Nastas'sja Jakimava
|
C'l artìcul chè 'l è scrit in
Miranduléś |
La Nastas'sja Jakimava (Minsk, 1 ad Nuvémbar dal 1986, Анастасия Алексеевна Екимова in Rus) l'è na tenìsta dla Rùsia Biànca. L'è élta 165 cm e la péśa 55 chilo. L'è andàda a star a Las Pàlmas ad Gran Canària in dgl'Ìśuli Canàri (Spaggna).
I sò cólp ch'i gh piàśan da piò i èṅ la bucìna curta e 'l arvèrs che lē la śōga a dū maṅ. Al sò film preferî l'è Seven.
Prufesiunìsta da 'l 2001, l'à purtâ a cà da piò 'd un migliòṅ ad dòlar, rivànd anc a èsar la nùmar 49 dal ranking (al 31 ad Luj dal 2006). La n à mai vins di turnèo WTA, ma ad qvéi ITF la 'n à fat sù dódas, tulénd-'s anc al sfisi da batàr in dla finàl ad Nassau dal 2011 l'Angelique Kerber par 6–3 6–2 e prima incóra la Yanina Wickmayer 7–5 7–6 in dal 2009 a Saint-Gaudens.
Caréra
La Nastas'sja in dal 2003 la pèrd a 'l secónd tùran ad San Pirèṅbùrg da la Galina Voskoboeva par 6-7 7-6 6-2. 'L an dòp la fà un bèl riśultâ rivànd in dla semifinàla dal turnèo ITF ad Varsàvia ma la gh'à da lasàr strada a l'Angelique Kerber par 6-3 1-6 6-2. La próa a qualificàr-as p'r al Roland Garros e anc a Wimbledon ma la mudnéśa Adriana Serra Zanetti la la manda sèmp'r a cà subìt. La gh và mâl anc a 'l ITF ad Mòdna: chè la pèrd da la tedésca Maria Geznenge. Finalmènt la s fà valēr a Balashikha rivànd in finàl baténd l'Elena Vesnina in di quàrt par pò pèrdar da l'Yvonne Meusburger. La finìs 'l an baténd prima la Roberta Vinci e pò la Marija Kirilenko ma l'è farmàda in finàl a Poitiers da la śvisra Marie-Gayanay Mikaelian.
In dal 2005 la s qualìfica p'r al turnèo dal Roland Garros ma la và fóra subìt p'r òpra dla Virginia Ruano Pascual. A Deauville la vrév andàr avànti ma a gh'è incóra la Galina Voskoboeva a mét'r-ag bèc e par lē a n gh'è gnint da far. 'L an dòp la fà fóra la Sara Errani in dal qualificasiòṅ 'd Acapûlc. A Indian Wells la pasa 'l prim tùran par pò pèrdar da l'Elena Dement'eva in tri sét. Stés riśultâ anc a Miami ma chè l'è la Marion Bartoli a bat'r-la. A 'l Roland Garros la gh'à da cédar a 'l secónd tùran da la Justine Henin. A Petange la rivà in semifinàl in dua la vèṅ batùda par la Kirsten Flipkens par 2-6 6-3 6-1.
In dal 2007 la gh'à punt abàsta par śugàr diretamènt a 'l Roland Garros e a Wimbledon ma la n cata sù gnint parchè la pèrd subìt prima da la Stéphanie Cohen-Aloro e pò da la Caroline Wozniacki, in alóra nùmar 103 dal mónd. In d'l ITF ad Kharkow la vèṅ misa sóta da l'Elena Bovina par 6-1 4-6 6-4 ch'la manda acsè in vaca i sò piàṅ.
In dal 2008 la śōga bèṅ a Patràs in dua la bat la Melanie South in di quàrt par pò pèrdar da la Magdalena Rybarikova. A 'l Roland Garros la pasa al qualificasiòṅ e anc al prim tùran ma la danéśa Caroline Wozniacki la la mét in riga cun al puntéǵ ad 6-0 6-4.
In dal sircùit WTA la gh'à abû la manéra 'd incuntràr anc la Marija Šarapova, a 'l prim tùran dal Roland Garros dal 2009, pardénd sèg in tri sét.