La bella addormentata nel bosco (film)
|
C'l artìcul chè 'l è scrit in
Miranduléś |
 Sleeping Beauty
| ||
| La bella addormentata nel bosco | ||
 L'Aurora in na figùra dal film | ||
| La bèla indurminsàda in dal bòsc 1959 | ||
|---|---|---|
| Scritōr: Charles Perrault | ||
| Regìa: Clyde Geronimi | ||
| Senegiadùra: Erdman Penner • Bill Peet • Ted Sears Joe Rinaldi • Winston Hibler • Ralph Wright • Milt Banta | ||
| Personâǵ: Prinsipésa Aurora • Prìnsip Filìp • Malefica Flora • Serena • Fauna • Rè Stēvan • Rè Umbèrt | ||
| Mùśica: George Bruns | ||
| Durèda dal cartòun: 75 minût | ||
| Lengua: Ingléś | ||
| Nasiòun/Paēś: Stat Unî | ||
La bella addormentata nel bosco (La bèla indurminsàda in dal bòsc) 'l è 'n cartòṅ animâ dal 1959 dla Walt Disney Productions ch'al cònta la fòla dla Bèla indurminsàda ad Charles Perrault. 'L è vgnû fóra in di Stat Unî al 29 ad Śnar dal 1959.
Par trént'an 'l è stâ 'l ùnic adatamènt dna fòla prudót par la Disney, al 16śum dla lista, parchè in alóra al n è stâ minga 'n sucès anc s'l à muciâ sù da piò ad sinquànt'òṅ migliòṅ ad dòlar dòp ès'r-an custâ siē.
Sunt
Dòp dimóndi an sénsa avér abû di fiōl, a nas finalmènt l’Aurora, la putìna dal Rè Stēvan e 'd sò mujér, la Regìna Leah. Al régn al fà fèsta e p'r al sò batéś i rìv'n anc al Rè Umbèrt e sò fiōl, al prìnsip Filìp, ch'un dè al dvintarà 'l sò spóś par ligàr dū paéś insém.
Al fati Flora, Fauna e Serena i banadìsan la putìna faghénd-ag di regài, la belésa e 'l cant, ma prima che l'ultma fata la pòsa far àtar tant a riva la stria catìva Malefica, arliàda p'r a n èsar minga stada invidàda, ch'la gh tira adòs na maledisiòṅ dgénd-ag che prima di sò séd'ś an la s punśarà a 'n dî c'n un fuś e acsè la mur'rà. La Serena la próa a cambiàr, in na quàlc manéra, al sò destîṅ: invéci 'd murìr la s indurminsarà in fiṅ tant ch'un qualchidòṅ inamurâ dabòṅ 'd lē al la baś'rà.
Par paràr via 'l malefìsi, al Rè Stēvan al fà bruśàr tut i fuś dal régn méntar la putìna, c'n al nóm ad Rosaspina, la và a star a cà 'd un buscajōl in fiṅ ch'l'arà cumpiû i séd'ś an. La stria la manda 'l sò córuv Diablo a pascàr-la dapartùt.