Non aprite quella porta
|
C'l artìcul chè 'l è scrit in
Miranduléś |
 The Texas Chain Saw Massacre
| ||
| Non aprite quella porta | ||
 Al risulèṅ Grugn ad Pèla in na figùra dal film | ||
| Minga vèrar c'l us là 1974 | ||
|---|---|---|
| Regìa: Tobe Hooper | ||
| Scritōr: Tobe Hooper • Kim Henkel | ||
| Atōr: Marilyn Burns • Allen Danziger • Teri McMinn William Vail • Paul A. Partain • Gunnar Hansen Edwin Neal • Jim Siedow • John Dugan • Ed Guinn | ||
| Müsica: Wayne Bell | ||
| Léngua: Ingléś | ||
| Dürä dal film: 84 minüt | ||
| Nasiōṅ: Stat Unî | ||
Non aprite quella porta (Minga vèrar c'l us là) 'l è 'n film ad scarésa girâ in dal 1974 par Tobe Hooper. Custâ 140.000 $ (finansiâ c'n i bèsi muciâ sù da 'n film pòran dla cumpagnìa, al famóś Gola profonda), al film al 'n à pò fat sù 30.859.000 $ in di sōi butghèṅ di Stat Unî, faghénd-al dvintàr òṅ di più grand sucès dal cìnema indipendènt.
Al film al tōś spunt (cuma anc Psyco, Il silenzio degli innocenti e Deranged) da quél ch'l iva fat dabòṅ Ed Gein, al Killer dal Wiscònsin dit anc al Maslàr ad Plainfield, òṅ ch'l à masâ e magnâ soquànti parsòni e dasquaciâ dal casi da mòrt in di an Sinquànta, faghénd-as 'l aredamènt in cà druànd di òs e di pès umàṅ e cupànd cun la pèla dal sò vitmi in sal grugn.
Sunt
In d'l Agóst dal 1973 un grup ad studènt dal college e fiōi di fiōr i giràn p'r al stradi dal Tèxas insìma a 'n furgunsèṅ p'r andàr a védar la cà vècia dal nunòṅ ad Franklin Hardesty (Paul A. Partain), òṅ di sinc, adrùt a vìvar in sna scrana a rudèli. I àtar mémbar dla cumitìva i èṅ sò surèla Sally (Marilyn Burns), la Pam (Teri McMinn), Jerry (Allen Danziger) e Kirk (William Vail). Durànt al viàś i càtan par strada 'n óm ciamâ Nubbins (Edwin Neal) ch'al gh dmanda un pasàǵ ma chi lò 'l è mèś mat, al s taja na maṅ cun un curtlèṅ e pò al fà listés cun Franklin prima che chi àtar i al butìsan śò da 'l furgunsèṅ.
Avénd dagnóra finî 'l carburànt, al grup al s férma da 'n benśinàr, Drayton Sawyer (Jim Siedow), che però al na gh 'n à piò. Quànd Franklin al gh diś ch'i èṅ drē a 'ndàr a catàr al pòst in du 'l éra visû sò nunòṅ, al vendidōr al gh dascunsìlia 'd andàr-ag parchè là i gh vìvan dal parsòni malmustóśi e catìvi. Ma i ragàs, dòp avér cumprâ dla carna, i decìdan ad cuntinuàr listés.
Durànt al tragìt a Kirk e a la Pam a gh vèṅ vója ad far-'s un bagn. Méntar chi àtar tri i aspètan śò da 'l furgunsèṅ, lōr dū i s davśìnan a na cà bandunàda in du a gh'è na pisìna vōda. Al masć al decìd ad busàr a 'l us ma ninsòṅ a gh vèṅ a vèrar. Par tèra al véd un dènt e 'l al cata sù par far-al védar a la Pam che, tòlta da 'n sèns ad schiva, la s và a métar sóta 'n àrbul méntar Kirk al và dèntar par la pòrta. Rivâ davśèṅ a 'l scali, 'n umòṅ grand cun na mascra ad pèl adòs e 'n grimbiàl da maslàr al gh s para davànti e al gh dà soquànt cólp ad martlét finénd-al cumpàgn a 'n ninét. La Pam, spavintàda p'r al fat 'd a n védar minga al sò amìg gnir fóra, la 'l và a pascàr in cà. Quànd la riva in dal tinèl la ślìcia śò strabucànd atàc a 'n muć ad rèst umàṅ e ad bèsti. Alvànd la tèsta la véd un pui stric in na gàbia alvàda da tèra ch'al n s pōl minga móvar e a gn vèṅ 'l urt dal gòmit e 'n atàc istèric. Sigànd al nóm ad Kirk la s léva sù andànd in d'l andavèṅ ma chè la vèṅ ciapàda par 'l óm cun la pèla atàc a 'l grugn, Leatherface (Gunnar Milton Hansen), ch'al la tōś sèg par pò stablìr-la atàc a 'n gans da maslàr cuma na vaca méntar lò al taja a pès al cadàvar ad Kirk cun un śghét lètric.
Jerry, in pinsēr p'r i sò amìg, al và anca lò in dla vila. Vrénd un freezer in cuśìna al gh cata dèntar la pòvra Pam misa mâl ma incóra in vita. Tut 'd un trat al riva Grugn ad Pèla ch'al gh tira na martlàda in tèsta faghénd-al crudàr a tèra e pò al dà dū marùc a la Pam par far-la turnàr in fónd a 'l freezer.
A basōra tarda, anc p'r al fat che Jerry al gh'is sèg al ciàṿ, la Sally e Franklin i decìdan 'd andàr a védar cuśa psiva èsar sucès in dla cà e Bubba, al nóm ad Leatherface, al cópa Franklin méntar la Sally la s sèra dèntar na cambra dla cà in du la cata al cadàvar marsî dna dóna sintàda in sna scrana e un vèć tarulî cun la pèla biànca, che lè tut i ciàman Nunòṅ. Quànd al killer al s fà strada druànd l'arfindróla lètrica, a n psénd briśa druàr la marléta par gnir dèntar, la Sally la scapa via butànd-as fóra par la fnèstra andànd a dmandàr ajùt a 'l benśinàr ma chi lò al n è àtar ch'al fradèl ad Grugn ad Pèla e ad Nubbins e acsè al gh dà na śmasarinàda in tèsta, par far-ag pérd'r i sèns, e pò al s la pòrta a cà. Cla sira lè la Sally la sarà al magnàr par la famija Sawyer cun al Nunòṅ ch'al s fà 'n antipàst bvénd un pôc dal sò sangṿ ch'al sprica fóra da 'n dî dla pòvra ragasōla, l'ultma di sinc incóra a 'l mónd.
Séguit
Al film, avénd abû dimóndi sucès in tut al mónd (ma in dal Régn Unî i 'l aṅ pruibî par vint-sinc an) al gh'à abû tri séguit, un arfacimènt e un prequel.
- Non aprite quella porta (The Texas Chainsaw Massacre, 1974), ad Tobe Hooper
- Non aprite quella porta 2 (The Texas Chainsaw Massacre II, 1986), ad Tobe Hooper
- Non aprite quella porta 3 (Leatherface: The Texas Chainsaw Massacre III, 1990), ad Jeff Burr
- Non aprite quella porta IV (The Return of the Texas Chainsaw Massacre, 1994), ad Kim Henkel
- Non aprite quella porta (The Texas Chainsaw Massacre, 2003), ad Marcus Nispel - 'L arfacimènt
- Non aprite quella porta - L'Inizio (The Texas Chainsaw Massacre - The Beginning, 2006), ad Jonathan Liebesman - Al prequel
- Non aprite quella porta 3D (2013), ad John Luessenhop