Qatar

Qatar (دولة قطر, Dawlat Qaṭar, Plantilla:Lang-es), oficialmente el Estado de Qatar, es un nacion na Occidental Asia. Ta ocupa ele con el Peninsula de Qatar na el costa noreste del Arabigo Peninsula na el Medio Oriente; el unico frontera del pais es un frontera entre Arabia Saudita y Qatar al sur; y ta rodea el Persico Golfo con el resto del de suyo territorio. Ta separa el Golfo de Bahréin, un ensenada del Persico Golfo, con Qatar del cercano Bahréin. El capital es Doha, el hogar de mas del 80% del maga habitante del pais, y el terrestre superficie compuesto principalmente de plano y bajo desierto.

Gobernao Qatar como un hereditario monarquía por el Casa de Thani desde que ya afirma si Mohamed bin Thani con "un acuerdo, hinde un formal tratao" (English: an agreement, not a formal treaty) con Bretaña na 1868 que ya reconoce con el de suyo distinto estado. Despues del gobierno del otomano Imperio, ya queda Qatar un britanico protectorao na 1916 y ya gana con el independencia na 1971. El actual emir si Tamim bin Hamad Al Thani, que ta tene con casi todo el maga ejecutivo, legislativo y judicial autoridad na virtud del Constitucion de Qatar. Ta designa ele con el primer ministro y el gabinete del pais. Puede el Consultivo Asamblea de Qatar, parcialmente electo, bloquea con legislacion, y ta tene ele con un limitao capacidad de dimiti con maga ministro.

A maga principio de 2017, el poblacion de Qatar fue 2.6 million: 313.000 maga qatari ciudadano y 2,3 maga millon de maga expatriao. El islam el oficial religon. Ta tene el pais con el aca-4 mas alto IBP per capita na el mundo y el aca-11 mas alto BNI per capita. Es el aca-42 pais na el Indice de Humano Desarrollo, el aca-3 mas alto IHD na el arabe mundo. Qatar es uno del maga mayor mundial exportador de licuao natural gas y el mayor mundial emisor de dioxido de carbono per capita.

Na el aca-21 siglo, ya emerge Qatar, y como un importante aliado extra-OTAN del Estados Unidos, y como un medio potencia en el arabe mundo. Ya crece el de suyo economía rapidamente gracias al de suyo riqueza na maga recurso, y ya crece el de suyo geopolitico poder gracias al de suyo grupo de maga medio, el red de maga medio Al Jazeera, que ya soporta para maga rebelde grupo financieramente durante el Arabe Primavera. Tambien ta forma Qatar con parte del Consejo de Cooperacion para el maga Arabe Estado del Golfo.

Ya documenta si Plinio el Viejo, un romano escritor, con el mas antiguo relato sobre el maga habitante del peninsula alrededor del maga mediao del primer siglo AEC, refiriendo a ellos como el maga Catharrei, un designacion baka derivao del nombre de un local prominente asentamiento. Un siglo mas tarde, ya produci si Claudio Ptolomeo con el primer conocio mapa que ta representa con el peninsula, refiriendo a el como Catara. Tambien ya referencia el mapa con un pueblo nombrao Cadara al este del peninsula. Exclusivamente usao el termino Catara (el gentilicio Cataraei) hasta el aca-19 siglo, despues del cual ya emerge Katara como el mas reconocio ortografia. Eventualmente, después de cuanto variacion —"Katr", "Kattar" y "Guttur"—, adoptao el moderno derivao Qatar como el nombre del pais. Na el moderno estandar arabe, pronunciao el nombre como Plantilla:IPA-ar, mientras que na el local dialecto es Plantilla:IPA-ar. Na chavacano (y español) ta usa kita con maga diferente aproximacion del nombre, kay ta usa el fonologia del arabe con maga sonido hinde frecuentemente incuntrao na el de kanaton maga idioma.

Ta remonta a casi 50,000 maga año antes del presente el humano habitacion na Qatar. Na el peninsula desenterrao maga asentamiento y maga herramienta desde el Edad de Piedra. Na en abandonao costero asentamientos descubierto maga mesopotamico artefacto originario del periodo de El Obeid (c. 6500-3800 AEC.) Al Da'asa, un asentamiento situao na el occidental costa de Qatar, el mas importante sitio de El Obeid na el pais y baka ya aloja con un chico campamento de temporada.

Incuntrao na el isla de Jor maga materia del maga casita de Babilonia, remontando al segundo milenio AEC. Ta atestigua esto al maga comercial relacion entre el maga habitante de Qatar y el maga casita na el actual Bahréin. Entre el maga descubrimiento ya tiene maga triturao concha de caracol y maga tiesto de maga vasija del maga casita. Sugerio que Qatar el mas temprano conocio sitio del produccion del tinte de maga concha, gracias a un industria de purpura de Tiro que ya existi na el costa controlao por el maga casita.

Na 224 EC, ya logra el sasanida Imperio con el control del maga territorio que ta rodea con el Persico Golfo. Ya desempeña Qatar con un papel na el comercial actividad del maga sasanida, aportando con al menos dos maga mercancía: el maga preciosa perla y el purpura tinte. Bajo el sasanido reino, ya conoce manada habitante de oriental Arabia con el cristianismo despues del dispersion del religion hacia el este por parte del maga mesopotamico cristiano. Construio maga monasterio y establecio otro maga asentamiento durante este epoca. Durante el ultimo parte del era cristiana (i.e. antes del expansion del islam) ya comprende Qatar con un region conocio como Beth Qatraye (que na el siríaco idioma ta significa "casa del maga qatarí"). Hinde limitao el region a Qatar: ya inclui tambien con Bahréin, el isla Tarut, Al-Khatt y Al-Hasa.

Na 628, ya envia el islamico profeta si Mahoma con un musulman a un gobernante na el este de Arabia llamado si Munzir ibn Sawa Al-Tamimi con un peticion de que ya acepta ele y el de suyo maga sujeto con el islam. Ya accede si Munzir a este peticion, y na consecuencia, ya converti al islam el mayoria del maga tribu arabe del region. A maga mediao del siglo, ya causa el musulman conquista de Persia con el caida del sasanida Imperio.

Descrito Qatar como un famoso centro de cria de maga caballo y maga camello durante el omeya califato. Durante el aca-8 siglo, ya comenza a beneficiar del de suyo comercialmente estrategico posicion na el Persico Golfo y ya convirti na un centro de comercio de perlas.

Durante el abasi califato ya ocurri sustancial desarrollo del perlero industria na el peninsula de Qatar. Ya hace el maga barco, que ya viaja de Basora al India y a China, con maga escala na el maga puerto de Qatar durante este periodo. Na Qatar descubierto maga chino ceramica y porcelana, maga cen de Occidental Africa y maga tailandes artefacto. Ta sugeri maga arqueologico resto, del aca-9 siglo, que ya utiliza el maga habitante de Qatar con el mayor riqueza para construi con maga vivienda y maga publico edificio de mayor calidad. Durante este periodo, construio mas de 100 maga casa de piedra, dos maga mezquita y un abasi fortaleza na Murwab. Cuando ya declina el prosperidad del califato na Iraq, ansina mismo ya declina na Qatar. Mencionao Qatar na el libro Mu'jam Al-Buldan por si Yaqut al-Hamawi del aca-13 siglo, que ya aludi al maga fino capa tejio a maga raya del maga qatari, y al habilidad del maga qatari na el mejora y acabado del maga lanza.

Na 1253 ya controla el dinastia usfurida con el mayoria del occidental Arabia, pero na 1350 ya toma el principe de Ormuz con el control del region. Al reino ya proporciona el maga perla de Qatar con un principal fuente de maga ingreso. Na 1515, hace si Manuel I de Portugal con el Reino de Ormuz un vasallo de Portugal. Entonces ya apodera Portugal de un significativo parte de oriental Arabia na 1521. Na 1550, ya somete voluntariamente el maga habitante de Al-Hasa al dominio del maga otomano, prefiriendo con ellos al maga portugues.

Despues del caida del dinastía jabrid con el conquista de Bahréin por el maga portugues, ya queda el arabigo costa hasta Al Hassa bajo el dominio y el influencia del portugues imperio, que ya elimina con maga intento del maga otomano de domina con el region, por el reconquista del castillo de Tarout o Asedio de Qatif (1551).

Excavao pa maga arqueologico descubrimiento desde uno del maga portugues fortaleza que ya servi de base para domina con el region como Ruwayda. Ta aparece el primero representacion de Qatar na el portugues mapa de si Luis Lázaro en 1563, mostrando con el "ciudad de Qatar" como una fortaleza. Expulsao el maga otomano, que ya mantene con un insignificante militar presencia na el area, por el tribu Bani Khalid y el de ellos emirato na 1670.

Na 1766, ya migra de Kuwait a Zubarah na Qatar maga miembro del familia Al Jalifa del tribal confederacion Utub. Al hora del de ellos llegada, ya ejerce el Bani Khalid con un debil autoridad sobre la peninsula, a pesar del hecho de que ya goberna el de ellos maga lejano pariente con el mas grande aldea. Na 1783, ya invadi y ya anexa maga clan del Bani Utbah, y maga aliado arabe tribu, con Bahréin del maga persa. Ya impone el maga Al Khalifa con el de ellos autoridad sobre Bahréin y ya conserva ellos con el de ellos jurisdiccion sobre Zubarah.

Tras el de suyo juramento como heredero principe del maga wahabí na 1788, ya move si Saud ibn Abd al-Aziz para expandi con el wahabi territorio hacia el este, hacia el Persico Golfo y Qatar. Despues de derrota con el maga Bani Khalid na 1795, atacao el maga wahabi na dos maga frente. Ya asalta el maga otomano y el maga egipcio con el occidental frente, mientras que ya lanza el maga Al Khalifa na Bahréin y el maga omani con un ataque contra el oriental frente. Al entera del egipcio avance na el occidental frontera na 1811, ya reduci el emir wahabi con el de suyo maga guarnicion na Bahrein y Zubarah para redesplega con el maga tropa. Ya ventaja de este oportunidad si Said bin Sultain, gobernante de Mascate, y ya ataca con el maga wahabi guarnicion na el oriental costa, incendiando con el fortaleza de Zubarah. Despues de esto, efectivamente ya volve al poder el maga Al Khalifa.

Como castigo por el pirateria, ya bombardea un buque del Britanico Compañia del maga Oriental India con Doha na 1821, destruyendo con el ciudad y obligando con maga ciento de maga residente a huir. Na 1825, establecio el Casa de Thani con el jeque si Mohamed bin Thani como el primero lider.

Masquen considerao Qatar como un dependiente territorio de Bahréin, ya enfrenta el maga Al Khalifa al oposicion del maga local tribu. Na 1867, ya envia el Al Khalifa, junto con el gobernante de Abu Dhabi, con un masivo naval fuerza a Al Wakrah na un esfuerzo por aplasta con el maga qatari rebelde. Ya lleva esto al guerra entre Qatar y Bahréin de 1867–68, donde ya saquea el maga fuerza de Bahréin y de Abu Dhabi con Doha y Al Wakrah. Ya viola el maga bahreini hostilidad con el perpetuo tregua de paz y amistad (English: Perpetual Truce of Peace and Friendship) de 1861. Debio al conjunto incursion, además del qatari contraataque, ya impone el britanico politico residente, el coronel si Lewis Pelly, con otro tregua na 1868. El de suyo mision a Bahréin y Qatar, y el resultante tratao de paz, fueron maga hito, porque ya reconoce ellos implícitamente con el distincion de Qatar de Bahréin y ya reconoce ellos explicitamente con el posicion de si Mohammed bin Thani. Ademas de censura con Bahrein por el de suyo incumplimiento del acuerdo, ya negocia si Pelly con maga qatari jeque representao por si Mohammed bin Thani. El maga negociacion fueron el primera etapa na el desarrollo de Qatar como un gobernante de maga jeque.

Bajo el militar y politico presion del gobernador del otomano valiato de Bagdad, si Midhat Baja, ya somete el tribu gobernante Al Thani al otomano dominio na 1871. Ya impone el otomano gobierno con maga reformista medida (na turco, tanzimat) na cuanto al tributacion y el registro del propiedad para integra plenamente con este maga area na el imperio. A pesar del desaprobacion del maga local tribu, ya segui Al Thani a apoya con el otomano dominio. Ya estanca el maga qatari-otomano relacion, y na 1882 ya sufri dicho maga relacion con mas reves cuando ya nega el maga otomano a ayuda con si Al Thani na el de suyo expedicion a Khor Al Adaid, ocupao por Abu Dhabi. Ademas, ya apoya el maga otomano con el otomano subdito si Mohammed bin Abdul Wahab, que ya intenta suplanta con si Al Thani como kaymakam de Qatar na 1888. Debio a esto, eventualmente ya rebela si Al Thani contra el maga otomano, que (segun ya cree si Al Thani) ya busca usurpa con el control del peninsula. Ya renuncia ele como kaymakam y ya deja de pagar con maga impuesto na agosto de 1892.

Na febrero de 1893, ya llega si Mehmed Hafiz Pasha na Qatar con el fin del busqueda de maga hinde pagao impuesto y la resistencia al oposición de si Jassim bin Mohammed al maga propuesto otomano administrativo reforma. Temiendo que ya enfrenta al muerte o al carcel, ya retira si Jassim a Al Wajbah (16 km al oeste de Doha), acompañado por cuanto miembro del tribu. Ya incuntra negativa el exigencia de si Mehmed de que disolve si Jassim con el de suyo maga tropa y jura lealtad al maga otomano. Na marzo, ya encarcela si Mehmed con el hermano de Jassim y 13 maga prominente qatari tribal lider na el otomano corbeta Merrikh como castigo por el de suyo insubordinacion. Despues de que ya rechaza si Mehmed con un oferta para libera con el maga cautivo por una tarifa de 10.000 maga turco lira, ya ordena ele con el avance de un columna de aproximadamente 200 maga soldao hacia el fortaleza de Al Wajbah de si Jassim bajo el mando de si Yusuf Effendi, ansina marcando con el inicio del batalla de Al Wajbah.

El maga tropa de si Effendi fueron objeto de un intenso fuego de artilleria, por un considerable tropa de qatari infanteriía y caballeria, poco despues de llega a Al Wajbah. Ya retira ellos al fortaleza de Shebaka, antes de retira otra vez de un qatari incursion. Despues de este retiro al fortaleza de Al Bidda, ya sitia el avanzando columna de si Jassim con el fortaleza. El resultao fue el concesión de un derrota por parte del maga otomano, ademas el acuerdo de renuncia con el de ellos maga cautivo, a cambio del seguro paso del caballeria de si Mehmed Pachá a Hofuf por tierra. Masquen hinde ya gana Qatar con el lleno independencia del otomano Imperio, ya obliga el resultado del batalla con un tratao que mas tarde ya forma con el base del surgimiento de Qatar como autonomo pais dentro del imperio.

Por el anglo-otomano Acuerdo de 1913, ya acorda el maga otomano renuncia con el de ellos reclamacion sobre Qatar y retira de Doha con el de ellos guarnicion. Sin embargo, con el estallido del Primer Mundial Guerra, hinde hecho nada para llevar a cabo esto, y ya permanece el guarnicion na el fuerte de Doha, masquen ya disminui el de suyo numero a medida que ya deserta el maga hombre. Na 1915, con el presencia de maga britanico cañonera na el puerto, ya persuadi si Abdullah bin Jassim Al Thani (pro-britanico ele) con el resto para que abandona con el fuerte, ansina que cuando, siguiente el mañana, ya acerca el maga britanico tropa, incuntrao desierto el fortaleza.

Ya convirti Qatar na britanico protectorao el 3 de noviembre de 1916, cuando ya firma el Reino Unido con un tratao con el jeque si Abdullah bin Jassim Al Thani para que somete Qatar al britanico sistema de administracion por tregua. Ya reserva el tratado con el maga exterior asunto y el defensa al Reino Unido, pero ya permiti con el interno autonomia. Si bien ya acorda si Abdullah hinde entabla con maga relacion con ningun otro potencia sin el previo consentimiento del britanico gobierno, ya garantiza el segundo con el proteccion de Qatar contra la agresión por mar, ademas del provision del "maga buen oficina" (English: good offices) na caso de ataque por tierra. Deliberadamente vago este segundo empresa.

El 5 de mayo de 1935, mientras permiti con un petrolero concesion con el Anglo-Persian Oil Company, ya firma si Abdullah con otro tratao con el britanico gobierno que ya concede a Qatar con proteccion contra maga interno y externo amenaza. Na 1939 descubierto maga reserva de petroleo por primera vez, masquen ya demora el Segundo Mundial Guerra con el explotacion y desarrollo.

Ya cambia el foco del maga britanico interes na Qatar despues del Segunda Mundial Guerra, gracias al independencia del India, el creacion de Pakistan na 1947 y el desarrollo del petroleo na Qatar. Na 1949, ya significa el nombramiento del primer britanico politico funcionario na Doha, si John Wilton, con un fortalecimiento del maga anglo-qatari relacion. Ya comenza el maga exportacion de petroleo na 1949, despues del cual ya queda el maga petrolero ingreso el principal fuente de maga ingreso para el pais, kay ya declina el comercio de maga perla. Ya financia este maga ingreso con el expansion y modernizacion del infraestructura de Qatar.

Cuando ya anuncia Gran Bretaña oficialmente na 1968 que ay retira del Persico Golfo na un plazo de tres maga año, ya uni Qatar al maga conversacion con Bahréin y otros siete maga Estado del Tregua para crea con un federacion. Debio a maga regional disputa, sin embargo, ya retira Qatar y Bahréin del maga conversacion y ya queda maga independiente estado separao del maga Estado del Tregua, que mas tarde ya queda el maga Emiratos Unidos del Arabo.

Na virtud de un acuerdo con el Reino Unido, el 3 de septiembre de 1971, terminao el "maga especial disposicion por maga tratao" (English: special treaty arrangements) "incompatible con el pleno internacional responsabilidad como un soberano e independiente estado" (English: inconsistent with full international responsibility as a sovereign and independent state).

Na 1991, ya desempeña Qatar con un significante papel na el guerra del Golfo particularmente durante el Batalla de Khafji donde ya recorre el maga qatari tanque con el maga calle del ciudad y ya proporciona con apoyo de combate al maga unidad del nacional guardia de Arabia Saudita que ya enfrenta con el maga tropas del iraqui ejercito. Ya permiti Qatar que el maga canadiense tropa del coalicion utiliza con el pais como aereo base para lanza con maga aeronave na servicio de aereo patrulla de combate, ademas de permiti que el maga estadounidense y frances fuerza opera na el de suyo territorio.

Na 1995, ya toma control el emir si Hamad bin Jalifa Al Thani del de suyo padre si Jalifa bin Hamad Al Thani, con el apoyo del maga armao fuerza y el gabinete, ademas de maga vecino estado y Francia. Bajo Emir Hamad, ya experimenta Qatar con un moderao grado de liberalizacion, incluio el lanzamiento de la cadena de television Al Jazeera (1996), el aprobacion del femenino sufragio o del derecho al voto na el maga municipal eleccion (1999), el redaccion del de suyo primer escrio constitucion (2005) y el inauguracion de un romano catolico iglesia (2008).

Ya crece rapidamente el economia de Qatar y el de suyo estatus como regional potencia na el decada de 2000. Segun el ONU, el economico crecimiento del nación, medido por el BIP, el mas rapido del mundo durante este decada. Ya radica el base de este crecimiento na el explotacion de natural gas na el Campo Norte durante el decada de 1990. Al mismo tiempo, ya triplica el poblacion entre 2001 y 2011, principalmente por el afluencia de maga extranjero.

Na 2003, ya servi Qatar como sede el del Central Mando del maga Estados Unidos y uno del maga principal sitio de lanzamiento del invasion de Irak de 2003. Na marzo de 2005, ya mata un ataque suicida con un britanico maestro al Doha Players Theatre, chocando con el pais, que hinde ya experimenta previamente con maga acto de terrorismo. Realizao el bombardeo por si Omar Ahmed Abdullah Ali, un egipcio residente na Qatar con maga presunto vinculo con Al Qaeda na el arabigo peninsula. Debio al aumentao influencia de Qatar y el de suyo papel durante el Arabe Primavera, especialmente durante el rebelion en Bahréin de 2011-2012, ya empeora maga tension de largo plazo con Arabia Saudita, el vecino Emiratos Unidos del Arabo y Bahréin.^{[cita requerida]}

Na 2010, ya gana Qatar con el derecho de alberga con el Mundial Copa de Futbol de 2022, ansina que ele el primer país del Medio Oriente seleccionao para alberga con el torneo. Ya aumenta el adjudicacion con el inversion y el maga desarrollo dentro del nacion durante el decada de 2010. Na junio de 2013, ya queda el jeque si Tamim bin Hamad Al Thani el emir de Qatar despues de que ya entrega el de suyo padre con el poder. Ya prioriza el jeque Tamim con el mejora del domestico bienestar del maga ciudadano, incluio el establecimiento de maga avanzao sistema de salud y educacion, ademas de un expansion del infraestructura del pais para alberga con el Mundial Copa de Futbol de 2022. Ya alberga Qatar con el Copa desde 21 de noviembre al 18 de diciembre, ansina que ele el primer pais de arabe y musulman mayoria na hace con esto, y el tercer asiatico pais na hace con esto despues del Mundial Copa de Futbol de 2002 na Japón y Corea del Sur.

Similar el cultura de Qatar al de otro maga pais na Oriental Arabia, debio a un significante influencia del islam. Ya desempeña el nacional dia de Qatar, celebrao anualmente el 18 de diciembre, con un papel importante na el desarrollo de un sentido de nacional identidad. Observao na recuerdo del ascension al trono de si Jassim bin Mohammed Al Thani y el de suyo posterior unificacion del maga diverso tribu del pais.

El Cultural Festival de Doha es uno del maga cultural actividad que ta lleva a cabo anualmente el Qatari Ministerio de Cultura, Artes y Patrimonio, establecio na 2002 con el fin de difundi con el qatari cultura dentro y fuera de Qatar.^{[cita requerida]}

Ya presta especial atencion al arte el maga qatari funcionario, especialmente el familia Al Thani y el hermana del emir de Qatar, si Al-Mayassa bint Hamad Al Thani. Ta lidera esta mujer con el Autoridad de maga Museo de Qatar. Considerao el Museo de islamico arte de Doha (inaugurao na 2008) como uno del maga mejor museo del region. Na cuanto a este y cuanto otro qatari museo, como el arabe Museo de arte moderno, ta cae este maga museo bajo el autoridad del maga Museo de Qatar, que ta patrocina tambien con maga artistico evento na el extranjero, como maga grand exposicion de si Takahashi Murakami na Versalles (2010) y si Damien Hirst na Londres (2012).

Qatar el mayor comprador del mundo na el mercado del arte por valor. Ta desarrolla el qatari cultural sector para permiti que ta alcanza el pais con el mundial reconocimiento, al de suyo vez con el fin de contribui al desarrollo de un pais que ta confia principalmente na el de suyo industria del gas.

Ta remonta al aca-19 siglo el literatura de Qatar. Originalmente, el escrio poesia el mas comun forma de expresion. Ya forma si Abdul Jalil Al-Tabatabai y si Mohammed bin Abdullah bin Uthaymeen, dos maga poeta del maga principio del aca-19 siglo, con el corpus del mas antiguo escrio poesia de Qatar. Mas tarde ya cae el poesia na desgracia, despues de que ya comenza Qatar a cosecha con el maga beneficio del maga exportacion de petroleo a maga mediao del aca-20 siglo, ansina que ya abandona manada qatari con el de ellos maga beduino tradicion a favor de maga mas urbano estilo de vida.

Debio al creciente numero de maga qatari que ya comenza a recibi con un formal educacion durante el decada de 1950, ademas de otro maga significativo social cambio, ya atestigua 1970 con el introduccion del primer antologia de maga cuento, y na 1993 publicao el maga primer novela de local autoria. Ya retene el poesia —na particular, el predominante nabati forma— con algo de importancia, pero despues de poco ya eclipsa otro maga literario tipo conele. A diferencia del mayoria del otro maga formas de arte na el qatari sociedad, ya involucra el maga mujer na el movimiento del moderno literatura na un magnitud similar al del maga hombre.

Ya clasifica Freedom House con el maga medio de comunicacion na Qatar como "hinde libre" (English: not free) na el informe del Freedom of the Press (English: Libertad del Prensa) de 2014. Ya inicia el televisivo transmision na 1970. Al Jazeera es un principal cadena de television con sede na Doha. Ya empeza Al Jazeera na 1996 como un satelite del cadena del mismo nombre, enfocando na el maga noticia na arabe, y desde entonces ya expandi a un global red de cuanto especializao canal de television.

Hay maga informe de que comun el autocensura entre el maga periodista, particularmente na cuanto al gobierno y gobernante familia de Qatar. Ilegal el maga critica al gobierno, al emir y al gobernante familia na el maga medio de comunicacion. Segun el articulo 46 del periodistico ley, "hinde criticable el emir del estado de Qatar y hinde atribuio ningun declaracion a ele sino con un escrio permiso del gerente del de suyo oficina." Ademas, procesable el maga periodista por insulta con el islam.

Na 2014, ratificao un Ley de Prevencion del Cibercrimen. Segun el maga informe, ta restringi el ley con el libertad del prensa y conlleva con maga pena de prision y maga multa por maga amplio razon, como poner na peligro con el local paz o publica con maga falso noticia. Ya declara el Centro del Golfo para el maga Humano Derecho que el ley es un amenaza al libertad de expresion y ta pedi con el revocacion de maga cierto articulo del ley.

A pesar de todo esto, na maga reciente año hay un expansion del prensa. Actualmente hay siete maga periodico na circulacion na Qatar, publicao cuatro na arabe y tres na ingles. Tambien impreso na Qatar maga local edicion de maga periodico del India, Nepal y Sri Lanka.^{[cita requerida]}

Na cuanto al infraestructura de telecomunicacion, Qatar el pais del Medio Oriente mejor clasificao na el Indice de Preparacion del Red (English: Network Readiness Index, NRI) del Mundial Economico Foro, un indicator para determina con el nivel de desarrollo del maga tecnologia del informacion y el comunicacion de un pais. Clasificao Qatar numero 23 por lo general na el ranking del NRI de 2014, sin maga cambio desde 2013.

Basao el musica de Qatar na el poesia, canto y baile del maga beduino. Realizao el maga tradicional baile de Doha el maga viernes por el tarde; uno de aquel maga baile es el ardah, un estilizada marcial baile interpretao por dos maga fila de maga bailarin, acompañao por un variedad de maga instrumento de percusion, incluio al-ras (un gran tambor cuyo cuero calentao por un abierto fuego), maga pandereta y maga platillo con maga chico tambor. Otro maga instrumento de percusion utilizao na el folclorico musica son galahs (un alto vasija de barro) y maga vaso de hojalata conocio como tus o tasat, tipicamente usao junto con un tabl, un longitudinal tambor golpeao con un palo. Tambien comunmente usao maga instrumento de cuerda, como el arabe laud o ud y el rebab.

El futbol el mas popular deporte na Qatar, tanto na maga termino de maga jugador como de maga espectador. Poco despues del afiliacion del Asociacion de Futbol de Qatar con el FIFA na 1970, ya veni uno del maga primero internacional reconocimiento del pais na 1981, cuando ya emerge el seleccion de futbol sub-20 de Qatar como subcampeona a Occidental Alemania na el Mundial Copa de Juvenil Futbol de 1981, tras un derrota de 4–0 na el final. A nivel superior, ya alberga Qatar tres maga vez con el Asiatico Copa: na 1988, na 2011 y na 2023. Por primera vez na el historia del pais, ya gana el seleccion de futbol de Qatar con el Asiatico Copa, na el edicion de 2019 albergao por el Emiratos Unidos del Arabo, derrotando con Japón 3–1 na el final. Ya gana ellos con el siete maga partido, concediendo con un solo gol en todo el torneo (contra Japón, como notao mas arriba). Como maga anfitrion y maga vigente campeon na el siguiente edicion de 2023, ya retene exitosamente Qatar con el de suyo título, derrotando con Jordania na el final.

El 2 de diciembre de 2010, ya gana Qatar con el de suyo candidatura para alberga con el Mundial Copa de Futbol de 2022, a pesar de nunca antes calificando para el maga final del Mundial Copa de Futbol. Ya construi el maga local organizador con siete maga nuevo estadio y ya expandi con un existente estadio para este evento. Ya saluda entusiasticamente el region del Persico Golfo con el ganador candidatura de Qatar para el Mundial Copa de 2022, kay ya representa ele con el primer seleccion un pais del Medio Oriente para alberga con el torneo. Al mismo tiempo, ya tiene mucho controversia, incluio maga acusacion de soborno e interferencia na el investigacion del presunto soborno. Tambien ya opone el maga europeo asociacion de futbol a que ya celebra el Mundial Copa 2022 na Qatar por un variedad de maga razon, del impacto del maga calido temperatura na el fisico estado del maga jugador, al posible disrupcion na el maga calendario del maga europeo nacional liga si reprogramao el evento para el invierno. Na mayo de 2014, acusao un qatari oficial de futbol, si Mohammed bin Hammam, de realiza con maga pago por un total de £3,000,000 a maga funcionario a cambio del de suyo apoyo al candidatura de Qatar. Ya absolve un investigacion del FIFA, sobre el proceso de licitacion na noviembre de 2014, con Qatar de cualquier delito.

Ya produci The Guardian, un britanico nacional diario, con un corto documentario llamao "El abuso y el explotacion del maga migrante trabajador preparando con el emirato para 2022" (English: Abuse and exploitation of migrant workers preparing emirate for 2022). Ya informa un investigacion de 2014 por The Guardian que el maga migrante trabajador, que ya construi con maga lujoso oficina para el maga organizador del Mundial Copa 2022, hinde pagao na mas de un año, y ahora "ta trabaja ilegalmente na maga alojamiento infestao de maga cucaracha" (English: working illegally from cockroach-infested lodgings). Para 2014, na cuanto al maga nepales migrante involucrao na el construccion de infraestructura para el Mundial Copa 2022, ya muri uno cada dos maga dia. Ya responde el organizador comite de Qatar 2022 a manada acusacion afirmando que organiza con el Mundial Copa na Qatar ya actua como un "catalizador para el cambio" (English: catalyst for change) na el region. Segun un articul de febrero de 2021 na The Guardian, ya muri alrededor de 6,500 maga migrante trabajador de construccion. Sin embargo, el Mundial Copa na Qatar el mas caro na el historia del competicion, con manada moderno tecnologia, y ya expresa mucho gente con el de suyo satisfaccion con el manejo del torneo por parte del pais.

Estimao que ya alberga Qatar con un base de 1.6 maga millon de maga aficionao al futbol para el Mundial Copa 2022. Sin embargo, esperao que hasta con el trabajo de construccion na el pais, ya aumenta el maga disponible habitacion de hotel de 37,000 a 70,000 lang al final de 2021. Na diciembre de 2019, ya contacta el maga oficial del Qatari Mundial Copa con el maga organizador del Festival de Glastonbury na Inglaterra y el Festival de Coachella na el maga Estados Unidos, para planea con maga enorme camping na el desierto para maga mil de maga aficionao al futbol. Segun maga informe, ya tene el maga camping, na el maga afuera del ciudad, con maga bar con licencia, maga restaurante, maga instalacion de lavao y hasta entretenimiento (aparte del juego mismo).

Masquen el futbol el mas popular deporte, ya experimenta otro maga deporte de equipo con considerable exito na el nivel superior. Na 2015, ya emerge el seleccion de balonmano de Qatar como subcampeon a Francia na el Mundial Campeonato de Masculino Balonmano de 2015 como maga anfitrion, masquen ya mancha manada controversia (con respecto al anfitrion nacion y el de suyo equipo) con el torneo. Ademas, na 2014, ya gana Qatar con el mundial campeonato na el masculino torneo del Mundial Copa de Baloncesto 3x3.

Popular el criquet entre el diaspora del sur de Asia na Qatar. El casual callejero críquet el mas popular formato del juego, pero desde 1999 el Qatar Cricket Association un miembro del Internacional Consejo de Críquet (ICC) y ta juga regularmente el maga masculino y femenino seleccion na el maga competicion del ICC. El primario campo de criquet na Qatar es el West End Park International Cricket Stadium.

El baloncesto es un desarrollao deporte entre el maga asiaticos na Qatar. Ya alberga Qatar^{[cita requerida]} con este maga torneo: el Campeonato de Asia del FIBA 2005, el Campeonato 3x3 de Asia del FIBA 2013, el Under-18 Campeonato de Asia del FIBA 2014 y el Under-16 Campeonato de Asia del FIBA 2022. Ay alberga Qatar con el Mundial Copa de Baloncesto de 2027, ansina que Qatar el primer arabe pais na alberga con el Mundial Copa de Baloncesto.

Ya alberga el Khalifa International Tennis and Squash Complex na Doha con el WTA Finals na el femenino tenis entre 2008 y 2010. Ta celebra anualmente Doha con el Torneo de Qatar para el WTA-Premier. Desde 2002, ya alberga Qatar con el anual Tour de Qatar, un ciclista carrera na seis maga etapa. Cada febrero, ta competi el maga ciclista na el maga carretera a traves del llanura de Qatar durante seis maga dia. Ta cubri cada etapa con un distancia de mas de 100 km, masquen el contrarreloj usualmente un mas corto distancia. Ta organiza el Ciclista Federacion de Qatar (English: Qatar Cycling Federation) con el Tour de Qatar para maga profesional ciclista na el categoria de Masculino Elite.

Ta tene el equipo de paracaidismo del Ejercito de Qatar con cuanto diferente disciplina de paracaidismo clasificao entre el maga mejor nacion del mundo. Ta actua anualmente el equipo nacional de paracaidismo de Qatar durante el Nacional Dia de Qatar y otro maga gran evento, como el antedicho Mundial Campeonato de Masculino Balonmano de 2015. Cuatro maga vez ya alberga Doha con el oficial Mundial Campeonato de maga Club del FIVB y tres maga vez con el Mundial Campeonato de Femenino Voleibol del FIVB, ademas de alberga con el Asiatico Campeonato de Masculino Voleibol na 1997.

Ya contrata Qatar con el Corporacion RAND para reforma con el de suyo sistema de educacion K–12. Gracias al Qatar Foundation, ya construi el pais con el Ciudad del Educacion de Doha, un campus que ta alberga con maga local rama del Medico Centro Weill Cornell, el Carnegie Mellon School of Computer Science, el Universidad de Georgetown, el Universidad del noroeste, el Universidad de Texas A&M, el Virginia Commonwealth University School of the Arts y otro maga occidental institucion.

El tasa de analfabetismo fue de 3.1% para el maga hombre y 4.2% para el maga mujer na 2012, el mas bajo del arabeparlante mundo y el aca-86 na el mundo. Para el maga ciudadano, obligatorio el educacion K–12 (desde el jardin de maga infante hasta el secundario escuela) provisto por el qatari gobierno. El Universidad de Qatar, fundao na 1973, el mas antiguo y mas grande institucion de superior educacion del pais.

Na noviembre de 2002, ya crea el Emir si Hamad bin Khalifa Al Thani con el Supremo Consejo de Educacion. Ta dirige y ta controla el Consejo con el educacion para todo el maga edad, desde el preescolar nivel hasta el universitario nivel, incluio el iniciativo "Educacion para un nueva era" (English: Education for a New Era), establecio para trata de posiciona con Qatar como un lider na el educativo reforma. Segun el Webometrics Ranking of World Universities, el maga mejor clasificao universidad del pais son el Universidad de Qatar (aca-1,881 na el mundo), el Universidad de Texas A&M (aca-3,905) y el Medico Centro Weill Cornell (aca-6,855).

Na 2009, ya establece Qatar con el Parque de Ciencia y Tecnologia de Qatar na el Ciudad del Educacion para vincula con aquel maga universidad con el industrial sector. El Ciudad del Educacion tambien el hogar de un totalmente acreditao escuela del Organizacion del Internacional Bachillerato, Qatar Academy. Ademas, ya inaugura dos maga canadiense institucion —el College of the North Atlantic (sede na Terranova y Labrador) y el Universidad de Calgary— con maga campus na Doha. Tambien ya establece otro maga universidad con maga fin de lucro con maga campus na el ciudad.

Na 2012, clasificao Qatar el tercero desde el ultimo lugar del 65 maga pais del OECD que ya participa na el informe PISA de matematica, y maga habilidad de lectura para maga joven de 15 y 16 maga año, a pesar de tene con el mas alto ingreso per capita del mundo. Clasificao Qatar como el aca-50 na el global indice de innovacion na 2023, desde el aca-65 puesto na 2019.

Como parte del de suyo nacional estrategia de desarrollo, ya esboza Qatar con un estrategico plan de 10 maga año para mejora con el nivel de educacion. Ya pone na marcha el gobierno con maga programa de educativo extension, como Al-Bairaq. Lanzao Al-Bairaq na 2010 con el fin de provee al maga estudiante de secundaria con el oportunidad de experimenta con un entorno de investigacion na el Centro de maga Avanzao Material del Universidad de Qatar. Ta abarca el programa con el maga campo CTIM y el maga idioma.

Lanzao na 2006 como parte de un iniciativa del Qatar Foundation, creao el Qatar National Research Fund con el fin obtene con maga publico fondo para el cientifico investigacion. Ta funciona el fondo como un medio para diversifica con economia del pais, pasando de un economia basao principalmente na el petroleo y el gas a un economia basao na el conocimiento. Ya establece el Qatar Foundation con el Parque de Ciencia y Tecnologia de Qatar na marzo de 2009 como un intento de ayuda con el transicion del pais hacia una economia del conocimiento. Con un capital semilla de 800 maga millon de maga dolar e inicialmente albergando con 21 maga organizacion, ya queda el PCTQ el primer zona de libre comercio de Qatar.

• Lista de maga tema relacionao con Qatar
• Resumen de Qatar