The Equalizer (franchise)

The Equalizer
betinker	Michael Sloan Richard Lindheim
eigner	NBCUniversal (tillefyzjesearjes) Columbia Pictures (films)
lân	Feriene Steaten
begjinjier	1985
films
langspylfilms	● The Equalizer ● The Equalizer 2 ● The Equalizer 3
tillefyzje
searjes	● The Equalizer ● The Equalizer
literatuer
romans	● The Equalizer ● Killed in Action ● Equalizer: Requiem

The Equalizer is in Amerikaanske mediafranchise, dy't yn 1985 úteinsette mei de tillefyzjesearje The Equalizer. Underwerp is Robert McCall, in pinsjonearre geheim agint mei in mysterieus ferline, dy't syn feardichheiden ynset om as figilante rjochtdei te hâlden oer kriminelen dy't ûnskuldige minsken tenei komme. De franchise bestiet fierders út twa films út 'e 2010-er jierren mei Denzel Washington yn 'e titelrol, en in op 'e nij ferbylde tillefyzjesearje út 2021 mei Queen Latifah as in froulike Robyn McCall.

De Wikipedy hat ek in side The Equalizer (tillefyzjesearje út 1985).

The Equalizer wie in spionaazjeskrillersearje, dy't betocht waard troch Michael Sloan en Richard Lindheim. De rige gie oer Robert McCall (spile troch Edward Woodward), in pinsjonearre geheim agint foar in net by namme neamde ynljochtingetsjinst fan 'e Amerikaanske oerheid. Hy hat in protte dingen dien dêr't er net grutsk op is, en besiket dêrfoar no boete te dwaan troch fergees syn tsjinsten oan te bieden as oplosser fan problemen, beskermer en/of ûndersiker. The Equalizer rûn fjouwer seizoenen, fan septimber 1985 oant en mei augustus 1989, en der waarden yn totaal 88 ôfleverings fan makke troch tillefyzjestudio Universal Television. De searje waard oarspronklik útstjoerd troch CBS.

De Wikipedy hat ek in side The Equalizer (tillefyzjesearje út 2021).

Yn 2021 waard der in remake fan 'e oarspronklike tillefyzjesearje makke, wêryn't it personaazje fan Robert McCall op 'e nij ferbylde wie as Robyn McCall, spile troch de swarte aktrise Queen Latifah. De nije searje waard ûntwikkele troch Andrew W. Marlowe en Terri Edda Miller en produsearre troch û.m. Davis Entertainment, de CBS Studios en Universal Television. Krekt as de orizjinele searje waard er oarspronklik útstjoerd troch CBS. It earse seizoen bestie út tsien ôfleverings, mar yn maart 2021 bestelde CBS in twadde seizoen.

De Wikipedy hat ek in side The Equalizer (flm).

De earste ferfilming fan tillefyzjesearje út 'e 1980-er jierren hiet ek The Equalizer. Dêryn libbet widner Bob McCall (Denzel Washington) in aldendeisk bestean as winkelbetsjinde fan in boumerk yn Boston. Syn libben hinget oaninoar fan rûtines en hy is iensum. Mei syn kollega's kin er goed, mar net ien dy't him goed ken. Oan syn kalm fuortskolferjende bestean komt in ein as er beslút in jonge prostituee (Chloë Grace Moretz) te helpen dy't yn seksuele slavernij fan 'e Russyske maffia libbet. It docht bliken dat McCall út syn mysterieuze ferline ûnfermoede feardichheden hat, dy't him by steat stelle om koart wurk te meitsjen fan syn ûnmeilydsume tsjinstanners.

The Equalizer waard regissearre troch Antoine Fuqua nei in senario fan Richard Wenk. De film gie op 26 septimber 2014 yn premiêre, en brocht $192,3 miljoen op tsjin in budget fan $73 miljoen.

De Wikipedy hat ek in side The Equalizer 2.

Yn The Equalizer 2 wurdt Bob McCall (Denzel Washington) syn freondinne en âld-kollega Susan Plummer fermoarde wylst se in skynber gefal fan moard-selsmoard fan in oare âld-agint fan 'e DIA en dy syn frou ûndersiket. Neitiid giet McCall sels op ûndersyk út en ûntdekt dat sawol Plummer as de agint nei wa't se ûndersyk die, ombrocht binne troch syn eigen eardere partner Dave York (Pedro Pascal). Dyselde wurket no eins as hierling en hat in team fan lykstimden om him hinne sammele. McCall is wisberet om 'e hiele binde foargoed út te skeakeljen.

The Equalizer 2 waard wer regissearre troch Antoine Fuqua nei in senario fan Richard Wenk. De film gie op 20 july 2018 yn premiêre, en brocht $190,4 miljoen op tsjin in budget fan tusken de $62 en 79 miljoen.

The Equalizer 3, op 'e nij ûnder rezjy fan Antoine Fuqua en mei Denzel Washington yn 'e haadrol, is (anno 2022) yn produksje en wurdt yn rin fan 2023 yn 'e bioskopen ferwachte.

Michael Sloan, ien fan 'e betinkers fan 'e oarspronklike tillefyzjesearje, sette nei it útkommen fan 'e film út 2014 útein mei it skriuwen fan in romansearje, dy't ek The Equalizer hjit. Yn dy rige kamen de folgjende boeken út:

• 2014 – The Equalizer
• 2018 – Killend in Action
• 2020 – Equalizer: Requiem