Sewjerna Afrika

Sewjerna Afrika je geografiski region na sewjeru afriskeho kontinenta, při južnym brjoze Srjedźneho morja a w sewjernym dźělu pusćiny Sahara. Do Sewjerneje Afriki słušeja kraje Marokko (ze Zapadnej Saharu), Algeriska, Tuneziska, Libyska, Egyptowska a Sudan.

Zapadnu hranicu twori pobrjóh Atlantiskeho oceana, wuchodnu mjezu pobrjóh Čerwjeneho morja. Najwyša hora Sewjerneje Afriki je Toubkal (4165 m) w marokkoskim dźělu Atlasowych horin. Najwažniša rěka – a zdobom jenička, kotraž ma přez cyłe lěto wodu – je Nil w Sudanje a Egyptowskej.

Najwjetši dźěl sewjeroafriskeje ludnosće přisłuša sunnitiskemu islamej. Etnisce stej najwjetšej skupinje Arabojo a Berberojo (wosebje na zapadźe).

Egyptowska stolica Kairo je najwjetše město Sewjerneje Afriki a zdobom cyłeho arabskeho swěta. Dalše milionowe města su Tunis, Alžěr a Casablanca.

 Commons: Sewjerna Afrika – Zběrka wobrazow, widejow a awdiodatajow