Tonino)
Giacometto.   Presto, andemo a balar.
(a Tonino)
Tonina. No vôi.

Ottavio.   Non c’è risposta¹⁵.

Lelio. Ci dovete venire; siamo venuti a posta.
Giacometto. Mo via, cara muggier..
Tonina.   Chi ghe sarà a sta festa?
Ottavio. Gente di ordin vari, ma tutta gente onesta.
Betta. Ghe saremo anca nu. (con aria grave)
Catte.   Co nu la vegnirà.
Tonina. Oh, co ghe se vualtre, gh’è al fior de nobiltà.
(ironico)
Anzoletta. Se no semo lustrissime, semo done da ben.
Catte. No me n’importa un bezzo, se con nu no la vien.
Lelio. Via venite, signora.
Ottavio.   Non fate la ritrosa.
Lelio. Che volete di più? Vi sarà la mia sposa.
Tonina. Dasseno?
Lelio.   Senza dubbio.
Tonina.   Quando la xe così.
Co ghe xe la so sposa, posso esserghe anca mi.
Ottavio. Brava, così mi piace.
Giacometto.   Brava, muggier, andemo.
Vôi che se devertimo, e voggio che balemo.
Ottavio. Faccia ogni uno di voi quello che faccio io.
Date mano a qualcuna. (dando mano a Betta)
Tonina.   Mi voggio mio mario.
(vuol dar mano a Giacometto)
Ottavio. Che mario, che mario? Ecco, così si fa.
(lascia Betta)
Un bracciere di qua, un altro per di là.
(Ottavio e Lelio prendono in mezzo Tonina, e la servono di braccio.)
Lelio. Non sapete la moda? Io ve l’insegnerò.
Tonina. Con un poco de tempo anca mi me userò.
(parte con Lelio e Ottavio)

Betta. Le vol far le smorfiose, e po co le ghe xe,

Le ghe sa star pulito.
Giacometto.   Mi son solo, e vu tre.
A chi ghe daghio man?
Anzoletta.   Cedo el logo ala puta.
(a Giacometto)
Catte. So caminar mi sola, senza che la me agiuta.
(a Giacometto)
Giacometto. Voleu vu, siora Beta? (a Betta)
Betta.   Che el daga man a ela.
(accennando Catte)
Anzoletta. Che el serva la più zovene.
Betta.   Che el serva la più bela.
Giacometto. Via, no ve fe pregar. (a Catte)
Catte.   Za no andemo lontan.
(ritirando la mano)
Anzoletta. Cossa xe ste scamoffie? (a Catte)
Betta.   Eh, lasseve dar man. (a Catte)
Catte. No disè gnente a Toni.
Betta.   No, nol lo saverà.
Giacometto. Andemo, puta bela. (dando mano a Catte)
Anzoletta.   Oh per diana, el xe qua.

Toni. Come xela sta istoria?

Betta.   Gnente, gnente, Tonin.
Semo anca nu con ela, la menemo al festin.
Toni. Cossa gh’intra sto sior?
Giacometto.   Gh’intro, perchè ghe son.
Anzoletta. Vardè ben che una puta sola no la par bon.

Catte. Toni, mi no voleva.

Toni.   No voggio tarocar,
No digo che ala festa no ve voggia menar.
E se una pula sola non ha d’andar cusì,
Senza che altri s’incomoda, la vôi compagnar mi.
(la prende per mano, e la conduce via)
Betta. No li lassemo soli.
Anzoletta.   Presto, andemoghe drio.
Giacometto. Donca co ste signore farò l’obligo mio.
(esibisce la mano a tutte due)
Betta. Grazie. (si fa dar braccio)
Anzoletta.   Aceto el favor. (si fa dar braccio)
Giacometto.   Posso dir stali e premi¹⁶,
E ariverà ala festa un ceppano¹⁷ a do remi, (partono)