Nanngal naange

Eɗen mbiya lewru walla naange nanngaama so tawii en nattiiɗe yiyde e sahaa nde foti yiyeede, wonaa nanngeede foti wiyeede, foti wiyeede ko wirniima sabu woodat ko reɗɗii hakkunde lewru e naange lewru wirnoo, wooda kadi ko reɗɗii hakkunde leydi e naange, naange wirno. Ko reɗɗotoo koo ko woni ? Ko leydi tan walla lewru wirnata naange e weeyo men ɓadiingo, so tawii leydi heedii hakkunde naange e lewru, mbeelu leydi yanoya e lewru wirna ndu, ndu niɓɓiɗa, wiyee ndu nanngaama. So tawii ko lewru reɗɗii hakkunde naange e leydi, ndu wirna naange, wiyee naange nanngaama, ɗuum waɗi nanngal naange waɗata tan ko nde lewru huroyii, hade woɗndu daraade, hay gooto meeɗaa nande naange nanngaama nde lewru feeñi e asamaan. Nanngal lewru ne wonata tan ko nde ndu timmi, ndu waawaa nanngeede darorɗe walla maayirɗe mayru. Leydi e Lewru ko e dingiral ɗaŋe ngoni, naange woni ko e wuddu dinngiral ngal, ɗuum noon birnagol naange fawii tan ko e reɗɗaade lewru hakkunde magge e leydi, tawa kadi ko kannje tonondiri rip. Fulɓe ina mbiya nanngal naange kadi weñugol naange maa mojaaki naange maa nanngegol naange.