David Shulkin

David Jonathon Shulkin (naskinta la 22ma di julio 1959) esas Usana mediko ed antee guvernoficisto qua funcionis kom sekretario por veteranal aferi (Veterans Affairs). Il esas desemployita da Donald Trump ye la 28ma di marto 2018. Esante politikale moderema, lu judikesis kom kompetenta oficisto da amba Demokrati e moderema Republikani e preske omna veteran-organizuri, ma kauzabis kontroverso pri spensado da lu ed ilua spozino por precipue turistala voyajo.^[1] Importanta tasko dil departmento por veteranal aferi esas provizar medikala flego ad Usana veterani.

Lu naskis en che la Usana armeobazo di Fort Sheridan en Highland Park, Illinois, ube lua patro esis armeo-psikiatriisto, ye la 22ma di julio 1959. Il recevis sua bacheler-grado de Hampshire College en 1982 e de Medical College of Pennsylvania sua medikala grado en 1986. Pose lu laboris e studiis che Yale School of Medicine e sequante che University of Pittsburgh Presbyterian Medical Center.

Shulkin pose laboris che hospitali kom jeristo ed administristo. Ilu laborabis che Beth Israel Medical Center, ube il esis direktisto de 2005 til 2009, e Morristown Medical Center, ube il esis direktisto de 2010 til 2015, ed anke havis funcioni che Hospital of the University of Pennsylvania, Temple University Hospital e Medical College of Pennsylvania Hospital.^[2] Lu anke esabis redaktisto o redaktala komitatano di kelka ciencala jurnali.

Prezidanto Obama nominis Shulkin, qua lore livos la privata sektoro, kom subsekretario di veteranal aferi por saneso en julio 2015. Lore la sekretario di veteranal aferi esis Bob McDonald, qua arivis en julio 2014 pos fraudokontroverso sub la anteriora sekretario, Eric Shinseki.

Il divenis sekretario, kande Trump desemployis McDonald. McDonald anke esis respektata oficisto, ma dum la kampanio Trump asertabis ke veteranal aferi administresas male, bazata sur l'antea kontroverso pri korupto.^[3] Intertempe la guvernerio di Obama reformabis la departmento segun kompromiso di John McCain e Bernie Sanders e la departmento ja funcionis plu bone, ma Trump insistis ke McDonald devas livor. On selektis Shulkin, lore la subsekretario, kom kompromis-kandidato por sekretarieso. Omna Senatani votis por konfirmar lu kom sekretario ye la 13ma di februario 2017.

Lu iris ad Europa dum julio 2017 por ula konferenci, kande il e sua spozino anke okupis su per turismo. Ica voyajo esis pagata per publika pekunio. Ye septembro 2017 la Washington Post publikigis artiklo pri la evento, qua divenos skandalo. Shulkin pose asertis ke il rimborsabis la kusti.

Altra problemo por Shulkin en la departmento por veteranal aferi esis, ke multi dil politikale institucita departmental oficisti esis radikala Republikani, qui deziris la balda privatigo di veteranal aferi e konvinkabis Trump ke Shulkin esas desloyal ad il. Do, multa influoza subordiniti esis enemikal ad ilu. La interrelato sur la departmento tale plumaleskis segun kelka jurnalisti, ke Shulkin "mem postenigis armizita gardisto che la pordo di sua oficeyo".^[4] Pore Shulkin asertis ke to esas normala kustumo.

John F. Kelly, en nomo di Donald Trump, fine desemployis il ye la 28ma di marto 2018. Lua remplasanto esas admiralo Ronny Jackson.

Ye la 29ma di marto 2018, Shulkin publikigis opinionartiklo en la New York Times pri sua desemployado, asertante ke la precipua motivo por ca desengajado esis ke ula personi en la departmento deziris privatigar la veteranala sanesosistemo.^[5] Ilu anke aparis sur All In with Chris Hayes ye la sama dio.^[6]

Ilua spozino esas Merle Bari, kun qua il havas du filii.

Shulkin esas Juda.

1. ↑ LA Times, Embattled Veterans Affairs Secretary David Shulkin fired in latest White House shake-up, [1]
2. ↑ abcnews.go.com, Everything You Need to Know About Trump's Pick for VA Secretary, David Shulkin, [2]
3. ↑ Washington Times, Donald Trump on VA woes: ‘I’d fire everybody’; ‘you fix it by getting Trump elected president’, [3]
4. ↑ Vox, David Shulkin is out as secretary of veterans affairs, [4]
5. ↑ David J. Shulkin, New York Times, Privatizing the V.A. Will Hurt Veterans, [5]
6. ↑ All In with Chris Hayes, Former VA Secretary Shulkin blows the whistle on Trump, [6]